រាជធានីបាងកក៖ អតីតនាយករដ្ឋមន្ត្រីថៃ ថាក់ស៊ីន ឈិនៈវ័ត អាចនឹងទទួលបានសេរីភាពឡើងវិញ នៅថ្ងៃទី១១ ខែឧសភា ឆ្នាំ២០២៦ខាងមុខ ក្រោយជាប់ឃុំឃាំងអស់រយៈពេលជាង៥ខែ។ សំណួរពីមហាជនជាច្រើនចោទសួរថា តើមហាសេដ្ឋីដ៏មានឥទ្ធិពលក្នុងប្រទេសថៃរូបនេះ អាចនឹងបោះជំហានចូលប្រឡូកក្នុងឆាកនយោបាយវិញ ឬយ៉ាងណា..?

នៅថ្ងៃទី២៦កុម្ភៈនេះ លោកស្រី ផែថងថាន ឈិនៈវ័ត អតីតនាយករដ្ឋមន្ត្រីថៃ និងជាកូនស្រីពៅសំណព្វចិត្តលោក ថាក់ស៊ីន រួមជាមួយស្វាមី និងមេធាវីផ្ទាល់ខ្លួន បានទៅសួរសុខទុក្ខឪពុក នៅឯពន្ធនាគារកណ្តាលក្លងព្រែម (คลองเปรม) ក្នុងរាជធានីបាងកក។ នេះជាការសួរសុខទុក្ខ​លើក​ទី៤៣ហើយ ចាប់តាំងពីលោក ថាក់ស៊ីន ត្រូវ​បាន​គេ​ឃុំ​ខ្លួន​អស់រយៈពេលជាង៥ខែមកនោះ។

លោកស្រី ផែថងថាន បញ្ជាក់ថា តាមនីតិវិធីច្បាប់ លោក ថាក់ស៊ីន នឹងគ្រប់លក្ខខណ្ឌក្នុងការស្នើសុំឱ្យនៅក្រៅឃុំ នៅថ្ងៃទី១០ ខែឧសភា ហើយអាចដើរចេញពីពន្ធនាគារនៅថ្ងៃទី១១ឧសភា​ ព្រោះថា បទប្បញ្ញត្តិតម្រូវឱ្យអ្នកទោសត្រូវទទួលទោស២ភាគ៣នៃការកាត់ទោសសរុប និងអនុញ្ញាតឱ្យព្យួរទោសមិនលើសពី១ភាគ៣ នៃចំនួនទោសសរុបរយៈពេលមួយឆ្នាំ ដោយមានការយល់ព្រមពីអនុគណៈកម្មការ។ ពេលសួរថា តើលោក ថាក់ស៊ីន នឹងធ្វើអ្វីបន្ត ក្រោយមានសេរីភាព..? លោកស្រី ផែថងថាន បានបង្ហើបយ៉ាងខ្លីថា៖«បន្ទាប់ពីឆ្លងកាត់ការជាប់ឃុំឃាំងអស់រយៈពេល៦ខែមកនេះ ឪពុក[របស់លោកស្រី] នឹងដកខ្លួនចេញពីឆាកនយោបាយហើយ»៕