រាជធានីបាងកក​៖ នៅថ្ងៃពុធទី១១ ខែមីនា ឆ្នាំ២០២៦ អាកាសយានដ្ឋានអន្តរជាតិភូកេត ប្រទេសថៃ បានប្រកាសបិទផ្លូវរត់មួយខ្សែ (សម្រាប់យន្តហោះហោះឡើងនិងចុះចត) រហូតដល់ម៉ោង៦ល្ងាចនេះ បន្ទាប់ពីយន្តហោះមួយគ្រឿងបានជួបឧបន្ទវហេតុចុះចតបោកផ្ទប់នឹងផ្លូវរត់យ៉ាងខ្លាំង បណ្ដាលឱ្យដាច់កង់ និងជាប់គាំងនៅចំកណ្តាលផ្លូវរត់តែម្ដង ដែលធ្វើឱ្យប៉ះពាល់ដល់ជើងហោះហើរប្រមាណ១២០គ្រឿងផ្សេងទៀត​...។

នៅវេលាម៉ោងប្រហែល១២ថ្ងៃត្រង់ យន្តហោះរបស់ក្រុមហ៊ុន Air India Express ជើងហោះហើរលេខ AXB938 ហោះមកពីទីក្រុងហៃដឺរ៉ាបាដ (Hyderabad) ប្រទេសឥណ្ឌា បានចុះចតខុសបច្ចេកទេស ដោយបានធ្វើឱ្យកង់ផ្នែកខាងមុខដាច់ចេញពីយន្តហោះ ដែលជាហេតុធ្វើឱ្យយន្តហោះមិនអាចចល័តចេញពីផ្លូវរត់បាន។ សំណាងមួយ ក្នុងមួយពាន់គ្រោះថ្នាក់! មនុស្សទាំងអស់១៣៣នាក់ គ្មាននរណាម្នាក់រងរបួសឡើយ ហើយត្រូវបានជម្លៀសចុះពីលើយន្តហោះដោយសុវត្ថិភាព។ បច្ចុប្បន្ន ពួកគេកំពុងស្ថិតនៅក្រោមការមើលថែក្នុងអគាររង់ចាំ។

អាជ្ញាធរអាកាសចរណ៍ បានចេញសេចក្តីជូនដំណឹងបិទផ្លូវរត់ចាប់ពីម៉ោង១២ថ្ងៃត្រង់ រហូតដល់ម៉ោង៦ល្ងាច ដើម្បីយកពេលស្ទូចយកយន្តហោះចេញ និងត្រួតពិនិត្យសុវត្ថិភាពផ្លូវរត់។ ការបិទផ្លូវរត់សម្រាប់យន្តហោះនេះ បានបណ្ដាលឱ្យជើងហោះហើរដែលត្រូវចុះចតនៅអាកាសយានដ្ឋានអន្តរជាតិភូកេតភូកេតទាំងអស់ ត្រូវនៅបន្តហោះរង់ចាំកណ្តាលអាកាស ខណៈជើងហោះហើរមួយចំនួនត្រូវបានបង្វែរទិសដៅទៅចុះចតនៅព្រលានយន្តហោះជិតខាងវិញ៕