រាជធានីភ្នំពេញ៖ ស្ថានទូតជប៉ុន បានចាប់ដៃគ្នាជាមួយអង្គការស្បៀងអាហារពិភពលោក (WFP) ចុះហត្ថលេខាលើគម្រោងផ្តល់ជំនួយឥតសំណង ក្នុងទំហំទឹកប្រាក់សរុបចំនួន២២០លានយ៉េន ឬ(ប្រមាណ១លាន៥សែនដុល្លារអាម៉េរិក) ដើម្បីស្តារជីវភាពរស់នៅជនភៀសសឹកនៅកម្ពុជា...។

ពិធីនេះ ធ្វើឡើងនៅថ្ងៃទី១២កុម្ភៈ ឆ្នាំ២០២៦នេះ ដោយ លោក អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា រួមជាមួយលោកស្រី ផាក ឃ្យុងណាន តំណាងកម្មវិធីស្បៀងអាហារពិភពលោក(WFP)ប្រចាំកម្ពុជា បានចុះហត្ថលេខាលើលិខិតប្តូរសារ ស្តីពីគម្រោងជំនួយឥតសំណង «ការស្តារជីវភារស់នៅ និងលើកកម្ពស់អាហារូបត្ថម្ភនៅក្នុងសហគមន៍ដែលរងផលប៉ះពាល់ដោយជម្លោះព្រំដែន» (ក្នុងភាពជាដៃគូជាមួយ WFP)។ 

ជំនួយនេះ នឹងផ្តល់ជាបណ្ណអង្ករ និងស្បៀងអាហារដល់ប្រជាពលរដ្ឋ ដែលរងផលប៉ះពាល់ដោយជម្លោះព្រំដែន រួមទាំងជនភៀសសឹកកំពុងជ្រកកោននៅតំបន់ភៀសសឹកតាមតំបន់ព្រំដែនរបស់កម្ពុជា ជនភៀសសឹកដែលបានត្រឡប់ទៅលំនៅឋានដើមវិញ និងពលករដែលបានវិលត្រឡប់មកពិប្រទេសថៃវិញផងដែរ។ ក្រៅពីបណ្ណអង្ករ និងស្បៀងអាហារ ថវិកាទាំងអស់នោះ នឹងក្លាយជាចំណែកនៃការកសាងឡើងវិញ នូវហេដ្ឋារចនាសម្ព័ន្ធមូលដ្ឋានដែលខូចខាត និងជួយស្តារជីវភាពរស់នៅ និងកែលម្អអាហារូបត្ថម្ភ៕