រាជធានីភ្នំពេញ៖ លោកជំទាវបណ្ឌិត ពេជ ចន្ទមុន្នី ស្ត្រីទី១នៃកម្ពុជា និងជាអនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅថ្ងៃទី១២កុម្ភៈ ឆ្នាំ២០២៦នេះ បានចុះពិនិត្យវឌ្ឍនភាពគម្រោងវះកាត់បេះដូងកុមារ នៅមន្ទីរពេទ្យកុមារជាតិ។

តាមរយៈការចុះត្រួតពិនិត្យ លោកជំទាវ ពេជ ចន្ទមុន្នី បានសួរសុខទុក្ខកុមារដែលកំពុងសម្រាកព្យាបាលជំងឺ និងបានភ្ជាប់ជាមួយប្រសាសន៍សួរសុខទុក្ខរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី រួមទាំងសម្តេចធិបតី ហ៊ុន ម៉ាណែត ផងដែរ។ ជាមួយគ្នា លោកជំទាវ ថែមទាំងបានជួបសំណេះសំណាលផ្ទាល់ជាមួយក្រុមគ្រូពេទ្យ គិលានុបដ្ឋាក បុគ្គលិកមន្ទីរពេទ្យ ហើយបានអរគុណដល់ក្រុមគ្រូពេទ្យស្ម័គ្រចិត្តរបស់់សមាគមសុខាភិបាលខ្មែរនៅអាម៉េរិក (CHPAA) ដែលកំពុងបម្រើការក្នុងគម្រោងនេះ។ លោកជំទាវ ក៏ជូនពរឱ្យគម្រោងវះកាត់បេះដូងកុមារ ដំណើរការដោយរលូន និងជោគជ័យ។

គួរជម្រាបថា «គម្រោងវះកាត់បេះដូងកុមារ» គឺជាកិច្ចសហប្រតិបត្តិការរវាងមន្ទីរពេទ្យកុមារជាតិ និងសមាគមសុខាភិបាលខ្មែរនៅអាម៉េរិក (CHPAA) ដែលបានប្រកាសដាក់ឱ្យដំណើរការ កាលពីថ្ងៃទី៨កុម្ភៈ ឆ្នាំ២០២៦។ គម្រោងនេះ មានគោលបំណងជួយព្យាបាលដល់កុមារទាំងឡាយដែលមានជំងឺបេះដូងពីកំណើត រួមទាំងជំងឺបេះដូងផ្សេងៗ តាមរយៈព្យាបាលវះកាត់ដោយមិនគិតថ្លៃ សម្រាប់រយៈពេល៣ឆ្នាំ។ គម្រោងនេះ ក៏ជួយបណ្ដុះបណ្ដាលបន្ថែមតាមរយៈការផ្លាស់ប្ដូរបទពិសោធគ្នាទៅវិញទៅមករវាងវេជ្ជបណ្ឌិតកម្ពុជា និងវេជ្ជបណ្ឌិតអាម៉េរិក ការជួយទ្រទ្រង់ផ្នែកឧបករណ៍បច្ចេកទេសវះកាត់ និងការជួយគាំទ្រផ្នែកស្មារតីគ្នាជាដើម៕