រាជធានីភ្នំពេញ៖ អង្គភាពការពារកុមារ ឬហៅកាត់ថា (CPU) បានឃាត់ខ្លួនជនសង្ស័យអាយុ២៤ឆ្នាំម្នាក់ នៅខេត្តសៀមរាប ពាក់ព័ន្ធនឹងបទល្មើសរំលោភបំពានផ្លូវភេទលើកុមារ ការផលិត និងចែកចាយសម្ភាររំលោភបំពានផ្លូវភេទលើកុមារ...។

អង្គភាពការពារកុមារ ឬហៅកាត់ថា (CPU) បានឱ្យដឹងថា ការចាប់ខ្លួនកើតឡើងបន្ទាប់ពីមានការស៊ើបអង្កេតយ៉ាងជាក់លាក់ ដោយអាជ្ញាធរមានសមត្ថកិច្ចកម្ពុជា និងអង្គភាពការពារកុមារ (CPU)។ តាមរយៈការស៊ើបអង្កេត សមត្ថកិច្ច រកឃើញមានជនរងគ្រោះសរុប២១នាក់ ដែលមានអាយុចន្លោះពី៥ដល់១៦ឆ្នាំ បានជាប់ពាក់ព័ន្ធនឹងករណីនេះ។ មកដល់ពេលបច្ចុប្បន្ន ​ជនរងគ្រោះទាំងអស់កំពុងទទួលបានការពិគ្រោះផ្លូវចិត្តដោយអ្នកជំនាញ និងការគាំទ្រពីអង្គភាពការពារកុមារ។

CPU បញ្ជាក់បន្ថែមថា ការស៊ើបអង្កេតនៅតែបន្ត និងកំពុងដំណើរការយ៉ាងសកម្ម ដោយសមត្ថកិច្ចជឿជាក់ថា នឹងអាចនៅមានជនរងគ្រោះបន្ថែមទៀត។ ក្រុមការងារស៊ើបអង្កេតកំពុងស្វែងរកតម្រុយ និងភស្តុតាងបន្ថែម ដែលកំពុងចង្អុលបង្ហាញថា មានបណ្តាញជនល្មើសផ្លូវភេទលើកុមារ ហើយការឃាត់ខ្លួនជនសង្ស័យបន្ថែមក៏អាចកើតមានឡើងនៅថ្ងៃមុខផងដែរ។ ជាមួយគ្នា CPU ក៏កំពុងសហការជាមួយដៃគូអនុវត្តច្បាប់ទាំងក្នុង និងក្រៅប្រទេស ដើម្បីកំណត់ទំហំបណ្តាញជនល្មើសឱ្យបានច្បាស់លាស់ និងធ្វើឱ្យប្រាកដថា រាល់ជនល្មើសត្រូវបាននាំមកផ្តន្ទាទោសចំពោះមុខច្បាប់។

លោក ជេមស៍ ម៉ាក់ខេប (James McCabe) នាយកអង្គភាពការពារកុមារ (CPU) បានមានប្រសាសន៍ថា ការចាប់ខ្លួនជនល្មើសនេះ បានបញ្ចប់ការរំលោភបំពានផ្លូវភេទដែលបានកើតឡើងជាយូឆ្នាំ ទៅលើកុមាររងគ្រោះជាច្រើននាក់។ លោកអះអាងថា ក្រុមការងារស៊ើបអង្កេតបានខិតខំប្រឹងប្រែងយ៉ាងខ្លាំងក្នុងការស្វែងរក និងចាប់ខ្លួនជនសង្ស័យ ដែលការចាប់ខ្លួននេះជាសារបញ្ជាក់ថា រាល់បុគ្គលដែលប្រព្រឹត្តបទល្មើសលើអ្នកដទៃ នឹងត្រូវបានស្វែងរក ចាប់ខ្លួន និងបញ្ជូនទៅកាន់តុលាការដើម្បីធ្វើការផ្តន្ទាទោស៕