ខេត្តតាកែវ៖ ទីតាំងអនឡាញស្កេមដ៏ធំសម្បើមមួយឈ្មោះថា សុភមិត្តរ៉េស៊ីដិន ស្ថិតក្នុងភូមិត្រយឹងខ្ពស់ ឃុំលំពង់ ស្រុកបាទី ខេត្តតាកែវ ត្រូវអាជ្ញាធរសម្រេចបិទជាផ្លូវការ ក្រោយបើកប្រតិបត្តិការឆ្មក់បង្ក្រាបទ្រុងទ្រាយធំ កាលពីថ្ងៃទី២២ ខែកក្កដា ឆ្នាំ២០២៥កន្លងមក។ ទីតាំងនេះ ស្ថិតក្នុងពាក្យបណ្ដឹងរបស់មន្ត្រីនគរបាលស្រុកបាទីទាំង៦៧រូប ដែលនាំគ្នាប្ដឹងលោកអធិការ ឆាយ កែវមុន្នី ថាទទួលសំណូកប្រចាំខែពីម្ចាស់ទីតាំងរាប់ពាន់ដុល្លារជាថ្នូរមិនបង្រ្កាប....។

សេចក្ដីប្រកាសព័ត៌មាន នៅថ្ងៃទី១៣ ខែកុម្ភៈ ឆ្នាំ២០២៦នេះ បានគូសបញ្ជាក់ថា ការសម្រេចបិទទីតាំងខាងលើនេះ ធ្វើឡើងបន្ទាប់ពីអាជ្ញាធរខេត្តសហការជាមួយគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE SCAMS) ដោយមានការសម្របសម្រួលពីស្ថាប័នអយ្យការអមសាលាដំបូងខេត្ត បានបើកប្រតិបត្តិការឆ្មក់បង្ក្រាបទ្រុងទ្រាយធំ ហើយចាប់ខ្លួនជនបទេសជាច្រើនជាតិសាសន៍ ។ បច្ចុប្បន្ន ទីតាំងខាងលើ ត្រូវបានរាជរដ្ឋាភិបាលសម្រេចប្រគល់ជូនក្រសួងមហាផ្ទៃ ទុកប្រើប្រាស់ជាអគារសម្រាប់ឃុំខ្លួនជនបរទេសទាំងនោះជាបណ្តោះអាសន្ន ដើម្បីត្រៀមបណ្តេញចេញពីព្រះរាជាណាចក្រកម្ពុជា។ សូមជម្រាបផងដែរថា កាលពីពេលកន្លងទៅ មន្ត្រីនគរបាលសឹងមួយស្រុកបាទី បានលើកគ្នាប្ដឹងលោកអធិការ ឆាយ កែវមុន្នី ដែលជាមេកើយរបស់ខ្លួន ថាប្រព្រឹត្តទង្វើមិនល្អក្នុងការដឹកនាំ, ស៊ីដាច់លុយកូនចៅ , បើកបនល្បែងរាប់រយកន្លែង, ព្រមទាំងលួចដោះលែងមុខសញ្ញាលក់ដូរថ្នាំញៀន។

ក្នុងនោះក៏មានឈ្មោះទីតាំងអនឡាញស្កេមខាងលើផងដែរ ដោយមន្ត្រីក្រោមឱវាទចំនួន៦៧នាក់ បានអះអាងថា លោក ឆាយ កែវមុន្នី បានទទួលសំណូកប្រចាំខែ​ចំនួន៥ពាន់ដុល្លារអាម៉េរិក ពីម្ចាស់ទីតាំង សុភមិត្តរ៉េស៊ីដិន ជាថ្នូរមិនរាយការណ៍ទៅថ្នាក់លើឱ្យចុះបង្ក្រាប។ លោក ទូច សុខៈ អ្នកនាំពាក្យរងក្រសួងមហាផ្ទៃ ធ្លាប់ផ្ដល់កិច្ចសម្ភាសជាមួយ SBM News ថា ក្រសួងមហាផ្ទៃបានទទួលដំណឹងនេះហើយ ដូច្នេះក្នុងក្របខ័ណ្ឌក្រសួង នឹងធ្វើត្រួតពិនិត្យ ដើម្បីស្វែងការពិត។ ចំណែក លោក ឆាយ កែវមុន្នី ជាសាមីខ្លួន ក៏ធ្លាប់ប្រាប់អង្គភាពយើងខ្ញុំដែរថា លោកបានឃើញរឿងនេះ និងទុកជូនថ្នាក់ដឹកនាំពិនិត្យដោះស្រាយ។ លោកគ្រាន់តែនិយាយខ្លីប៉ុណ្ណោះ រឿងអ្វីផ្សេងទៀត លោកមិនអត្ថាធិប្បាយឡើយ៕