សុខភាព៖ បើនិយាយដល់ជំងឺមហារីក នរណាក៏ខ្លាច នរណាក៏បារម្ភដែរ ជាពិសេសស្ត្រីៗ ប៉ុន្តែលោកអ្នកដឹងទេ ជំងឺមហារីក៣ប្រភេទដែលកើតមានលើស្ត្រីអាចបង្ការបានដោយគ្រាន់តែធ្វើការហាត់ប្រាណ...។
១.ជំងឺមហារីកសុដន់៖ ការសិក្សាមួយចុះផ្សាយនៅក្នុងព្រឹត្តិបត្រស្រាវជ្រាវជំងឺមហារីកសុដន់ បានឱ្យដឹងថា ស្ត្រីមានប្រវត្តិគ្រួសារកើតជំងឺមហារីកសុដន់ អាចកាត់បន្ថយហានិភ័យកើតជំងឺនេះរហូតដល់២៥ភាគរយ បើសិនជាបានហាត់ប្រាណជាប្រចាំ២០នាទីក្នុងមួយថ្ងៃ និងរក្សារបៀបរបបរស់នៅល្អ។ ដូចគ្នាដែរសម្រាប់ស្ត្រីក្រោយអស់រដូវ បានហាត់ប្រាណបែបប្រើកម្លាំងខ្លាំងៗ ក៏បានធ្វើឱ្យមានការប្រែប្រួលកម្រិតអ័រម៉ូន និងប្រូតេអ៊ីន ជាលំដាប់ មានការថយចុះអត្រាប្រឈមកើតជំងឺមហារីកសុដន់ផងដែរ។ ចំពោះស្រីៗដែលមានផ្ទុកកោសិកាបំប្លែងខ្លួន BRCA ដែលអាចបង្កឱ្យមានហានិភ័យកើតមហារីកសុដន់ ការសិក្សាមួយចំនួនបានណែនាំថា ការចាប់ផ្ដើមហាត់ប្រាណតាំងពីវ័យជំទង់ ជួយពន្យារការកើតជំងឺមហារីកសុដន់ ប៉ុន្តែថាមិនអាចការពារមិនឱ្យមានការវិវត្ដនៃជំងឺនោះទេ។
២.ជំងឺមហារីកស្រទាប់ស្បូន៖ ស្ត្រីដែលបានហាត់ប្រាណ១៥០នាទីក្នុងមួយសប្ដាហ៍ ឬច្រើនជាងនេះ អាចកាត់បន្ថយហានិភ័យកើត ជំងឺមហារីកស្រទាប់ស្បូន បាន៣៤ភាគរយ ទាបជាង អ្នកដែលមិនសូវហាត់ប្រាណ។ នេះបើតាមការស្រាវជ្រាវរបស់សកលវិទ្យាល័យYale។ ដូចគ្នាដែរ ក្រុមអ្នកស្រាវជ្រាវបានរកឃើញថា ស្រីៗមានសន្ទស្សន៍មាសរាងកាយ(BMI)ក្រោម២៥ អាចកាត់បន្ថយហានិភ័យកើតជំងឺមហារីកស្រទាប់ស្បូន៧៣ភាគរយ ទាបជាង ស្ត្រីមិនសូវហាត់ប្រាណ និងមានសន្ទស្សន៍ម៉ាសរាងកាយលើសពី២៥។ ស្ត្រីដែលមានសន្ទស្សន៍ម៉ាសរាងកាយខ្ពស់ជាង២៥ ត្រូវគេចាត់ទុកថាលើសទម្ងន់ហើយ ។
៣.មហារីកក្រពេញអូវែ៖ ភស្តុតាងជាច្រើនបានបញ្ជាក់ថា ការហាត់មានទំនាក់ទំនងក្នុងការកាត់បន្ថយជំងឺមហារីកក្រពេញអូវែ។ ការសិក្សារកឃើញថាស្ត្រីហាត់ប្រាណបែបប្រើកម្លាំងខ្លាំងៗជាប្រចាំ ជួយកាត់បន្ថយហានិភ័យកើតជំងឺមហារីកក្រពេញអូវែរាលដាល បើប្រៀបធៀបទៅនឹងស្រីមិនធ្វើសកម្មភាពរាងកាយទៀងទាត់៕ ដកស្រង់ពី៖ Hello គ្រូពេទ្យ
