រាជធានីភ្នំពេញ៖ រយៈពេល២៨ថ្ងៃនៃខែកុម្ភៈ ឆ្នាំ២០២៦ កម្ពុជាតាមរយៈក្រុមប្រឹក្សាអភិវឌ្ឍន៍កម្ពុជា (CDC) និងអនុគណៈកម្មាធិការវិនិយោគរាជធានី-ខេត្ត បានអនុម័តគម្រោងវិនិយោគសរុបចំនួន៤២ មានទំហំទុនសរុបប្រមាណ១៦៦លានដុល្លារអាម៉េរិក…។

របាយការណ៍ការរបស់ក្រុមប្រឹក្សាអភិវឌ្ឍន៍កម្ពុជា ចេញផ្សាយកាលពីយប់ថ្ងៃទី១១មីនា បានបង្ហាញថា ក្នុងចំណោមគម្រោងវិនិយោគទាំង៤២នេះ មាន១៨គម្រោង ត្រូវបានចុះបញ្ជីដោយ CDC ក្នុងនោះ៩គម្រោងនៅក្រៅតំបន់សេដ្ឋកិច្ចពិសេស និង៩គម្រោងទៀតស្ថិតក្នុងតំបន់សេដ្ឋកិច្ចពិសេស។ ដោយឡែក គម្រោងចំនួន២៤ទៀត ត្រូវបានចុះបញ្ជីដោយអនុគណៈកម្មាធិការវិនិយោគរាជធានី-ខេត្ត ត្រូវបានរំពឹងថា អាចបង្កើតឱកាសការងារជូនប្រជាពលរដ្ឋបានប្រមាណ២៤ពាន់កន្លែង។

គម្រោងវិនិយោគដែលបានចុះបញ្ជីខាងលើ មានជាអាទិ៍៖ គម្រោងបង្កើតរោងចក្រកាត់ដេរសម្លៀកបំពាក់ ស្បែកជើង និងកាបូប, ផលិតកេសកាតុង និងផលិតផលពីក្រដាស, ផលិតគ្រឿងសង្ហារិមសម្រាប់ប្រើប្រាស់ក្នុងផ្ទះ, ផលិតសម្ភារបោះជំរំ, កែច្នៃសំណប៉ាហាំង, ផលិតក្តារបន្ទះ, ផលិតចំណៀរឈើ, កែច្នៃលោហធាតុ និងផលិតផលពីប្លាស្ទិក, ផលិតសារធាតុគីមី, ផលិតដើមណូអែល, ផលិតនិងផ្តុំដំឡើងក្បាលរ៉ូប៊ីណេ, ផលិតគ្រឿងបង្គំបន្ទះសូឡា និងគ្រឿងបង្គុំបរិក្ខារអគ្គិសនី ។ល។

ខេត្តកំពង់ស្ពឺ ទទួលបានគម្រោងវិនិយោគច្រើនជាងគេ មាន៩គម្រោង បន្ទាប់មកខេត្តតាកែវ ៨គម្រោង, ព្រះសីហនុ៨គម្រោង, កណ្ដាល៦គម្រោង, រាជធានីភ្នំពេញ៥គម្រោង, ស្វាយរៀង៤គម្រោង, កំពង់ឆ្នាំង១គម្រោង និងកោះកុង ១គម្រោង។ គិតត្រឹមខែកុម្ភៈ ឆ្នាំ២០២៦ ចិននៅតែបន្តឈរលេខរៀងទី១ ដែលបានដាក់ទុនវិនិយោគនៅកម្ពុជាច្រើនជាងគេ៕