សុខភាព៖ ស្វាយនៅស្រុកខ្មែរ គឺសម្បូរងាយស្រួលរកទិញមិនថា ផ្លែស្វាយខ្ចី និងទុំ ដោយភាគច្រើនក្មេងៗចូលចិត្តស្វាយខ្ចីញ៉ាំជាមួយអំបិលម្ទេស ចំណែកចាស់ៗចូលចិត្តស្វាយទុំ បរិភោគជាមួយបាយ ហើយការដែលទទួលទានស្វាយនេះ គឺរាងកាយនឹងទទួលបានគុណប្រយោជន៍ ដូចខាងក្រោម...។
១.ជួយសុខភាពភ្នែក៖ សារធាតុប្រឆាំងអុកស៊ីតកម្ម Lutein និង Zeaxanthin ក្នុងផ្លែស្វាយជួយច្រើនដល់ភ្នែក ដូចជា៖ ជួយការពាររ៉េទីន កែវភ្នែក បង្កើនចម្ងាយសម្លឹងមើល និងកាត់បន្ថយរយៈពេលដែលភ្នែកសម្របទៅនឹងសម្ពាធនៃពន្លឺ។ ២.ការពារជំងឺមហារីក៖ ផ្លែស្វាយមានសារធាតុប្រឆាំងអុកស៊ីតកម្ម ការពារកោសិកា ចេញពីការបំផ្លាញដោយ DNA ដែលអាចបណ្ដាលឱ្យកើតជំងឺមហារីក និងជំងឺទឹកនោមផ្អែម។ ក្នុងការសិក្សាលើសត្វ សារធាតុប្រឆាំងអុកស៊ីតកម្មរបស់ស្វាយ ពិតជារារាំងកំណើនកោសិកាមហារីកសុដន់មែន។
៣.បង្កើនមុខងារប្រព័ន្ធការពារ៖ ទឹកផ្លែស្វាយ សម្បូរដោយវីតាមីន A ជាសារធាតុបំប៉នសំខាន់ជួយដល់មុខងាររបស់ប្រព័ន្ធការពារ រួមទាំងការផលិត និងសកម្មភាពរបស់កោសិកាឈាមស។ កង្វះវីតាមីន A ក្នុងរាងកាយពាក់ព័ន្ធជាមួយការងាយឆ្លងមេរោគ ដូច្នេះ ក្នុងរបបអាហារប្រចាំថ្ងៃគួរមានស្វាយ។ ៤.ជួយកម្រិតជាតិស្ករក្នុងឈាម៖ ការសិក្សារយៈពេល១២សប្ដាហ៍ លើបុរសមានជំងឺធាត់២០នាក់ និងស្ត្រី១០នាក់ ដោយឱ្យទទួលទានដំណាប់ស្វាយ១០ក្រាមរាល់ថ្ងៃ។ ចុងក្រោយ រកឃើញថា អ្នកចូលរួមមានកម្រិតជាតិស្ករទាបក្នុងឈាម អំឡុងពេលសិក្សា។ អ្នកសិក្សា សង្ស័យថា សមាសធាតុជីវសកម្ម (Bioactive) ក្នុងផ្លែស្វាយ រួមទាំងសារធាតុប្រឆាំងអុកស៊ីតកម្ម ជួយក្នុងកម្រិតជាតិស្ករក្នុងឈាម។
៥.ជួយសុខភាពស្បែក និងសក់៖ វីតាមីន A ក្នុងផ្លែស្វាយ ក៏សំខាន់ផងដែរ ជួយបង្កើត និងរក្សាជាលិកា Epithelial មាននៅក្នុងស្បែក សក់ និងក្រពេញក្រោមស្បែក Sebaceous។ ក្នុងការសិក្សាលើសត្វ ក៏រកឃើញថា កង្វះវីតាមីន A ពាក់ព័ន្ធនឹងការជ្រុះសក់។ លើសពីនេះ ផ្លែស្វាយ ក៏សម្បូរវីតាមីន C ដែរ គឺសម្រាប់ផលិតខូឡាជេន ជួយដល់ស្បែក និងបង្ការស្នាមជ្រួញ។ ៦.បំបាត់ការទល់លាមក៖ ក្នុងការសិក្សាមួយ លើមនុស្សមានជំងឺទល់លាមក រកឃើញថា ការញ៉ាំផ្លែស្វាយជួយព្យាបាលជំងឺនេះ ជាងការផឹកថ្នាំជាតិសរសៃទៅទៀត ព្រោះផ្លែស្វាយ អាចជួយកម្ចាត់ឧស្ម័ន និងការហើមពោះ ដែលជារោគសញ្ញាជំងឺពោះវៀន៕ ដកស្រង់ពី៖ Hello គ្រូពេទ្យ
