សុខភាព៖ បើទោះបីជារវល់ខ្លាំងក្នុងការរកស៊ី ឬធ្វើការយ៉ាងណាក៏ដោយ សុខភាពពិតជាសំខាន់ណាស់ ដូច្នេះ គួរតែឆ្លៀតពេលខ្លះហាត់ប្រាណ ពិសេសនៅពេលម៉ោង៤ទៅម៉ោង៦ទៀបភ្លឺ ដើម្បីឱ្យរាងកាយមានសុខភាពល្អមិនងាយឈឺ...។

ការហាត់ប្រាណពេលព្រឹក ទទួលបានអត្ថប្រយោជន៍ ដូចជា៖
ទី១ សុខភាពដំណេក៖ ការហាត់ប្រាណពេលព្រឹក នឹងរួមចំណែកសម្រួលដល់សុខភាពដំណេកពេលយប់ ដោយសារ​ការហាត់ប្រាណពេលព្រឹកចន្លោះម៉ោង៤ទៅ៦ព្រឹក គឺជាពេលវេលាវដ្ដៈនៃដំណើរការគេងដែល​បែងចែកជាពីរ គឺពេលយប់ និងពេលថ្ងៃ។ ពេលយប់ រាប់ចាប់ពីពេលវេលាត្រូវគេងពីម៉ោង៩ ឬ១០ ហើយភ្ញាក់វិញចន្លោះ​​ពីម៉ោង​​៤ទៅ៥ព្រឹក ស្មើនឹ៧ទៅ៨ម៉ោង។ ការហាត់ប្រាណពេលព្រឹកដែលជំនួយដល់ការគេង គឺប្រភេទ​ហាត់ប្រាណបែបអេរ៉ូប៊ីក (aerobic) កម្រិតមធ្យម គឺជាការហាត់ប្រាណដែលពត់ដងខ្លួន កាយវិការច្រើន ជួយសម្រួល​​ដល់សាច់ដុំ សរសៃឈាម ជាពិសេសផ្នែកសរសៃឈាមខួរក្បាល។ បើតាមវេជ្ជបណ្ឌិតផ្នែកសុខភាពដំណេក បានណែនាំឱ្យហាត់ប្រាណពេលព្រឹកជាប្រចាំឱ្យបាន៣០នាទីទៅ១ម៉ោង។

ទី២ ពង្រឹងសា្មរតីឱ្យបានល្អ៖ ការហាត់ប្រាណពេលព្រឹក ជួយឱ្យអារម្មណ៍ស្រស់សា្រយ ព្រោះការបែកញើសពេលព្រឹកព្រលឹមនឹងជួយបង្កើនទៅ អ័រម៉ូនអង់ដូហ្វីន (endorphins)  សេរ៉ូតូនីន (serotonin) និងដូប៉ាមីន (dopamine)។ អ័រម៉ូនទាំងបីប្រភេទនេះ មានតួនាទីសំខាន់ សម្រាប់ខួរក្បាល និង​ប្រព័ន្ធប្រសាទមិនអាចខ្វះបាន។ ការហាត់ប្រាណពេលព្រឹកជាមួយអារម្មណ៍​ស្រស់​ស្រាយ បរិយាកាសត្រជាក់ ពិតជាផ្ដល់អត្ថប្រយោជន៍ដល់ស្មារតី មួយវិញទៀត ជួយឱ្យមានទម្លាប់ក្រោកលឿនពីព្រឹក។ ទី៣ គ្មានការរំខានពេលហាត់ប្រាណ៖ ហាត់ប្រាណពេលព្រឹកចន្លោះពីម៉ោង ៤ទៅ៦ព្រឹក មិនថារយៈពេលតិច ឬច្រើន នឹងមិនធ្វើឱ្យមានការរំខានខ្លាំងដូចពេលរសៀល ឬយប់នោះទេ។ ការធ្វើលំហាត់ប្រាណក្នុងអំឡុងពេលព្រឹក ទោះបីអ្នកចូលចិត្ដហាត់ប្រាណនៅទី​សាធារណៈ សួនច្បារមាត់ទន្លេ ក៏មិនសូវមានមនុស្សច្រើន។ អាចហាត់ប្រាណដោយការជិះកង់ ការដើរ ការរត់ ឬសកម្មភាពរាងកាយផ្សេងៗទៀតដោយរីករាយ ។

ចំណែកគុណប្រយោជន៍ចុងក្រោយគេទី៤នោះ គឺជួយដល់រាងកាយ៖ រាងកាយក្រោយពេលសម្រាក៦ទៅ៨ម៉ោង នឹងចាប់ផ្ដើមដំណើរការ​ព្រមគ្នា សរសៃឈាមចាប់ផ្ដើមធ្វើការសព្វរាងកាយ។ ក្នុងចំណុចនេះ ក៏ជំនួយទៅដល់ដំណើរការមេតាប៉ូលីស ក្នុងរាងកាយ។ មេតាប៉ូលីស គឺជាដំណើររការបំបែកពពួកប្រូតេអ៊ីន ខ្លាញ់ ស្ករ កាបូននីដ្រាត ដើម្បីបង្កើតថាមពលចិញ្ចឹមរាងកាយ ដូច្នេះដំណើរការមេតាប៉ូលីសល្អ នោះសុខភាពក៏កាន់តែល្អដែរ។ វេជ្ជបណ្ឌិតនៅសហរដ្ឋអាម៉េរិក ធ្លាក់លើកឡើងថា ការពិសាទឹក១កែវពេលព្រឹក អាចជួយដល់ដំណើររការមេតាប៉ូលីស គឺមិនទាន់គ្រប់គ្រាន់ទេ តែបើបានហាត់ប្រាណទៀត ទើបកាន់តែប្រសើរ៕

ដកស្រង់ពី៖ Hello គ្រូពេទ្យ