បទបរិយា៖ ជាការពិតណាស់ ក្នុងបរិបទភូមិសាស្ត្រនយោបាយក្នុងតំបន់ និងពិភពលោកកំពុងផុយស្រួយដូចពេលបច្ចុប្បន្ន ការពង្រឹងសមត្ថភាពការពារជាតិកាន់តែទំនើបកាន់តែល្អ។ ល្អក៏នៅត្រង់ថា បើប្រទេសមួយមានខែលការពារជាតិគ្រប់សព្វនោះ បច្ចាមិត្តមិនហ៊ានក្អកគ្រហែមដាក់ឡើយ ប៉ុន្តែបើខែលការពារមានភាពចន្លោះប្រហោង នោះសត្រូវនឹងជ្រៀតចូល ហើយវាយកម្ទេចយើងបានមិនខាន។ ថ្ងៃនេះ SBM News ចង់បង្ហាញលោកអ្នកនាងនូវប្រពន្ធការពារដែនសមុទ្ទដ៏ទំនើប រួមមាន នាវាចម្បាំង និងយុទ្ធោបករណ៍ដ៏មានឥទ្ធិពលពីបណ្តាប្រទេសជឿនលឿនមួយចំនួន...។

ដើម្បីការពារអធិបតេយ្យដែនសមុទ្ទពីការចូលលុកលុយឈ្លានពានរបស់បច្ចាមិត្តខាងក្រៅបាន វាជារឿងចាំបាច់ណាស់ដែលយោធាជើងទឹកកម្ពុជា ត្រូវពង្រីកសមត្ថភាពទាំងការ[ការពារ] និងវាយបកទៅខ្មាំងសត្រូវវិញយ៉ាងមានប្រសិទ្ធភាព។ ប្រសិទ្ធភាពនៅពេលនេះ គឺចង់សំដៅលើការត្រៀមយុទ្ធោបករណ៍ សម្ភារសឹក នាវាចម្បាំងទំនើបៗ ចតបញ្ឈរនៅលម្ហសមុទ្ទក្នុងដែនទឹករបស់យើង ដើម្បីឆ្លើយតបទាន់ពេលនូវរាល់បច្ចាមិត្តទាំងហ្លាយណា ដែលហ៊ានស្រាវយុថ្កា ធ្វើនាវាចរចូលមកឈ្លានពាន។ ជាក់ស្តែង កន្លងមក យោធាជើងទឹកថៃបានប្រើប្រាស់នាវាចម្បាំងទំនើបៗ វាយប្រហារ សង្គ្រុបលើដែនទឹកកម្ពុជា នៅខេត្តហោះកុង បង្កឱ្យពលរដ្ឋស៊ីវិលភ័យរត់ភៀសសឹកយ៉ាងតក់ក្រហល់ទាំងកណ្តាលរាត្រី។ ដើម្បីបង្កើនសមត្ថភាពខែលការពារដែនសមុទ្ទ ឱ្យកាន់តែរឹងមាំ តើ​​កម្ពុជាគួរទិញនាវាចម្បាំង ឬសម្ភារសឹកអ្វីខ្លះ ដើម្បីទប់ទល់នឹងការឈ្លានពានរបស់ថៃ ជាថ្មីម្ដងទៀត...?

SBM News សូមបង្ហាញប្រភេទនាវាចម្បាំង បំពាក់ដោយមីស៊ីលកាចសាហាវ និងមានភាពទំនើប ដែលកម្ពុជាគួរពិចារណក្នុងការបញ្ជាទិញ ដើម្បីការពារខ្លួនពីសំណាក់ចោរឈ្លានពានតាមជើងទឹក។ នាវាចម្បាំងដំបូងគេ ដែលសក្តិសមនឹងកម្ពុជាយកមកប្រើ នោះគឺ នាវាចម្បាំង Corvette Type 056A របស់ប្រទេសចិន។ វាត្រូវបានគេប្រសិទ្ធនាមថា ជា «ឆ្លាមបិសាច» ដែលត្រូវបានរចនាឡើងយ៉ាងពិសេសបំផុតសម្រាប់ប្រតិបត្តិការការពារមាត់សមុទ្ទ និងអាចបាញ់កម្ទេចប្រឆាំងនឹងនាវាមុជទឹកបានផងដែរ។ នាវានេះ មានប្រវែង៩០ម៉ែត្រ ទទឹងជាង១១ម៉ែត្រ អាចផ្ទុកទម្ងន់ប្រហែល១៥០០តោន ជាមួយនឹងសមត្ថភាពអាចបំពាក់អាវុធគ្រប់ប្រភេទ ដូចជាមីស៊ីលប្រឆាំងនាវា YJ-83 ប្រព័ន្ធការពារអាកាសរយៈចម្ងាយជិត និងរ៉ាដាចាប់សញ្ញានាវាមុជទឹកជាដើម។ វាអាចអាចធ្វើដំណើរបាន៤៦គីឡូម៉ែត្រក្នុង១ម៉ោង និងមានតម្លៃ១០០លានដុល្លារក្នុង១គ្រឿង។

ចំណែកនាវាចម្បាំងបន្ទាប់នេះ គឺ Houbei Class ប្រភេទ 022។ វាជាឃាតកលាក់មុខក្នុងសមុទ្ទរាក់ ផលិតដោយក្រុមហ៊ុន Hudong-Zhonghua Shipbuilding របស់ចិន។ នាវានេះ មានល្បឿនលឿនដូចផ្លេកបន្ទោរ និងមានរូបរាងប្លែកខុសពីគេ ដោយសារមានរាងជ្រុង ដែលអនុញ្ញាតឱ្យវាមានសមត្ថភាពបំបាំងកាយគេចចេញពីរ៉ាដាសត្រូវបានយ៉ាងងាយស្រួល។ អ្វីដែលគេគ្រប់គ្នាខ្លាចរអារវានោះ គឺថា ជាមួយនឹងសមត្ថភាពផ្ទុកមីស៊ីលប្រឆាំងនាវាដល់ទៅ៨គ្រាប់ និងអាចបាញ់បានចម្ងាយជិត២០០គីឡូម៉ែត្រ សមល្មមដែលកម្ពុជាយកមកប្រើប្រាស់ក្នុងដែនទឹករបស់ខ្លួនដែលមានទំហំតូច ស្រួលវាយលុក និងងាយការពារ ដ្បិតនាវាចម្បាំងរបស់សត្រូវអាចក្លាយជាចំណីរបស់វាបាន ដោយមិនដឹងខ្លួនជាមុន។ ប្រសិនបើកម្ពុជាអាចបញ្ជាទិញវាបានមែននោះ Houbei Class ប្រភេទ 022 នេះ អាចនឹងពួនស្ទាក់ចាប់ចំណីនៅតាមប្រជុំកោះ ករណីចោរឈ្លានពានហ៊ានចូលលុកលុយ។ សូមជម្រាបថា បើយើងបំពាក់អាវុធពេញលេញ វាមានតម្លៃប្រមាណពី៤០ទៅ៥០លានដុល្លារក្នុង១គ្រឿង។

ងាកចេញពីពេជ្ឈឃាតក្នុងទឹករបស់ចិនទាំង២ យើងក្រឡេកទៅមើលសេះសមុទ្ទចម្បាំង Hamilton-class របស់អាម៉េរិកវិញម្ដង។ Hamilton-class អាចផ្ទុកទម្ងន់ ៣២៥០តោន, ប្រវែង១១៥ម៉ែត្រ, ធ្វើដំណើរបាន៥៤គីឡូម៉ែត្រក្នុងម៉ោង។ វាពិតជាមានភាពធន់ណាស់ ព្រោះវាអាចបណ្តែតខ្លូនលើសមុទ្ទបាន៤៥ថ្ងៃជាប់គ្នា ដោយមិនបាច់ចូលច្រាំង។ វាត្រូវបានរចនាឡើងដើម្បីទប់លំនឹងពេលមានរលកធំៗ ព្យុះបោកបក់ខ្លាំងៗយ៉ាងណា ក៏មិនមែនជាឧបសគ្គសម្រាប់សេះសមុទ្ទចម្បាំងមួយក្បាលនេះដែរ។ ប្រសិនបើកម្ពុជាទិញវាបានមែននោះ យោធាជើងទឹកថៃ នឹងត្រូវពិចារណាមិនក្រោម១០០ដងឡើយ មុនពេលហ៊ានចូលលុកលុយឈ្លានពានដែនទឹកកម្ពុជា។ Hamilton-class វាមានទំហំធំ ប្រតិបត្តិការក្នុងសមុទ្ទយូរ និងអាចចុះចតឧទ្ធម្ភាគចក្របានថែមទៀត វាជាកំពែងការពារដែនទឹកដ៏សំខាន់បំផុតមួយរបស់អាម៉េរិក។ សម្រាប់ Hamilton-class ១គ្រឿង មានសមត្ថភាពចម្បាំងពេញលេញ កម្ពុជាត្រូវត្រៀមថវិកាចំណាយចន្លោះពី៣០ទៅ៥០លានដុល្លារឯណោះ។

ចំណែកនាវាចម្បាំងដ៏សក្តិសមមួយទៀត គឺ ខ្យាដំរីពិស Karakurt-class។ វាត្រូវបានផលិតដោយរោងចក្រនាវាល្បីៗជាច្រើននៅរុស្ស៊ី។ វាអាចផ្ទុកទម្ងន់៨០០ ទៅ៨៦០តោន, ល្បឿន៥៦គីឡូម៉ែត្រក្នុង១ម៉ោង ហើយអាចបើកបរបានចម្ងាយ៤៦០០គីឡូម៉ែត្រ និងរស់នៅលើផ្ទៃសមុទ្ទបាន១៥ថ្ងៃ ដោយមិនចាំបាច់ចូលច្រាំង។ Karakurt-class មិនមែនជានាវាចម្បាំងសម្រាប់លម្អដែនសមុទ្ទទេ ប៉ុន្តែវាមានភ្នែកទិព្វ ដោយសារតែវាមានបំពាក់រ៉ាដាទំនើបៗដូចជា៖ Mineral-M និង Pozitiv-M រួមទាំងរ៉ាដាប្រភេទ AESA ជាបច្ចេកវិទ្យាកម្រិតខ្ពស់បំផុតសម្រាប់ចាប់សញ្ញាគូសត្រូវ។ សមត្ថភាពនេះ អាចឱ្យវាមើលឃើញសត្រូវមុន រួចព្រួសមីស៊ីលទៅកម្ទេចគោលដៅបានមួយរំពេច។ វាបំពាក់បំពង់បាញ់បញ្ឈរចំនួន៨ ដែលអាចផ្ទុកមីស៊ីល Kalibr បាញ់បានដល់ដីគោក ពោលគឺមានសមត្ថភាពបាញ់បានចម្ងាយពី១៥០០ដល់២៥០០គីឡូម៉ែត្រ។ នេះមាន័យថា មីស៊ីល Kalibr អាចហោះចេញពីនាវា Karakurt-class នៅកំពង់ផែសមុទ្ទរាម រួចទៅកម្ទេចរាជធានីបាងកកបានយ៉ាងងាយដូចបកចេក។

លើសពីនេះ នាវា Karakurt-class ក៏អាចផ្ទុកមីស៊ីល Oniks ផងដែរ ដែលជាមីស៊ីលប្រឆាំងនាវាលឿនជាងសំឡេង។ មិនតែប៉ុណ្ណោះ ខ្យាដំរីពិស Karakurt-class ក៏មានខែលការពារខ្លួន Pantsir-M ផងដែរ ដែលជាប្រព័ន្ធការពារអាកាសដ៏សាហាវបំផុតរបស់រុស្ស៊ី អាចបាញ់កម្ទេចបានទាំងមីស៊ីល និងយន្តហោះសត្រូវក្នុងពេលតែមួយ។ នាវាចម្បាំងនេះមានទំហំតូច ប៉ុន្តែមានកម្លាំងបាញ់បានឆ្ងាយបំផុត។ ដូច្នេះ វាជម្រើសដ៏ឆ្លាតវៃបំផុត សម្រាប់ការចំណាយថវិកាជាតិឱ្យចំគោលដៅ។ យ៉ាងណា វាមានតម្លៃត្រឹមចន្លោះពី៤០ទៅ៥០លានដុល្លារប៉ុណ្ណោះ។ សូមជម្រាបថា ក្រៅពីនាវាចម្បាំង មីស៊ីលការពារឆ្នេរ ក៏ជាជម្រើសដ៏សក្តិសមសម្រាប់កម្ពុជា ជាពិសេស មីស៊ីល YJ-62 និងមីស៊ីល BrahMos។

មីស៊ីល BrahMos គឺជាឃាតកប្រមាញ់នាវាចម្បាំង ដែលផលិតឡើងរួមគ្នាដោយរុស្ស៊ី-ឥណ្ឌា។ វាជាមីស៊ីលតម្រង់ទិសលឿនជាងគេបំផុតក្នុងលោក ពោលគឺលឿនជាងសំឡេងដល់ទៅ៣ដង និយាយឱ្យខ្លីវាអាចហោះបានក្នុងល្បឿន ៣៧០០គីឡូម៉ែត្រក្នុង១ម៉ោង។ វាជាសុបិនដ៏អាក្រក់របស់នាវាចម្បាំង។ ហេតុអ្វីបានជាវាសក្តិសមសម្រាប់កម្ពុជាទិញយកមកការពារខ្លួនផងដែរ..? សក្តិសម..ក៏នៅត្រង់ថា ប្រសិនបើកម្ពុជាមាន BrahMos ហើយដំឡើងនៅលើដីគោកតាមឆ្នេរសមុទ្ទ នោះនាវាចម្បាំងយោធាថៃ មិនហ៊ានប្រលែងលេងជាមួយវាដាច់ខាត ព្រោះថា បច្ចុប្បន្ន គ្មាននាវាចម្បាំងណាមួយរបស់កងទ័ពជើងទឹកថៃ អាចមានប្រព័ន្ធការពារទប់ទល់នឹងមីស៊ីល ដែលមានល្បឿនលឿនជាងសំឡេងរហូតដល់៣ដងនោះទេ ខណៈនាវាឈ្លានពានរបស់ក្រុមបច្ចាមិត្ត អាចចូលបានត្រឹមក្នុងរង្វង់ចន្លោះពី៣០០ទៅ៥០០គីឡូម៉ែត្រ នោះវា នឹងក្លាយជាចំណីរបស់ឃាតកប្រមាញ់នេះជាក់ជាមិនខាន។ មីស៊ីលនេះ មានតម្លៃប្រហែល៣,៥ទៅ៥លានដុល្លារក្នុងមួយគ្រាប់ ឬប្រហែល២៥០លានដុល្លារសម្រាប់មួយប្រព័ន្ធការពារឆ្នេរ។

ចុងក្រោយគេ គឺ នាគរាជយាមផ្ទះ YJ-62៖ វាជាប្រព័ន្ធមីស៊ីលការពារឆ្នេររយៈចម្ងាយឆ្ងាយរបស់ប្រទេសចិន។ វាក៏មានសមត្ថភាពមិនធម្មតាដែរ មិនធម្មតា ព្រោះវាអាចផ្ទុកជាតិផ្ទុះខ្លាំងដែលអាចកម្ទេចនាវាចម្បាំង១គ្រឿងឱ្យលិចចូលទៅក្នុងមហាសាគរភ្លាមៗ។ វាមានទម្ងន់៣០០គីឡូក្រាម ខ្លាំងល្មមនឹងធ្វើឱ្យនាវាទម្ងន់៧០០០តោន លិចត្រឹមតែប្រើ ១គ្រាប់ប៉ុណ្ណោះ។ វាមានតម្លៃប្រហែល២លានដុល្លារក្នុងមួយគ្រាប់។ សូមបញ្ជាក់ថា នេះគឺជានាវាចម្បាំង ទាំង៤ប្រភេទ និងមីស៊ីល២ប្រភេទ ក្នុងចំណោមសព្វាវុធផ្សេងៗ សម្រាប់កងទ័ពជើងកម្ពុជា និងមន្ត្រីរាជរដ្ឋាភិបាលពិចារណាទិញ ដើម្បីពង្រឹងកំពែងការពារឆ្នេរ និងដែនសមុទ្ទកម្ពុជា ចេញពីក្រញ៉ាំចោរឈ្លានពានទឹកដី៕