រាជធានីភ្នំពេញ៖ ការផ្ដល់ជម្រក ឬផ្ទះបណ្តោះអាសន្នដល់ពលរដ្ឋភៀសសឹក ដែលមិនទាន់អាចវិលត្រឡប់ទៅលំនៅឋានវិញបាន គឺមិនមែនមានន័យថា រាជរដ្ឋាភិបាលកម្ពុជា បោះបង់សិទ្ធិទាមទារទឹកដីដែលកងកម្លាំងថៃ កំពុងកាន់កាប់ដោយខុសច្បាប់នោះទេ។ នេះជាការលើកឡើងរបស់មេសិទ្ធិមនុស្ស និងអ្នកនាំពាក្យរាជរដ្ឋាភិបាលកម្ពុជា នៅថ្ងៃអង្គារទី១៧ ខែកុម្ភៈ ឆ្នាំ២០២៦...។
លោកទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា លើកឡើងលើទំព័រហ្វេសប៊ុកផ្ទាល់ខ្លួនថា រាជរដ្ឋាភិបាលកម្ពុជា កំពុងប្រើប្រាស់គ្រប់មធ្យោបាយទាំងអស់ ដើម្បីទាមទារទឹកដីពីទាហានថៃវិញ ហើយការសាងសង់ផ្ទះជូនជនភៀសសឹកស្នាក់នៅក៏មិនមែនជាការទទួលស្គាល់ចំពោះការបាត់បង់ទឹកដីដែរ។ ក្នុងន័យនេះ លោក សង្កត់ធ្ងន់ថា៖«ការដែលសាងសង់ផ្ទះ ឬជម្រកបណ្តោះអាសន្នឱ្យជនភៀសសឹក មិនមែនជាការទទួលស្គាល់ការបាត់បង់ទឹកដី ឬផ្ទះសម្បែងទេ[..] តែផ្ទុយទៅវិញ ទឹកដីផ្ទះសម្បែងត្រូវតែតវ៉ាយកមកវិញ ហើយការរស់នៅរបស់បងប្អូន យើងត្រូវតែគិតគូរឱ្យបានមុនរដូវវស្សាមកដល់»។ ទោះជាយ៉ាងណា លោកបានទាញការចាប់អារម្មណ៍ថា ការទាមទាររបស់រាជរដ្ឋាភិបាលកម្ពុជា មិនមែនជារឿងលេងសើច ហើយត្រូវការប្រើរយ:ពេលខ្លី ឬប្រើពេលមួយសប្តាហ៍ ឬមួយខែបានទេ។
ហាក់មិនខុសគ្នា លោក ប៉ែន បូណា អ្នកនាំពាក្យរាជរដ្ឋាភិបាល តាមរយៈសេចក្ដីថ្លែងការណ៍នៃការធ្វើ«បច្ចុប្បន្នភាពស្ដីពីការវិវត្តស្ថានការណ៍ព្រំដែនកម្ពុជា-ថៃ» នៅថ្ងៃអង្គារទី១៧កុម្ភៈនេះ បានប្រកាសថា សម្តេចនាយករដ្ឋមន្ត្រី ហ៊ុន ម៉ាណែត បានបញ្ជាក់ជំហរយ៉ាងម៉ឺងម៉ាត់ ចំពោះមុខប្រជាពលរដ្ឋរួចហើយថា«រាជរដ្ឋាភិបាលដាច់ខាតមិនបោះបង់សិទ្ធិទាមទារទឹកដីក្នុងដែនអធិបតេយ្យស្របច្បាប់របស់កម្ពុជា នោះឡើយ» ហើយរាជរដ្ឋាភិបាល បាននិងកំពុងធ្វើការងារយ៉ាងសកម្ម និងម៉ឺងម៉ាត់បំផុត ដើម្បីឈានទៅរកដំណោះស្រាយបញ្ហាព្រំដែនដោយសន្តិវិធី តាមយន្តការដែលភាគីទាំងពីរបានឯកភាពគ្នា និងដោយអនុលោមតាមអនុសញ្ញា សន្ធិសញ្ញា និងច្បាប់អន្តរជាតិជាធរមាន។
គួរជ្រាបថា ចាប់តាំងពីថៃបានបើកការឈ្លានពានកម្ពុជា ក្នុងឆ្នាំ២០២៥ ថៃបានគ្រប់គ្រងលើទឹកដីកម្ពុជាចំនួន១៤ទីតាំងក្នុងខេត្តជាប់ព្រំដែន។ ស្ថានភាពនេះ ពលរដ្ឋកម្ពុជា ប្រមាណជាង៧ម៉ឹននាក់ មិនទាន់អាចវិលទៅលំនៅឋានវិញ ហើយត្រូវបន្តស្នាក់នៅជំរំសុវត្ថិភាព គិតត្រឹមថ្ងៃទី១៧កុម្ភៈនេះ។ ក្នុងគ្រាដ៏លំបាកនេះ រាជរដ្ឋាភិបាលកម្ពុជា សម្រេចសាងសង់ជម្រកបណ្ដោះអាសន្នជូនជនភៀសសឹកឱ្យបានហើយ មុនរដូវវស្សាឆ្នាំ២០២៦ ចូលមកដល់៕
