រាជធានីភ្នំពេញ៖ អនុប្រធាន​សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា​(ស៊ីខៅឌូ) លោក អាត់ ធន់ មើលឃើញករណីកម្មការិនីរោងចក្រកាត់ដេរសម្លៀកបំពាក់ ខេមបូ យូនីសូល​ (CAMBO UNISOLL LTD.) ដួលសន្លប់២១នាក់ និងឈានទៅដល់ការបាត់បង់ជីវិត១នាក់ គឺជារឿងធ្ងន់ធ្ងរដែលទាមទារឱ្យមានការស៊ើបអង្កេតស៊ីជម្រៅ លើសពីការត្រួតពិនិត្យត្រឹមតែបរិស្ថានក្នុងរោងចក្រ...។

ថ្លែងប្រាប់អង្គភាពសារព័ត៌មាន SBM News នៅថ្ងៃទី៣មីនា ឆ្នាំ២០២៦ លោក អាត់ ធន់ លើកជាយោបល់ឱ្យគ្រប់ភាគីពាក់ព័ន្ធពិនិត្យលម្អិតថា ក្រៅពីបរិយាកាស តើការដួលសន្លប់របស់កម្មការិនីទាំង២១នាក់នៅរោងចក្រកាត់ដេរសម្លៀកបំពាក់ខេមបូ យូនីសូល ស្ថិតនៅស្រុកខ្សាច់កណ្តាល ខេត្តកណ្តាល កាលពីព្រឹកថ្ងៃទី២៧កុម្ភៈនោះអាចបណ្ដាលមកពីសារធាតុគីមីដាក់លើក្រណាត់ ឬសម្ភារ និងបញ្ហាសុខភាពណាមួយ។ ការទទូចរបស់អនុប្រធាន​សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ធ្វើឡើងក្រោយក្រសួងការងារ និងក្រសួងបរិស្ថាន សុទ្ធតែអះអាងថា បានចុះទៅពិនិត្យបរិស្ថានរោងចក្រតែរកពុំឃើញមានករណីបំពុលខ្យល់ណាមួយឡើយ។ ផ្ទុយមកវិញ ក្រសួងការងារបញ្ជាក់ថា ករណីកម្មការិនីដួលសន្លប់ដាច់សរសៃឈាមខួរក្បាលស្លាប់ម្នាក់ គឺបណ្ដាលមកពីមើលព័ត៌មានគ្រោះថ្នាក់ចរាចរណ៍ ចំណែក២០នាក់ផ្សេងទៀតដួលសន្លប់បន្តគ្នាព្រោះភិតភ័យ។ 

លោក អាត់ ធន់ ថ្លែងថា៖«[..]ករណីកន្លងមក! ខ្ញុំធ្លាប់ធ្វើការជាង១០ឆ្នាំ ភាគច្រើនគឺនៅក្នុងរោងចក្រវាតែងតែមានធូលី កម្តៅ ហើយបិទជិត អុកស៊ីសែនអត់គ្រប់ អ៊ីចឹងមានកម្មករសន្លប់ច្រើនដែរ​..ពេលខ្លះមានគីមីពុលខ្លាំង ដែលធ្វើឱ្យស្រួចស្រាវទៅ វាប៉ះពាល់ដល់សុខភាព អាហ្នឹងក៏មានដែរ! អ៊ីចឹង..គួរតែស៊ើបអង្កេតឱ្យបានស៊ីជម្រៅនៅក្នុងរឿងនេះ[..]»។ ទន្ទឹមគ្នា លោក មិនយល់ស្របចំពោះការបញ្ជាក់របស់ក្រសួងការងារ ដែលពណ៌នា ករណីកម្មការិនីដួលសន្លប់ គឺផ្តើមពីការមើលព័ត៌មានរន្ធត់។ ផ្ទុយមកវិញលោកថា ករណីកម្មករដួលសន្លប់ភាគច្រើនកើតមកពីបរិយាកាសក្នុងរោងចក្រ ព្រោះរោងចក្រមួយចំនួនក្ដៅខ្លាំង, ខ្វះខ្យល់ចេញ-ចូល និងបរិបទមួយទៀតកម្មករ-កម្មការិនី ធ្វើការច្រើនម៉ោងលើសកម្លាំងទើបបណ្ដាលឱ្យខ្សោយ។ 

សូមរំឭកថា នៅព្រឹមថ្ងៃទី២៧កុម្ភៈ កម្មការិនីម្នាក់ឈ្មោះ យឹម រីន អាយុ៣៤ឆ្នាំ​ បានស្លាប់ បន្ទាប់ពីដួលសន្លប់នៅកន្លែងធ្វើការក្នុងរោងចក្រកាត់ដេរសម្លៀកបំពាក់ ខេមបូ យូនីសូល ភ្លាមៗទាំងក្រសួងការងារ និងក្រសួងបរិស្ថាន សុទ្ធតែប្រកាសពីចំណាត់ការ ចុះទៅតាមដានលើករណីខាងលើ។ ក្នុងនោះ អ្នកនាំពាក្យក្រសួងបរិស្ថាន លោក ខ្វៃ អាទិត្យា បញ្ជាក់ប្រាប់ SBM News នៅថ្ងៃ៣មីនានេះថា ការត្រួតពិនិត្យត្រូវបានបិទបញ្ជាប់ ព្រោះរកពុំឃើញការបំពុលណាមួយកើតឡើងក្នុងរោងចក្រ៕