រាជធានីភ្នំពេញ៖ ឈឺ-ក ឬឈឺចិត្ត? អនុទីន ឆានវីរគុល នាយករដ្ឋមន្ត្រីថៃចាំផ្ទះ កាលពីថ្ងៃទី១៨កុម្ភៈម្សិលមិញ បានបង្ហាញពីភាពខ្វះឆន្ទៈ និងកំសាក ក្នុងការប្រឈមមុខនឹងការពិត ជុំវិញការរត់ចូលរថយន្តឡើងលឿន ក្រោយឮអ្នកសារព័ត៌មានសួរអំពីការលើកឡើងរបស់សម្តេចមហាបវរធិបតី ហ៊ុន ម៉ាណែត នៅកណ្តាលរដ្ឋធានីវ៉ាស៊ីនតោន ថា យោធាថៃនៅតែបន្តកាន់កាប់ទឹកដីជ្រៅក្នុងដែនអធិបតេយ្យភាពកម្ពុជា ដោយខុសច្បាប់ ទោះមានបទឈប់បាញ់ក៏ដោយ...?

នៅឯវិមានរាជរដ្ឋាភិបាល លោក អនុទីន ឆាន់វីរគុល ត្រូវបានអ្នកសារព័ត៌មាន កាក់សួរលោកអំពីកិច្ចប្រជុំក្រុមប្រឹក្សាសន្តិភាពនៅរដ្ឋធានីវ៉ាស៊ីនតោន សហរដ្ឋអាម៉េរិក ជុំវិញព្រឹត្តិការណ៍សម្តេចនាយករដ្ឋមន្ត្រីកម្ពុជា ប្រាប់សហរដ្ឋអាម៉េរិក និងពិភពលោក តាមរយៈបណ្តាញសារព័ត៌មានរ៉យទ័រ ថា យោធាថៃបានកាន់កាប់ទឹកដីកម្ពុជាយ៉ាងជ្រៅ ដោយខុសច្បាប់ ដែលបង្កការលំបាកជាខ្លាំងដល់ប្រជាជនស៊ីវិលកម្ពុជា។ នៅពេលដែលអ្នកសារព័ត៌មានសួរសំណួរនេះ ស្រាប់តែលោក អនុទីន យកលេសធ្វើជាក្អក និងឈឺ-ក មិនព្រមឆ្លើយតបអ្នកសារព័ត៌មាន រួចក៏ឡើងរថយន្តបាត់ទៅ។ អាកប្បកិរិយានេះមិនមែនជាការឆ្លើយតបដ៏សមស្របទេ ប៉ុន្តែវាគឺជាការបង្ហាញយ៉ាងច្បាស់ថា នាយករដ្ឋមន្ត្រីថៃចាំផ្ទះ គ្មានអ្វីត្រូវនិយាយចំពោះរឿងពិតជាក់ស្តែងដែលមេដឹកនាំកម្ពុជាប្រាប់ទៅពិភពលោកនេះឡើយ ព្រោះថា យោធាថៃ បាននិងកំពុងប្រព្រឹត្តទង្វើឈ្លានពានប្រទេសកម្ពុជាដោយខុសច្បាប់ យ៉ាងពិតប្រាកដមែន។

ថ្លែងនៅលើទឹកដីនៃរដ្ឋធានីវ៉ាស៊ីន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចំៗ ច្បាស់ៗ និងមានទម្ងន់តាមបែបការទូត ថា កងទ័ពថៃនៅតែកាន់កាប់ដែនដីកម្ពុជាយ៉ាងជ្រៅ ពោលគឺហួសខណ្ឌសីមាព្រំដែន ដែលថៃធ្លាប់អះអាងដោយឯកតោភាគីទៅទៀត។ លើសពីនេះ ការដាក់ពង្រាយទូរកុងតឺន័រ និងលួសបន្លាដោយយោធាថៃឈ្លានពាន បានរារាំងប្រជាពលរដ្ឋស៊ីវិលកម្ពុជា មិនអាចត្រឡប់ទៅផ្ទះ និងបង្កការរំខានយ៉ាងធ្ងន់ធ្ងរដល់ជីវភាពរស់នៅរបស់ពួកគាត់។ «នេះមិនមែនជាការចោទប្រកាន់ទេ ប៉ុន្តែវាគឺជាការពិតនៅលើដី[កម្ពុជា]» នេះជាប្រសាសន៍ដ៏មុតស្រួចរបស់ប្រមុខរាជរដ្ឋាភិបាលកម្ពុជា ថ្លែងទៅកាន់សកលលោកទាំងមូល។ សម្តេចធិបតី ក៏បានអំពាវនាវឱ្យថៃអនុញ្ញាតឱ្យគណៈកម្មការព្រំដែនរួម (JBC) ចាប់ផ្ដើមកំណត់ព្រំដែនបច្ចេកទេសឡើងវិញ ឱ្យបានឆាប់តាមដែលអាចធ្វីទៅបាន ដើម្បីដោះស្រាយបញ្ហាដោយសន្តិវិធី ព្រោះការបោះឆ្នោតថ្មីបានចប់សព្វគ្រប់អស់ហើយ។

យ៉ាងណា ការសម្ដែងឈឺបំពង់ករបស់លោក អនុទីន គឺជារឿងដ៏គួរឱ្យអស់សំណើច ព្រោះសកម្មភាពនេះសបញ្ជាក់ឱ្យឃើញថា លោកកំពុងខ្វះភាពក្លាហានក្នុងការប្រឈមមុខនឹងការពិត ដ្បិតថា ថៃមិនត្រឹមតែមិនគោរពចំពោះកិច្ចព្រមព្រៀងបទឈប់បាញ់ដែលសម្របសម្រួលដោយលោកប្រធានាធិបតី ដូណាល់ ត្រាំ ទេ ប៉ុន្តែយោធាថៃ ថែមទាំងបានកាន់កាប់ទឹកដីកម្ពុជាដោយខុសច្បាប់ថែមទៀតផង។ ប្រសិនបើថៃមានភស្តុតាងថា មិនបានកាន់កាប់ដែនដីកម្ពុជា ហេតុអ្វី លោក អនុទីន មិនបកស្រាយឱ្យច្បាស់ៗ..? ហេតុអ្វីត្រូវក្អក ឈឺ-ក និងរត់ឡើងរថយន្តរត់ចេញបាត់ស្រមោលឈឹងបែបនេះ..? អាកប្បកិរិយារបស់លោក អនុទីន គឺជាការសារបង្ហាញយ៉ាងច្បាស់ថា ការលើកឡើងរបស់សម្តេចធិបតី គឺពិតជាត្រឹមត្រូវទាំងស្រុង និងមិនអាចប្រកែកបាន។

សូមបញ្ជាក់ថា កម្ពុជានៅតែរក្សាគោលជំហរគោរពកិច្ចព្រមព្រៀងសន្តិភាព បទឈប់បាញ់ និងទាមទារឱ្យមានដំណោះស្រាយសន្តិវិធី។ ផ្ទុយទៅវិញ ភាគីថៃនៅតែបង្ហាញពីភាពខ្វះឆន្ទៈពិតប្រាកដក្នុងការដោះស្រាយបញ្ហាព្រំដែនជាមួយកម្ពុជា និងបន្តគ្រប់គ្រងទឹកដីកម្ពុជា ទាំងរំលោភបំពាន៕