រដ្ឋធានីវ៉ាស៊ីនតោន៖ សហរដ្ឋអាម៉េរិក បានរកឃើញ​ភស្តុតាង​ ដែលអ៊ីរ៉ង់​ កំពុង​ព្យាយាម​បង្កើត​កម្មវិធី​អាវុធ​នុយក្លេអ៊ែ​ឡើង​វិញ​ បន្ទាប់ពីអាម៉េរិកបានទម្លាក់គ្រាប់កម្ទេចទីតាំងអភិវឌ្ឍនុយក្លេអ៊ែសម្ងាត់របស់អ៊ីរ៉ង់ម្តងរួចមកហើយ កាលពីពាក់កណ្តាលឆ្នាំ២០២៥កន្លងទៅ។ នេះបើតាមការប្រកាសរបស់លោក ជេម ដាវីដ វ៉ានស៍ (James David Vance) អនុប្រធានាធិបតីអាម៉េរិក នៅមុខក្រុមអ្នកកាសែតអន្តរជាតិ។  

សារព័ត៌មាន Reuters បានស្រង់សម្តីរបស់លោក ជេម ដាវីដ វ៉ានស៍ ទៅចុះផ្សាយនៅថ្ងៃទី២៦ ខែកុម្ភៈ ឆ្នាំ២០២៦នេះ យ៉ាងដូច្នេះថា៖«អ៊ីរ៉ង់​ មិន​អាច​មាន​អាវុធ​នុយក្លេអ៊ែបាន​ទេ»។ អនុប្រធានាធិបតីអាម៉េរិក ផ្ញើសារបែបគំរាមនេះទៅកាន់អ៊ីរ៉ង នៅមុនកិច្ចចរចាមកដល់តែបន្តិចប៉ុណ្ណោះ។ លោក ស្ទីហ្វ វីតកូហ្វ (Steve Witkoff) បេសកជនពិសេសអាម៉េរិក និងភាគីអ៊ីរ៉ង់ ត្រៀមជួបចរចាគ្នាក្នុងទីក្រុងហ្សឺណែវ ប្រទេសស្វ៊ីស នៅថ្ងៃ២៦កុម្ភៈនេះ ដើម្បីបន្ថយកម្តៅរវាងប្រទេសទាំងពីរ។

បំណងធំបំផុតមួយ ដែលអាម៉េរិកចង់បានក្នុងកិច្ចចរចា គឺចង់ឱ្យអ៊ីរ៉ង់លុប ឬផ្អាកកម្មវិធីអភិវឌ្ឍនុយក្លេអ៊ែ តែត្រូវគេសន្និដ្ឋានជាមុនថា អ៊ីរ៉ង់នឹងមិនងក់ក្បាលយល់ព្រមឡើយ។ ដំណឹងដែលអាម៉េរិកទើបទទួលបាននាពេលនេះ ជាទឡ្ហីករណ៍ច្បាស់លាស់បង្ហាញថា អ៊ីរ៉ង់មិនត្រឹមតែមិនផ្អាកនោះទេ គឺមានតែលួចអភិវឌ្ឍកម្មវិធីនុយក្លេអ៊ែឡើងវិញថែមទៀត។ រដ្ឋបាលរបស់ប្រធានាធិបតីអាម៉េរិក លោក ដូណាល់ ត្រាំ តែងបញ្ជាក់ជំហរម្តងហើយម្តងទៀតថា នឹងទប់ស្កាត់មិនឱ្យអ៊ីរ៉ង់អភិវឌ្ឍអាវុធនុយក្លេអ៊ែឡើយ។ 

គួរជម្រាបបន្តិចថា អាម៉េរិក និងអ៊ីរ៉ង់ កំពុងពាក់មុខយក្សដាក់គ្នា ហើយធ្វើឱ្យគេបារម្ភថា សង្គ្រាមអាចនឹងផ្ទុះឡើង បើភាគីទាំងពីរ មិនប្រញាប់រកដំណោះស្រាយជាមួយគ្នា។ ពេលនេះ សព្វាវុធទំនើបៗសាហាវៗរបស់អាម៉េរិក ពិសេសនាវាចម្បាំង និងយន្តហោះចម្បាំង កំពុងតែក្រឡឹងក្បែរអ៊ីរ៉ង់ ខណៈអ៊ីរ៉ង់វិញ ក៏បានដាក់ចង្អុលដៃចូលកៃកាំភ្លើងរួចស្រេចដែរ ត្រៀមកំដរលេងជាមួយអាម៉េរិកគ្រប់ពេល៕