សុខភាព៖ ផ្លែស្វាយ ជាផ្លែឈើមួយប្រភេទដែលរសជាតិជូរផ្អែម ឈ្ងុយឆ្ងាញ់ គេអាចយកវាមកច្នៃសម្រាប់បរិភោគបានច្រើនយ៉ាងដូចជា ទទួលទានផ្លែទុំស្រស់ កិនក្រឡុកជាទឹកស្វាយ ឬចម្អិនកូរធ្វើជាដំណាប់ក៏បាន។ លើសពីនេះ ផ្លែស្វាយបានផ្តល់ អត្ថប្រយោជន៍៦យ៉ាង ដល់រាងកាយរាល់ពេលលោកអ្នកបានទទួលទាន…។
១-បំបាត់ការទល់លាមក៖ ក្នុងការសិក្សាមួយលើមនុស្សមានជំងឺទល់លាមករកឃើញថា ការបរិភោគផ្លែស្វាយជួយព្យាបាលជំងឺនេះ ជាងការផឹកថ្នាំជាតិសរសៃទៅទៀត។ លើសពីនេះ ផ្លែស្វាយ អាចជួយកម្ចាត់ឧស្ម័ន និងការហើមពោះដែលជារោគសញ្ញាជំងឺពោះវៀន។ ២-ការពារជំងឺមហារីក៖ តាមការសិក្សាសារធាតុប្រឆាំងអុកស៊ីតកម្មរបស់ស្វាយ ពិតជាបានរារាំងកំណើនកោសិកាមហារីកសុដន់មែន។ ៣-បង្កើនមុខងារប្រព័ន្ធការពារ៖ ទឹកផ្លែស្វាយ សម្បូរដោយវីតាមីន A ជាសារធាតុបំប៉នសំខាន់ ជួយដល់មុខងាររបស់ប្រព័ន្ធការពារ រួមទាំងការផលិត និងសកម្មភាពរបស់កោសិកាឈាម-ស។
៤-ជួយសុខភាពភ្នែក៖ សារធាតុប្រឆាំងអុកស៊ីតកម្ម លូទីន (Lutein) និងហ្សេសានធីន (Zeaxanthin) មានក្នុងផ្លែស្វាយជួយដល់ភ្នែកដូចជា ជួយការពាររ៉េទីន កែវភ្នែក បង្កើនចម្ងាយសម្លឹងមើល និងកាត់បន្ថយរយៈពេលដែលភ្នែកសម្របទៅនឹងសម្ពាធនៃពន្លឺ។ ៥-ជួយសុខភាពស្បែក និងសក់៖ វីតាមីន A ក្នុងផ្លែស្វាយ ជួយបង្កើត និងរក្សាជាលិកាដែលមាននៅក្នុងស្បែក សក់ និងក្រពេញក្រោមស្បែក។ លើសពីនេះ ផ្លែស្វាយក៏សម្បូរវីតាមីន C ដែរ ដោយសារធាតុបំប៉ននេះ ចាំបាច់សម្រាប់ផលិតខូឡាជេនជួយដល់ស្បែក និងបង្ការស្នាមជ្រួញ។
៦-ជួយកម្រិតជាតិស្ករក្នុងឈាម៖ ការសិក្សារយៈពេល១២សប្ដាហ៍ លើបុរសមានជំងឺធាត់២០នាក់ និងស្ត្រី១០នាក់ ដោយឱ្យញ៉ាំដំណាប់ស្វាយ១០ក្រាមរាល់ថ្ងៃ។ លទ្ធផលឃើញថា អ្នកទាំងនេះ មានកម្រិតជាតិស្ករទាបក្នុងឈាមដែលអាចមកពីសមាសធាតុជីវសកម្មក្នុងផ្លែស្វាយ និងសារធាតុប្រឆាំងអុកស៊ីតកម្ម ជួយក្នុងការកម្រិតជាតិស្ករក្នុងឈាម៕ ដកស្រង់ពី៖ Hello គ្រូពេទ្យ
