មជ្ឈិមបូព៌ា៖ ភ្លើងសង្រ្គាមបានឆាបឆេះទូទាំងតំបន់មជ្ឈិមបូព៌ា បន្ទាប់ពីមីស៊ីល និងដ្រូនរបស់អ៊ីរ៉ង់ ហោះទៅកម្ទេចទីក្រុង និងហេដ្ឋារចនាសម្ព័ន្ធសំខាន់ៗនៃបណ្តារដ្ឋឈូងសមុទ្ទនានា ធ្វើឱ្យទំនាក់ទំនងការទូតរបស់រដ្ឋធានីតេហេរ៉ង់ត្រូវកាត់ផ្តាច់ទាំងស្រុង និងរុញច្រានតំបន់ទាំងមូលឱ្យទៅក្បែរមាត់ជ្រោះមរណៈនៃសង្រ្គាមយោធាទ្រង់ទ្រាយធំ។ នេះបើតាមអ្នកវិភាគភូមិសាស្ត្រនយោបាយ...។

កិច្ចខិតខំប្រឹងប្រែងកែលម្អទំនាក់ទំនងការទូតជាមួយអ៊ីរ៉ង់អស់រយៈពេលជាច្រើនឆ្នាំ ឥឡូវនេះ ប្រទេសនៅតំបន់ឈូងសមុទ្ទ រួមមាន៖ អារ៉ាប៊ីសាអូឌីត និងអារ៉ាប់រួម កំពុងប្រឈមមុខនឹងភាពទាល់ច្រកនៃទំនាក់ទំនងការទូតជាមួយរដ្ឋធានីតេហេរ៉ង់ បន្ទាប់ពីមីស៊ីល និងដ្រូនរបស់អ៊ីរ៉ង់ ហោះទៅកម្ទេចទីក្រុង និងហេដ្ឋារចនាសម្ព័ន្ធ​របស់ពួកគេ។ អ្នកជំនាញនៅមជ្ឈិមបូព៌ាកត់សម្គាល់ថា រដ្ឋអារ៉ាប់នៅតំបន់ឈូងសមុទ្ទ កំពុងស្ថិតនៅមាត់ជ្រោះនៃសង្រ្គាមមរណៈដែលជៀសមិនរួច ពួកគេកំពុងអង្គុយបើកភ្នែកធំៗមើលមុខគ្នា ដើម្បីស្វែងរកច្រកចេញ និងជជែកអំពីអត្ថប្រយោជន៍នៃភាពអត់ធ្មត់ជាយុទ្ធសាស្ត្រ ក្នុងចេតនាទាញមជ្ឈិមបូព៌ាចេញពីមាត់រណ្តៅមរណៈ។

គេនៅចាំបានថា កាតា ជាប្រទេសមានទំនាក់ទំនងជិតស្និទ្ធបំផុតជាមួយអ៊ីរ៉ង់ ប៉ុន្តែបានបាញ់ទម្លាក់យន្តហោះចម្បាំងអ៊ីរ៉ង់២គ្រឿង ចាប់តាំងពីសង្រ្គាមផ្ទុះឡើង ខណៈប្រទេសនេះជាប់ឈ្មោះជាប្រទេសឈូងសមុទ្ទដំបូងគេបង្អស់ ដែលបានបាញ់ទម្លាក់យន្តហោះអ៊ីរ៉ង់។ ដោយស្ថានការកាន់តែស្រួចស្រាវទៅៗ អារ៉ាប៊ីសាអូឌីត បានបង្កើនកម្រិតត្រៀមលក្ខណៈរួចជាស្រេច ហើយបានព្រមានអំពីការឆ្លើយតបផ្នែកយោធា បន្ទាប់ពីការវាយប្រហារដោយដ្រូនជាបន្តបន្ទាប់ដោយអ៊ីរ៉ង់ បណ្ដាលឱ្យមានអគ្គិភ័យឆាបឆេះនៅរោងចក្រចម្រាញ់ប្រេងរ៉ាស់តានូរ៉ា(Ras Tanura) ដោយបង្ខំឱ្យប្រតិបត្តិការមួយចំនួនត្រូវបានផ្អាក។

ចំណែក អារ៉ាប់រួមរងគ្រោះធ្ងន់ធ្ងរជាងគេ ដោយត្រូវបានវាយប្រហារដោយដ្រូនជាង ៨០០គ្រឿង និងមីស៊ីល២០០គ្រាប់ចាប់តាំងពីថ្ងៃផ្ទុះសង្គ្រាមមក ដោយបានសម្លាប់មនុស្ស៣នាក់ និងបានបង្កជាអគ្គិភ័យឆាបឆេះនៅទីតាំងសំខាន់ៗ ជំរុញឱ្យរដ្ឋធានីអាប៊ុយដាប៊ី (Abu Dhabi) បិទស្ថានទូតរបស់ខ្លួននៅរដ្ឋធានីតេហេរ៉ង់ និងកោះហៅឯកអគ្គរដ្ឋទូតត្រឡប់មកវិញ។ ទន្ទឹមនឹងចំណាត់ការនេះ ធ្វើឱ្យទំនាក់ទំនងរបស់អារ៉ាប់រួម និងអ៊ីរ៉ង់ ត្រូវបានកាត់ផ្តាច់ទាំងស្រុង។

សូមជម្រាបថា ភ្លើងសង្រ្គាមដែលកំពុងឆាបឆេះយ៉ាងសន្ធោសន្ធៅនៅតំបន់មជ្ឈិមបូព៌ា នាពេលបច្ចុប្បន្ន មិនត្រឹមតែជាការគំរាមកំហែងផ្នែកយោធាប៉ុណ្ណោះទេ ប៉ុន្តែវាក៏ជាពេលវេលានៃមរណភាពផ្នែកនយោបាយការទូត រវាងរដ្ឋធានីតេហេរ៉ង់ និងបណ្តាប្រទេសជិតខាងផងដែរ។ សូមបញ្ជាក់ថា គិតមកទល់ពេលនេះ មានប្រទេសជាច្រើនកំពុងជាប់ពាក់ព័ន្ធនឹងសង្គ្រាមដ៏សាហាវព្រឺព្រួចនៅមជ្ឈិមបូព៌ាមួយនេះ ខ្លះដោយផ្ទាល់ ខ្លះទៀតដោយប្រយោល ដែលរួមមាន៖ អ៊ីរ៉ង់, អ៊ីស្រាអែល, អាម៉េរិក, អារ៉ាប់រួម, អារ៉ាប៊ីសាអូឌីត, កាតា, ហ្ស៊កដានី, លីបង់, ស៊ីរី, អ៊ីរ៉ាក់, កូវ៉ែត, អូម៉ង់, បារ៉ែន, ស៊ីប, បារាំង, អង់គ្លេស, អាល្លឺម៉ង់, ក្រិក, និងអេស្ប៉ាញជាដើម។ សំណួរសួរ ថា តើនៅមានប្រទេសប៉ុន្មានទៀត ដែលចង់ដើរក្រឡាអុកមរណៈនៅមជ្ឈិមបូព៌ា?...៕