រដ្ឋធានីហាណូយ៖ វៀតណាមគឺជាឃ្លាំងសព្វាវុធរុស្ស៊ីដ៏សំខាន់បំផុតមួយនៅអាស៊ីគ្នេយ៍ជាមួយនឹងការបំពាក់នូវយន្តហោះចម្បាំងយ៉ាងពេញលេញដូចជា Su-22, Su-27, Su-30 និង Yak-130។ យ៉ាងណា ថ្មីៗនេះ វៀតណាមបានប្រកាសពីផែនការធ្វើពិពិធកម្មការផ្គត់ផ្គង់អាវុធដោយខ្លួនឯង និងប្រកាសឈានជើងចូលទៅក្នុងពិភពបច្ចេកវិទ្យាយោធាលោកខាងលិច និងសហរដ្ឋអាម៉េរិក ដើម្បីកាត់បន្ថយការពឹងផ្អែក និងផ្តេកផ្តួលលើអាវុធរុស្ស៊ី។ នេះបង្ហាញឱ្យឃើញថា រុស្ស៊ីហាក់ដូចជាកំពុងបាត់បង់ទីផ្សារអាវុធដ៏ធំបំផុតរបស់ខ្លួននៅអាស៊ីអាគ្នេយ៍ជាបណ្តើរៗហើយ...។
របាយការណ៍ថ្មីៗបង្ហាញថា រដ្ឋធានីហាណូយ និងបារាំង សម្រេចបានវឌ្ឍនភាពក្នុងកិច្ចចរចាលើការទិញពេជ្ឈឃាតចម្បាំងលើមេឃ Dassault Rafale ដ៏មានសក្តានុពល នេះបើយោងតាមរបាយការណ៍ចេញផ្សាយដោយ Defense Express។ ជាមួយគ្នានេះ ការសម្រេចដើរចេញពីឃ្លាំងសព្វាវុធរបស់រុស្ស៊ីនេះ ក៏កំពុងប៉ះពាល់ដល់ផ្នែកផ្សេងទៀតនៃការធ្វើទំនើបកម្មយោធារបស់វៀតណាមផងដែរ។ ជាក់ស្តែង ជំនួសឱ្យការទទួលបានរថក្រោះចម្បាំងសំខាន់ៗ ដូចជា T-90S វៀតណាមបានជ្រើសរើសធ្វើឱ្យប្រសើរឡើងនូវរថក្រោះ T-54 និង T-55 ចាស់ៗរបស់ខ្លួន ដោយមានជំនួយគាំទ្រពីអ៊ីស្រាអែល។ គេនៅចាំបានថា រដ្ឋធានីហាណូយ ធ្លាប់បានបញ្ជាទិញយុទ្ធោបករណ៍របស់សហរដ្ឋអាម៉េរិក ដែលមានតម្លៃប្រហែល៤០០លានដុល្លារ រួមទាំងនាវាឆ្មាំសមុទ្ទ និងយន្តហោះហ្វឹកហាត់ ហើយនៅក្នុងផែនការនោះ ក៏មានការបញ្ជាទិញយន្តហោះដឹកជញ្ជូនយោធា C-130J ផងដែរ។
លើសពីនេះ វៀតណាមក៏បានធ្វើកិច្ចពិភាក្សាជាមួយសហរដ្ឋអាម៉េរិកទាក់ទងនឹងការទិញយន្តហោះចម្បាំង F-16 ផងដែរ។ ទោះជាយ៉ាងណា អ្នកវិភាគកត់សម្គាល់ថា មិនទាន់មានវឌ្ឍនភាពជាក់ស្តែងណាមួយ ត្រូវបានសម្រេចបាននៅក្នុងកិច្ចពិភាក្សាទាំងនេះនៅឡើយទេ។ អ្នកជំនាញសង្កត់ធ្ងន់ថា ការងាកចេញពីយន្តហោះចម្បាំងរុស្ស៊ី ទៅកាន់លោកខាងលិច នឹងតម្រូវឱ្យវៀតណាមកសាងឡើងវិញនូវហេដ្ឋារចនាសម្ព័ន្ធអាកាសយានដ្ឋានរបស់ខ្លួនឱ្យធំទូលាយជាងមុន និងបង្កើតឃ្លាំងស្តុកអាវុធដែនអាកាសថ្មីបន្ថែមទៀត។ ក្រៅពីនេះ វៀតណាមក៏បានបញ្ជាទិញប្រព័ន្ធកាំភ្លើងធំស្វ័យប្រវត្តិ K9 ទំហំ១៥៥មីលីម៉ែត្រពីកូរ៉េខាងត្បូងផងដែរ។ ទាំងនេះ យើងអាចទាញសេចក្តីសន្និដ្ឋានបានថា វៀតណាមកំពុងប្រាប់ពិភពលោកថា ខ្លួនលែងចង់ជ្រកក្រោមឥទ្ធិពលអាវុធរបស់រុស្ស៊ី ដែលកំពុងជាប់ផុងក្នុងសង្គ្រាមនៅអ៊ុយក្រែនទៀតហើយ ប៉ុន្តែខ្លួនចង់ក្លាយជាកម្លាំងយោធាដ៏រឹងមាំមួយ ដោយពឹងលើដង្ហើមខ្លួនឯង៕
