រាជធានីភ្នំពេញ៖ អង្គការ Mayaguez Memorial VFW Post 11575 បានចុះអនុស្សរណៈយោគយល់ជាមួយអាជ្ញាធរមីន លើការគាំទ្រដល់ពលរដ្ឋកម្ពុជាដែលរងរបួស ឬគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម...។

ការចុះអនុស្សរណៈយោគយល់ ស្តីពីការគាំទ្រដល់ជនរងគ្រោះដោយសារមីន និងសំណល់ជាតិផ្ទុះពីសង្គ្រាម ធ្វើឡើងនាព្រឹកថ្ងៃអង្គារទី៣មីនា ឆ្នាំ២០២៦ ដោយមានការចុះហត្ថលេខាដោយ លោក លី បញ្ញារិទ្ធិ៍ អគ្គលេខាធិការ តំណាងអាជ្ញាធរមីន និង លោក ហ្ការី ឃីត (Gary Kidd)​ តំណាងអង្គការ Mayaguez Memorial VFW Post 11575។ ថ្លែងក្នុងពេលអញ្ជើញជាអធិបតីក្នុងពិធីចុះអនុស្សរណៈ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានលើកឡើងថា កម្ពុជារស់នៅជាមួយនឹងផលវិបាកនៃសង្គ្រាមអស់ជាច្រើនទសវត្សរ៍មកហើយ។ គ្រាប់មីន និងសំណល់ជាតិផ្ទុះពីសង្គ្រាម បានសម្លាប់ បង្ករបួស និងបានរារាំងសហគមន៍ទាំងមូល ហើយការខូចខាតមិនបញ្ចប់ដោយការផ្ទុះនោះទេ គឺបានប៉ះពាល់ដល់គ្រួសារ និងប៉ះពាល់ដល់ជីវភាពរស់នៅរបស់ប្រជាជនទាំងមូល។

លោកបញ្ជាក់ថា សកម្មភាពទាំងអស់ក្នុងអនុស្សរណៈយោគយល់នេះ នឹងត្រូវអនុវត្តតាមក្របខណ្ឌជាតិ និងគោលនយោបាយរបស់កម្ពុជា សម្រាប់សកម្មភាពមីន និងជំនួយជនរងគ្រោះ ប្រកបដោយទំនួលខុសត្រូវចំពោះប្រជាជនកម្ពុជា។ លោកក៏បានសម្ដែងនូវការស្វាគមន៍ និងវាយតម្លៃខ្ពស់ចំពោះការប្តេជ្ញាចិត្តរបស់អង្គ l VFW Post 11575 ក្នុងការរួមចំណែកគាំទ្រដល់ជនមានពិការភាព និងធ្វើជាដៃគូដើម្បីបង្កើនការគាំទ្រសម្រាប់ចក្ខុវិស័យកម្ពុជាគ្មានមីន។

គួរបញ្ជាក់ថា កម្ពុជានៅមានផ្ទៃដីមួយចំនួនធំ ដែលបានបន្សល់នូវសំណល់ជាតិផ្ទុះ ជាពិសេសសង្គ្រាមឈ្លានពានរបស់យោធាថៃ ក្នុងឆ្នាំ២០២៥ កន្លងទៅថ្មីៗ បង្កឱ្យមានផលប៉ះពាល់ដល់ប្រជាជនកម្ពុជាមួយភាគធំ ដែលបាននិងកំពុងរស់នៅតាមខេត្តជាប់ព្រំដែនជាមួយប្រទេសថៃ ពោលគឺគ្រាប់បែកចង្កោម​ គ្រាប់បែកទម្លាក់ពីលើយន្តហោះ ដ្រូនអត្តឃាត​ អាវុធសារធាតុគីមី​ និងគ្រាប់យុទ្ធភណ្ឌ​មិនទាន់ផ្ទុះទូទៅ​ បានគំរាមកំហែងសុខសុវត្ថិភាពលើផ្ទៃដីប្រមាណ៤៤១ ៥៩៥ហិកតា​ ក្នុងភូមិសាស្ត្រនៃភូមិចំនួន៣៤០​ក្នុងខេត្តចំនួន៧ ​តាមបណ្តោយព្រំដែនកម្ពុជា-ថៃ៕