រដ្ឋធានីតេហេរ៉ង់៖ ក្នុងវិធានការដ៏គួរឱ្យភ្ញាក់ផ្អើល និងជាការឌឺដងទៅកាន់មហាអំណាចខាងលិច ក្រុមបព្វជិតជាន់ខ្ពស់របស់អ៊ីរ៉ង់ កាលពីថ្ងៃទី៨ ខែមីនា បានសម្រេចតែងតាំងលោក អាយ៉ាតូឡា ម៉ូចតាបា ខាមេណី (Ayatollah Mojtaba Khamenei) ជាកូនប្រុសរបស់មេដឹកនាំដែលត្រូវគេធ្វើឃាត ឱ្យឡើងកាន់តំណែងជាមេដឹកនាំកំពូលថ្មីរបស់ប្រទេស...។

ការសម្រេចចិត្តនេះធ្វើឡើងតែ៩ថ្ងៃប៉ុណ្ណោះ បន្ទាប់ពីលោក អាយ៉ាតូឡា អាលី ខាមេណី ត្រូវបានសម្លាប់ក្នុងយុទ្ធនាការវាយប្រហាររបស់អាម៉េរិក និងអ៊ីស្រាអែល។ សេចក្តីថ្លែងការណ៍ ដែលចេញផ្សាយតាមកញ្ចក់ទូរទស្សន៍រដ្ឋ បានបញ្ជាក់ថា ក្រុមប្រឹក្សាអ្នកជំនាញចំនួន៨៨រូប បានបោះឆ្នោតជាឯកច្ឆន្ទជ្រើសរើស លោក ម៉ូចតាបា វ័យ៥៦ឆ្នាំ ឱ្យក្លាយជាមេដឹកនាំទី៣ នៃសាធារណរដ្ឋឥស្លាមអ៊ីរ៉ង់ ដោយមិនមានការស្ទាក់ស្ទើរឡើយ បើទោះបីជាស្ថិតក្រោមការឈ្លានពានដ៏សាហាវពីសហរដ្ឋអាម៉េរិក និងរបបស៊ីយ៉ូនីសក៏ដោយ។

លោក ម៉ូចតាបា ត្រូវបានគេស្គាល់ថា ជាអ្នកនិយមជ្រុលដូចឪពុករបស់លោកដែរ។ ការឡើងកាន់តំណែងនេះ បង្ហាញថា អ៊ីរ៉ង់នឹងបន្តគោលនយោបាយរឹងត្អឹង ប្រឆាំងនឹងការតវ៉ាក្នុងស្រុក និងបន្តការប្រឈមមុខដាក់គ្នាជាមួយសត្រូវខាងក្រៅ។ មុនពេលមានការប្រកាសជាផ្លូវការ លោកប្រធានាធិបតីអាម៉េរិក ដូណាល់ ត្រាំ បានផ្ញើសារព្រមានតាមរយៈ ABC News ថា លោកគួរតែមានសិទ្ធិសម្រេចក្នុងការជ្រើសរើសមេដឹកនាំថ្មីនេះ។ លោកបាននិយាយចំៗថា៖«បើគាត់មិនទទួលបានការយល់ព្រមពីយើងទេ គាត់នឹងមិនអាចរស់នៅបានយូរឡើយ»។ លើសពីនេះ កងទ័ពអ៊ីស្រាអែល ក៏បានបញ្ចេញសារព្រមានទុកជាមុនដែរថា ខ្លួននឹងមិនស្ទាក់ស្ទើរឡើយក្នុងកិច្ចប្រតិបត្តិការតាមប្រមាញ់ និងកម្ទេចមេដឹកនាំរូបណា ដែលមកបន្តវេនពីលោក អាលី ខាមេណី៕