ដកស្រង់ពី៖ Hello គ្រូពេទ្យ
សុខភាព៖ ក្រោកពីគេងភ្លាមត្រូវទទួលទានទឹក ដើម្បីជួយដុតបំផ្លាញជាតិខ្លាញ់ ស្រូបយកជាតិពុល និងជាតិគីមីនៅក្នុងអាហារដែលបានបរិភោគរួចពីយប់។ ក្នុងនោះ មួយថ្ងៃត្រូវពិសាទឹកឱ្យបាន២លីត្រ ឬ១២កែវ ច្រើនជាងភេសជ្ជៈផ្អែម ជាពិសេសនាពេលរដូវក្ដៅនេះ ទើបអាចទប់ទល់នឹងអាកាសធាតុ តែនៅពេលយប់កុំទទួលទានច្រើនពេក។
ការទទួលទានទឹកបានគ្រប់គ្រាន់ នោះនឹងទទួលបានគុណប្រយោជន៍៨យ៉ាង៖
១.ជួយទ្រទ្រង់សន្លាក់ និងឆ្អឹង ព្រោះពេលទទួលទានទឹកបានគ្រប់គ្រាន់ អាចការពារមិនឱ្យឈឺឆ្អឹងឆ្អែងពេលអង្គុយយូរ ឬពេលឱនងើបចុះឡើង និងជួយបង្កើនសាច់ដុំមានភាពរឹងមាំ។ ២.ទឹកអាចជួយធ្វើឱ្យស្បែកស្រស់ថ្លា ភ្លឺរលោង មានជាតិសំណើម គ្មានស្នាមអុជខ្មៅ មិនឆាប់ចាស់ និងលាងសម្អាតជាតិពុលចេញពីក្នុងរាងកាយ។ ៣.ជួយចិញ្ចឹមកោសិកា និងជួយទ្រទ្រង់រាងកាយឱ្យបានរឹងមាំល្អ ក៏ដូចជាមានសកម្មភាពរស់រវើក។ ៤.ជួយមិនឱ្យមានបញ្ហាឈឺបំពង់-ក និងពងបែកក្នុងមាត់។
៥.ទឹកធ្វើឱ្យមានអារម្មណ៍ល្អ និងជំនួយដល់ខួរក្បាលឱ្យមានដំណើរការឆាប់រហ័ស និងចងចាំបានល្អមិនងាយភ្លេចភ្លាំង។ ៦. ជួយឈាមរាវ ព្រោះមុនពេលបូមឈាម គ្រូពេទ្យតម្រូវទទួលទានទឹកឱ្យបានច្រើន ដើម្បីកុំឱ្យឈាមខាប់ និងជួយឱ្យឈាមរត់បានស្រួល។ ៧. ជួយថែរក្សាតុល្យភាពសារធាតុរ៉ែ មួយចំនួននៅក្នុងរាងកាយ រួមមាន៖ សូដ្យូម ក្លរីត ប៉ូតាស្យូម។ ៨. ជួយបន្សាបជាតិពុលក្នុងពោះវៀន ជួយសម្រួលដល់ការបន្ទោបង់ និងជួយសម្រួលដល់ប្រព័ន្ធរំលាយអាហារ ឱ្យដំណើរការបានល្អ៕
