រដ្ឋធានីសេអ៊ូល៖ ការិយាល័យប្រធានាធិបតីកូរ៉េខាងត្បូង បានប្រកាសនៅថ្ងៃសុក្រទី២៧ ខែកុម្ភៈនេះថា ប្រធានាធិបតី លី ជេម្យុង (Lee Jae-myung) នឹងអញ្ជើញទៅបំពេញទស្សនកិច្ចផ្លូវរដ្ឋនៅប្រទេសសិង្ហបុរី និងហ្វីលីពីន ចាប់ពីថ្ងៃទី១ ដល់ថ្ងៃទី៤ ខែមីនា ដើម្បីពង្រឹងកិច្ចសហប្រតិបត្តិការលើវិស័យបច្ចេកវិទ្យា និងថាមពល...។

បើតាមការិយាល័យប្រធានាធិបតី លោក លី នឹងជួបពិភាក្សាជាមួយនាយករដ្ឋមន្ត្រីសិង្ហបុរី លោក ឡរ៉េន វ៉ុង (Lawrence Wong) នៅចន្លោះថ្ងៃទី១-៣ ខែមិនា។ គោលដៅចម្បង គឺការពង្រីកទំហំពាណិជ្ជកម្ម និងការវិនិយោគ ជាពិសេស ផ្តោតលើវិស័យបញ្ញាសិប្បនិម្មិត(AI) និងថាមពលនុយក្លេអ៊ែរ។ នៅចន្លោះថ្ងៃទី៣-៤ ខែមីនា លោកនឹងបន្តដំណើរទៅជួបប្រធានាធិបតីហ្វីលីពីន លោក ហ្វើឌីណាន់ ម៉ាកូស ជេអរ (Ferdinand Marcos Jr) ក្នុងរបៀបវារៈសំខាន់ៗរួមមាន៖ កិច្ចសហប្រតិបត្តិការលើឧស្សាហកម្មការពារជាតិ និងយោធា, គម្រោងហេដ្ឋារចនាសម្ព័ន្ធ, ថាមពលនុយក្លេអ៊ែរ និងការផ្គត់ផ្គង់រ៉ែសំខាន់ៗ សម្រាប់ផលិតបន្ទះឈីប និងអាគុយឡានអគ្គិសនី៕