ខេត្តសៀមរាប៖ បុរស២នាក់ រួមទាំងបារីអេឡិចត្រូនិកជាង១ម៉ឺនគ្រឿង ត្រូវបានកម្លាំងអាវុធហត្ថឆ្មក់បង្ក្រាប នៅចំណុចភូមិថ្មី សង្កាត់ស្វាយដង្គំ ក្រុងសៀមរាប កាលពីថ្ងៃទី២៨ ខែកុម្ភៈ ឆ្នាំ២០២៦.....។ 

ក្រោមការសម្របសម្រួលនីតិវិធីច្បាប់ពីលោក ងុិល សុវណ្ណារិទ្ធ ព្រះរាជអាជ្ញារងអមសាលាដំបូងខេត្តសៀមរាប លោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្ត បានដឹកនាំកម្លាំងជំនាញឆ្មក់បង្ក្រាបទីតាំងស្តុកទុក និងចែកចាយបារីអេឡិចត្រូនិកដ៏ធំមួយកន្លែង ដោយរឹបអូសបារីអេឡិចត្រូនិចចម្រុះម៉ាក សរុបចំនួន១០១៦៨គ្រឿង និងឃាត់ខ្លួនបុរស២នាក់​ បញ្ជូនមកកាន់ការិយាល័យជំនាញដើម្បីសាកសួរព័ត៌មានបន្ថែម។

បច្ចុប្បន្ន កងរាជអាវុធហត្ថខេត្តសៀមរាប កំពុងកសាងសំណុំរឿងចាត់ការបន្តតាមនីតិវិធីច្បាប់។ សូមជម្រាបថា ឧបករណ៍អេឡិចត្រូនិក សារធាតុគីមីសម្រាប់ជក់ និងស៊ីស្សា គ្រប់ប្រភេទ ត្រូវបានរាជរដ្ឋាភិបាល ដាក់បទបញ្ជាហាមឃាត់ដាច់ខាត មិនឱ្យនាំចូល ចែកចាយ ផ្សាយពាណិជ្ជកម្ម ប្រើប្រាស់ កាន់កាប់ ផលិត និងស្តុកទុកឡើយ៕