រាជធានីបាងកក៖ នាយករដ្ឋមន្ត្រីថៃ អនុទីន ឆានវីរគុល បានបញ្ជាឱ្យមន្ត្រីរាជការទាំងអស់ អនុវត្តវិធានការសន្សំសំចៃថាមពលបន្ទាន់ ចំពេលវិបត្តិថាមពលកំពុងវាយលុក ដែលបណ្ដាលមកពីជម្លោះនៅតំបន់មជ្ឈិមបូព៌ា។ វិធានការទាំងនោះ រួមមាន៖ ផ្អាកការធ្វើដំណើរបំពេញការងារនៅក្រៅប្រទេស ធ្វើការពីផ្ទះ ការប្រើប្រាស់ជណ្ដើរជើងជំនួសឱ្យជណ្ដើរយន្ត រួមទាំងការកំណត់សីតុណ្ហភាពម៉ាស៊ីនត្រជាក់ត្រឹម២៦ទៅ២៧អង្សាសេជាដើម។

អ្នកនាំពាក្យរាជរដ្ឋាភិបាលថៃ លោកស្រី លលិដា ព្រីសវិវឌ្ឍនា (ลลิดา เพริศวิวัฒนา) បានប្រាប់អ្នកយកព័ត៌មាននៅថ្ងៃអង្គារទី១០ ខែមីនានេះថា៖«លោកនាយករដ្ឋមន្ត្រីបានបញ្ជាឱ្យចាប់ពីថ្ងៃនេះតទៅ មន្ត្រីរាជការនឹងត្រូវធ្វើការពីផ្ទះ (ឬ Work from home) លើកលែងតែមន្ត្រីណាដែលចាំបាច់ត្រូវបម្រើសេវាសាធារណៈដោយផ្ទាល់ប៉ុណ្ណោះ»។ បច្ចុប្បន្ន ប្រទេសមានសេដ្ឋកិច្ចធំជាងគេទី២ នៅអាស៊ីអាគ្នេយ៍មួយនេះ មានថាមពលបម្រុងទុកសម្រាប់ប្រើប្រាស់បានត្រឹមតែ៩៥ថ្ងៃទៀតប៉ុណ្ណោះ។ រដ្ឋមន្ត្រីក្រសួងថាមពល លោក ឥទ្ធិពល ឫកពិបុល្យ៍ (อรรถพล ฤกษ์พิบูลย์) អះអាងថា ថៃកំពុងស្វែងរកប្រភពផ្គត់ផ្គង់ឧស្ម័នធម្មជាតិរាវបន្ថែមពីសហរដ្ឋអាម៉េរិក អូស្ត្រាលី និងអាហ្វ្រិកខាងត្បូង។ ​ទន្ទឹមនឹងការស្វែងរកប្រភពផ្គត់ផ្គង់ រាជរដ្ឋាភិបាល ក៏កំពុងព្យាយាមកាត់បន្ថយតម្រូវការប្រើប្រាស់ជាបន្ទាន់ផងដែរ។ ​

គួរជម្រាបថា ថៃពឹងផ្អែកលើឧស្ម័នធម្មជាតិរហូតដល់ជិត៦៨ភាគរយ នៃតម្រូវការថាមពលសរុប។ កាលពីដើមខែនេះ ថៃក៏បានផ្អាកការនាំចេញថាមពលទៅកាន់គ្រប់ប្រទេសទាំងអស់ លើកលែងតែប្រទេសឡាវ និងភូមាប៉ុណ្ណោះ។ រាជរដ្ឋាភិបាលថៃក៏បានព្រមានដែរថា ប្រសិនបើស្ថានភាពកាន់តែអាក្រក់ទៅៗ វិធានការបង្ខំអាចនឹងត្រូវបានអនុវត្ត រួមមាន៖ ការបន្ថយពន្លឺប៉ាណូផ្សាយពាណិជ្ជកម្មនៅតាមហាង រោងភាពយន្ត និងអាជីវកម្មនានា រួមទាំងការបង្ខំឱ្យស្ថានីយប្រេងឥន្ធនៈបិទទ្វារ នៅម៉ោង១០ យប់៕