រដ្ឋធានីវ៉ាស៊ីនតោន៖ ដើម្បីឆ្លើយតបទៅនឹងការហក់ឡើងនៃតម្លៃប្រេងពិភពលោកហួសពី១០០ដុល្លារក្នុងមួយបារ៉ែល រដ្ឋបាល លោក ដូណាល់ ត្រាំ បានសម្រេចដាក់ចេញនូវវិធានការដ៏គួរឱ្យភ្ញាក់ផ្អើលមួយ ដោយអនុញ្ញាតឱ្យមានការទិញលក់ប្រេង និងផលិតផលប្រេងរបស់រុស្ស៊ី ដែលកំពុងជាប់គាំងនៅតាមកប៉ាល់នានាលើផ្ទៃសមុទ្ទ...។

រដ្ឋមន្ត្រីក្រសួងរតនាគារនៃរដ្ឋាភិបាលសហរដ្ឋអាម៉េរិក លោក ស្កុត បេសសិន បានបញ្ជាក់ថា អាជ្ញាបណ្ណដែលមានរយៈពេល៣០ថ្ងៃ (មានសុពលភាពរហូតដល់ថ្ងៃទី១១ ខែមេសា) គឺជាជំហានចាំបាច់ ដើម្បីរក្សាស្ថិរភាពទីផ្សារថាមពល ដែលបាននិងកំពុងរង្គោះរង្គើដោយសារសង្រ្គាមនៅអ៊ីរ៉ង់។ ស្របពេលជាមួយគ្នា ក្រសួងថាមពលអាម៉េរិកបានប្រកាសបញ្ចេញប្រេងចំនួន១៧២លានបារ៉ែលពីឃ្លាំងបម្រុងយុទ្ធសាស្ត្រ ជាផ្នែកនៃកិច្ចព្រមព្រៀងសកលរបស់ IEA ក្នុងការបញ្ចេញប្រេងសរុប៤០០លានបារ៉ែល ដើម្បីប៉ះប៉ូវការផ្គត់ផ្គង់ដែលបាត់បង់ពីមជ្ឈិមបូព៌ា។  

បច្ចុប្បន្ន ប្រេងរុស្ស៊ីប្រហែល១២៤លានបារ៉ែល កំពុងអណ្តែតលើទឹកនៅតាមទីតាំងផ្សេងៗគ្នា ជុំវិញពិភពលោក។ ការបើកផ្លូវឱ្យលក់ប្រេងទាំងនេះ នឹងជួយផ្គត់ផ្គង់ទីផ្សារបានប្រហែល៥ទៅ៦ថ្ងៃបន្ថែមទៀត ខណៈច្រកសមុទ្ទហ័រមូស្សនៅតែបន្តជាប់គាំង។ ទន្ទឹមនោះ សេតវិមានកំពុងពិចារណាលើកលែងច្បាប់ Jones Act ជាបណ្ដោះអាសន្ន ដើម្បីអនុញ្ញាតឱ្យកប៉ាល់បរទេសអាចដឹកជញ្ជូនឥន្ធនៈ រវាងកំពង់ផែអាម៉េរិក ដែលនឹងជួយកាត់បន្ថយចំណាយ និងបង្កើនល្បឿននៃការចែកចាយ។ បើទោះបីជាមានការរិះគន់ពីសមាជិកសភាមួយចំនួន ដែលចោទប្រកាន់លោកថា ខ្វល់តែពីផលចំណេញរបស់សេដ្ឋីប្រេងក៏ដោយ លោក ត្រាំ អះអាងថា អាម៉េរិកនឹងទទួលបានផលចំណេញយ៉ាងច្រើនពីការឡើងថ្លៃប្រេងក្នុងរយៈពេលខ្លី។

លោក ស្តេហ្វិន មីលលើរ (Stephen Miller) នាយករងខុទ្ទកាល័យសេតវិមាន បានសង្កត់ធ្ងន់ថា ប្រធានាធិបតីកំពុងធ្វើគ្រប់យ៉ាងដើម្បីបញ្ចុះតម្លៃ រួមទាំងការជំរុញឱ្យផលិតករក្នុងស្រុក បង្កើនការខួងយកប្រេងឱ្យអស់លទ្ធភាព និងការផ្ដល់ការធានារ៉ាប់រងដល់នាវាដឹកជញ្ជូននៅក្នុងតំបន់ឈូងសមុទ្ទ។ ស្ថានភាពនេះ បានក្លាយជាការរអាក់រអួលនៃការផ្គត់ផ្គង់ប្រេងដ៏ធំបំផុតក្នុងប្រវត្តិសាស្ត្រ បន្ទាប់ពីសង្គ្រាមរវាងអាម៉េរិក-អ៊ីស្រាអែល និងអ៊ីរ៉ង់ បានធ្វើឱ្យចរាចរណ៍ថាមពលតាមច្រកសមុទ្ទហ័រមូស្ស ត្រូវស្ពឹកស្រពន់ទាំងស្រុង ខណៈកងទ័ពបដិវត្តន៍អ៊ីរ៉ង់ នៅតែបន្តព្រមានបិទផ្លូវដឹកជញ្ជូននេះ រហូតដល់ការវាយប្រហារត្រូវបានបញ្ឈប់៕