រដ្ឋធានីតេហេរ៉ង់៖ អ៊ីរ៉ង់ ជាប់ដៃទប់ទល់ជាមួយអាម៉េរិក-អ៊ីស្រាអែលជាសត្រូវពីរផ្តុំកម្លាំងគ្នាដ៏ខ្លាំក្លាផង ហើយត្រូវងាកមករៀបចំក្បាលម៉ាស៊ីនដឹកនាំថ្នាក់កំពូលឡើងវិញផង។ គ្មាននរណាផ្សេងឡើយ គឺកូនប្រុសរបស់លោក អាយ៉ាតូឡា អាលី ខាមេណេ (Ayatollah Ali Khamenei) ផ្ទាល់តែម្តង ដែលត្រូវជ្រើសរើស និងត្រៀមតែងតាំងជាមេដឹកនាំកំពូលរបស់អ៊ីរ៉ង់។ នេះបើតាមការចុះផ្សាយរបស់សារព័ត៌មាន Iran International នៅថ្ងៃទី៤ ខែមីនា ឆ្នាំ២០២៦។ 

លោក អាលី ខាមេណេ ជាមេដឹកនាំកំពូលអ៊ីរ៉ង់ មានវ័យ៨៦ឆ្នាំ ត្រូវបានសម្លាប់ ហើយក្បាលម៉ាស៊ីនដឹកនាំកំពូលរបស់អ៊ីរ៉ង់ ក៏ត្រូវខ្ចាត់ខ្ចាយមួយរំពេចតាំងពីចាប់ផ្តើមសង្គ្រាមថ្ងៃដំបូងមកម្ល៉េះ។ កូនប្រុសរបស់លោក អាលី ខាមេណេ ដែលត្រូវជ្រើសរើសសម្រាប់តំណែងកំពូលនេះ គឺលោក ម៉ូចតាបា ខាមេណេ (Mojtaba Khamenei) មានវ័យ៥៦ឆ្នាំ ត្រូវគេចាត់ទុកជាបញ្ញវន្តជាន់ខ្ពស់ក្នុងសាសនាអ៊ិស្លាម។ 

កូនប្រុសទី២របស់លោក អាលី ខាមេណេ រូបនេះ ថ្វីបើមិនសូវចេញមុខពីមុន ហើយក៏មិនធ្លាប់មានតំណែងផ្លូវការក្នុងជួររដ្ឋាភិបាល ឬក្នុងជួរថ្នាក់ដឹកនាំ តែគេជឿថា លោក ជាមនុស្សដ៏មានឥទ្ធិពលនៅក្រោយឆាក។ លោក ក៏ជាបុគ្គលមានទំនាក់ទំនងយ៉ាងជិតស្និទ្ធជាមួយកងទ័ពឆ្មាំបដិវត្តន៍ ដែលជាកងទ័ពខ្លាំងក្លា និងមានអំណាចបំផុតរបស់អ៊ីរ៉ង់។ ទោះយ៉ាងណា គេមិនទាន់អាចដឹងនោះទេថា មេដឹកនាំកំពូលថ្មីរបសអ៊ីរ៉ង់រូបនេះ មានសមត្ថភាពពិតកម្រិតណា គឺមានតែរង់ចាំមើលជាក់ស្តែងប៉ុណ្ណោះ។ តើលោក អាចទប់ទល់ជាមួយអាម៉េរិក-អ៊ីស្រាអែលបានប៉ុនណា ហើយអាចសងសឹកឱ្យឪពុកបានដែរឬទេ?

គួរជម្រាបថា រចនាសម្ព័ន្ធដឹកនាំ ឬប្រព័ន្ធនយោបាយនៅអ៊ីរ៉ង់ រៀងខុសប្លែកពីគេបន្តិច។ តាមបណ្តាប្រទេសនានា ប្រធានាធិបតី ជាប្រមុខរដ្ឋ ហើយក៏អាចមានអំណាចលើសគេដែរ បើប្រទេសនោះ ប្រកាន់យកប្រព័ន្ធនយោបាយបែបប្រធានាធិបតីនិយម។ ប៉ុន្តែ នៅអ៊ីរ៉ង់វិញ ប្រធានាធិបតី គ្រាន់តែជាអ្នកចាំស្តាប់បង្គាប់បញ្ជា ឬជាកូនចឹងរបស់មេដឹកនាំកំពូលប៉ុណ្ណោះ។ ម្យ៉ាងទៀត នៅអ៊ីរ៉ង់ មិនមែនប្រធានាធិបតីនោះទេ គឺមេដឹកនាំកំពូលនេះឯង ដែលជាប្រមុខរដ្ឋ។ 

ទោះស្ថិតក្នុងអំឡុងពេលគ្មានមេដឹកនាំកំពូលក្តី តែអ៊ីរ៉ង់មិនដួលឡើយ គឺនៅតែអាចបន្តប្រយុទ្ធជាមួយអាម៉េរិក-អ៊ីស្រាអែល។ អ៊ីរ៉ង់ ប្រញាប់ប្រញាល់ផ្គុំក្បាលម៉ាស៊ីនដឹកនាំកំពូលឡើងវិញ ដើម្បីឱ្យខ្លួនមានភាពនឹងនដូចដើម ឬបើមិនដូចដើម ក៏ប្រហាក់ប្រហែលស្ថានភាពមុនដែរ ក្នុងការទប់ទល់ជាមួយអាម៉េរិក-អ៊ីស្រាអែល ខណៈការប្រយុទ្ធស៊ីសាច់ហុតឈាមគ្នានេះ បានជះឥទ្ធិពលស្ទើរពេញតំបន់មជ្ឈិមបូព៌ាទៅហើយ ហើយគេមិនដឹងថា ត្រូវចប់ពេលណាដែរ៕