រដ្ឋធានីវ៉ាស៊ីនតោន៖ ស្ថានការណ៍នយោបាយ និងសេដ្ឋកិច្ចនៅសហរដ្ឋអាម៉េរិកបានឈានដល់ចំណុចពុះកញ្ជ្រោល បន្ទាប់ពីលោកប្រធានាធិបតី ដូណាល់ ត្រាំ បានសម្រេចចិត្តដំឡើងពន្ធនាំចូលសកល រហូតដល់១៥ភាគរយ កាលពីថ្ងៃទី២១ខែកុម្ភៈ គឺត្រឹមតែ២៤ម៉ោងប៉ុណ្ណោះ បន្ទាប់ពីតុលាការកំពូលអាម៉េរិកបានចេញសាលក្រមច្រានចោលអំណាចរដ្ឋបាលរបស់លោក ដោយសម្រេចថា គោលនយោបាយពន្ធគយមុនរបស់លោក គឺជាអំពើខុសច្បាប់។

តាមរយៈបណ្ដាញសង្គម Truth Social លោក ត្រាំ បានវាយបកទៅលើសេចក្តីសម្រេចរបស់តុលាការថាជា ទង្វើប្រឆាំងនឹងអាម៉េរិកយ៉ាងខ្លាំងក្លា។ បើទោះបីជាតុលាការបានច្រានចោលការប្រើប្រាស់ច្បាប់អំណាចសេដ្ឋកិច្ច ដែលហៅថា វិធានការអំណាចសេដ្ឋកិច្ចបន្ទាន់ឆ្នាំ១៩៧៧ ក៏ដោយ ក៏លោក ត្រាំ បានប្តូរយុទ្ធសាស្ត្រភ្លាមៗ ដោយងាកទៅប្រើប្រាស់មធ្យោបាយច្បាប់ផ្សេងទៀត ដើម្បីរុញកម្រិតពន្ធឱ្យឡើងដល់១៥ភាគរយ ដែលលោកអះអាងថាជាកម្រិតស្របច្បាប់ និងត្រូវបានសាកល្បងរួចរាល់។

ទន្ទឹមនឹងការដំឡើងពន្ធនេះ ភាពចលាចលផ្នែកនយោបាយបានផ្ទុះឡើងយ៉ាងខ្លាំង នៅពេលដែលសមាជិកបក្សសាធារណរដ្ឋបានបើកការវាយប្រហារផ្ទាល់ខ្លួនយ៉ាងចាស់ដៃលើចៅក្រមអភិរក្សនិយមដែលបានបោះឆ្នោតប្រឆាំងលោក ត្រាំ ដែលនេះជាសញ្ញានៃការបែកបាក់គ្នាយ៉ាងជ្រៅក្នុងប្រព័ន្ធយុត្តិធម៌។ ពន្ធថ្មីនេះនឹងមានសុពលភាពបណ្ដោះអាសន្នរយៈពេល១៥០ថ្ងៃ ដោយមានការលើកលែងតែវិស័យឱសថ និងទំនិញក្រោមក្របខណ្ឌកិច្ចព្រមព្រៀង USMCA ប៉ុណ្ណោះ។ សកម្មភាពឌឺដងរបស់លោក ត្រាំ មិនត្រឹមតែធ្វើឱ្យប៉ះពាល់ដល់សណ្ដាប់ធ្នាប់ពាណិជ្ជកម្មសកល និងបង្កើតភាពមិនច្បាស់លាស់សម្រាប់ដៃគូពាណិជ្ជកម្មទាំងមិត្តនិងសត្រូវប៉ុណ្ណោះទេ ប៉ុន្តែវាក៏ជាការសាកល្បងដ៏ធំបំផុតចំពោះអំណាចតុលាការ នៅក្នុងប្រវត្តិសាស្ត្រនយោបាយសម័យទំនើបរបស់អាម៉េរិកផងដែរ៕