រាជធានីបាងកក៖ ស្រមោលអំពើពុករលួយកំពុងគ្របដណ្ដប់លើការបោះឆ្នោតនៅប្រទេសថៃ បន្ទាប់ពីកាមេរ៉ាសុវត្ថិភាពត្រូវបានគេបិទបាំង និងរារាំងមិនឱ្យសង្កេតការរាប់សន្លឹកឆ្នោត សិស្សនិស្សិត និងអ្នកស្រុកខេត្តបទុមធានី(ปทุมธานี)រាប់រយនាក់ បានផ្ទុះកំហឹងយ៉ាងខ្លាំង និងចេញមុខធ្វើបាតុកម្មតវ៉ាទាមទារឱ្យរាប់សន្លឹកឆ្នោតឡើងវិញ ដើម្បីវែករកភាពមិនប្រក្រតី ដែលកំពុងបង្កប់ក្នុងប្រព័ន្ធបោះឆ្នោតនៅប្រទេសថៃ។ នេះបើតាមការចុះផ្សាយដោយកាសែតថៃនាព្រឹកថ្ងៃទី៩កុម្ភៈនេះ...។
កាលពីយប់ថ្ងៃទី៨ ខែកុម្ភៈ សិស្សនិស្សិត និងសាធារណជនជាង៣០០នាក់ បានប្រមូលផ្តុំគ្នានៅសាលប្រជុំនៃសាកលវិទ្យាល័យ (Rajamangala University of Technology Thanyaburi) ជាកន្លែងត្រូវបានគេប្រើជាមជ្ឈមណ្ឌលរាប់សន្លឹកឆ្នោត។ ក្រុមអ្នកតវ៉ា បានប្រឈមមុខនឹងមន្ត្រីបោះឆ្នោត ដោយបានថតវីដេអូឃ្លីបជាភស្តុតាង នៃអ្វីដែលពួកគេបានពិពណ៌នាថា «ខ្វះតម្លាភាព»។ យោងតាមក្រុមអ្នកតវ៉ា ក្រុមអ្នកសង្កេតការណ៍វ័យក្មេងប្រហែល៦នាក់ បានព្យាយាមចូលទៅក្នុងទីតាំងរាប់សន្លឹកឆ្នោត ប៉ុន្តែត្រូវបានគេហាមឃាត់ ដោយលើកឡើងពីការរំខានដល់ប្រតិបត្តិការ រួចក៏ដេញឱ្យពួកគេចាកចេញពីទីតាំងនោះ។
ក្រោយមក អ្នកសង្កេតការណ៍សុំមើលដំណើរការរាប់សន្លឹកឆ្នោត ស្រាប់តែមន្រ្តីប្រាប់ថា សន្លឹកឆ្នោតត្រូវបានរាប់រួចហើយ ខណៈប្រអប់បិទជិតធ្វើឱ្យការផ្ទៀងផ្ទាត់មិនអាចទៅរួចទេ។ ក្រុមអ្នកតវ៉ា ក៏បានចោទប្រកាន់ថា កាមេរ៉ាសុវត្ថិភាព ឬCCTV ត្រូវបានបិទ និងគ្របដោយក្រណាត់ពណ៌ខ្មៅ។ គួរបញ្ជាក់ថា ការរារាំងមិនឱ្យមើលការរាប់សន្លឹកឆ្នោត និងការយកក្រណាត់ខ្មៅទៅគ្របលើកាមេរ៉ាសុវត្ថិភាព គឺជាភស្តុតាងបង្ហាញយ៉ាងប្រត្យក្សថា ដំណើរការនៃការរាប់សន្លឹកឆ្នោតនៅប្រទេសថៃ ត្រូវបានធ្វើឡើងក្នុងលក្ខណៈ«អាថ៌កម្បាំង និងគួរឱ្យសង្ស័យ»។ នេះបើតាមការអះអាងរបស់ក្រុមនិស្សិត៕
