សុខភាព៖ តែកូវជី (Goji berry) មានពណ៌ស្រស់ស្អាត គ្មានជាតិកាហ្វេអ៊ីន និងមានរសជាតិផ្អែមតិចៗ លើសពីនេះ មានគុណប្រយោជន៍១០យ៉ាងដល់សុខភាពរាងកាយ  SBM News នឹងលើកយកអត្ថប្រយោជន៍ទាំងនោះ មកជម្រាបជូនលោកអ្នកឱ្យបានជ្រាប…។

១.ជំនួយសុខភាពបេះដូង៖ កូវជី មានសមត្ថភាពបញ្ចុះកូឡេស្តេរ៉ុលបានរហូតដល់ ៧០ភាគរយ ហើយ​ក៏ជួយកាត់បន្ថយ​ទ្រីគ្លីសេរីដ​ដែរ មួយវិញទៀត ជួយការពារប្រឆាំងនឹងកូលេស្តេរ៉ុលអាក្រក់ (LDL)។ ២.ជំនួយស្បែក៖ បេតាការ៉ូទីន ក្នុងកូវជីបន្ថយពន្យារភាពចាស់នៃស្បែក និងបន្ថយការខូចខាតស្បែកពីពន្លឺកាំរស្មីយូវី ល្អ​សម្រាប់អ្នកដែលមានស្បែកងាយប្រតិកម្ម ងាយនឹងត្រូវកម្តៅថ្ងៃ។ បេតាខារ៉ូទីន ​បង្កើតពន្លឺធម្មជាតិដែលធ្វើឱ្យស្បែកស្រស់ស្អាត និងក្មេងជាងវ័យ។ ៣.ពង្រឹងប្រព័ន្ធការពាររាងកាយ៖ កូវជី ផ្ទុកវីតាមីន C ខ្ពស់ ជាវីតាមីនជួយបង្កើនប្រព័ន្ធការពាររាងកាយ ព្រោះអាចជួយ​ជំរុញ​ការ​ផលិត​កោសិកាឈាមស។ ៤.ជំនួយសុខភាពថ្លើម៖ កូវជី ជួយការពារថ្លើមពីការបំផ្លាញរបស់ជាតិពុល និងកាកសំណល់កោសិកានៅលើ DNA ខ្លាញ់ប្រូតេអ៊ីន និងសមាសធាតុសំខាន់ៗដទៃទៀតនៃកោសិកា។

៥.ជំនួយភ្នែក៖ កូវជីសម្បូរទៅដោយវីតាមីន A ដែលល្អចំពោះភ្នែក និងកាត់បន្ថយការចុះខ្សោយនៃភ្នែក។ ៦.ជួយការពារជំងឺទឹកនោមផ្អែម៖ ការស្រាវជ្រាវបានបង្ហាញថា តែកូវជី អាចជួយឱ្យរាងកាយគ្រប់គ្រងការបញ្ចេញជាតិគ្លុយកូស និងអាំងស៊ុយលីន។ ៧.ការពារពីជំងឺមហារីក៖ តែកូវជី មានសារធាតុប្រឆាំងអុកស៊ីតកម្ម ដែលការពារអុកស៊ីតកម្មរបស់កោសិកា បន្ថយ​ហានិភ័យ​នៃជំងឺមហារីក ប្រឆាំងរ៉ាឌីកាល់សេរី និងការពារការខូចខាត DNA។ ៨.ជួយសម្រកទម្ងន់៖ កូវជីមានជាតិសរសៃខ្ពស់ ដែលអាចធ្វើឱ្យមានអារម្មណ៍ឆ្អែតបានយូរ។ តែកូវជី​ ក៏ជួយ​ដល់ការ​ដុត​រំលាយអាហារដែលជួយជំរុញដល់ការសម្រកទម្ងន់។ ៩.ធ្វើឱ្យអាម្មណ៍ល្អ៖ សារធាតុសកម្មនៅក្នុងកូវជីមានឥទ្ធិពលលើអ័រម៉ូននៅក្នុងរាងកាយ អាចជួយធ្វើឱ្យអារម្មណ៍មានតុល្យភាព ការពារការថប់បារម្ភ និងជំងឺធ្លាក់ទឹកចិត្ត។ 

១០.ប្រឆាំងភាពចាស់៖ កូវជីមានផ្ទុកសារធាតុប្រឆាំងអុកស៊ីតកម្ម (phytochemicals) ដែលអាចពន្យារភាពចាស់។ ការស្រាវជ្រាវបង្ហាញថា សារធាតុនេះ ជួយការពារអុកស៊ីតកម្ម DNA និងជួយស្តារ DNA ដែល​ខូច។ រីឯវិធីឆុងគឺចាក់ទឹកក្ដៅមួយពែងចូលក្នុងកែវ ដែលមានកូវជីកន្លះស្លាបព្រាបាយ រួចទុក៥នាទី ហើយ​ត្រូវញ៉ាំទាំងកាក ទើបទទួលបានអត្ថប្រយោជន៍ពេញលេញ។ តែយ៉ាងណា បើទោះបីជាតែកូវជីផ្តល់ប្រយោជន៍ដល់សុខភាពច្រើន តែក៏មានផលប៉ះពាល់ដែរ រួមមាន៖ កូវជីមានផ្ទុកសារធាតុ betaine ជាសារធាតុគីមីដែលអាចបង្កឱ្យរលូតកូន ដូច្នេះ​ស្ត្រី​មាន​​ផ្ទៃពោះមិនគួរញ៉ាំ។ ប្រសិនកំពុងប្រើថ្នាំបញ្ចុះសម្ពាធឈាម ឬថ្នាំបន្ថយជាតិស្ករ ក៏មិនគួរកុំញុំដែរ ​ ព្រោះកូវជីមានឥទ្ធិពលស្រដៀងគ្នានឹងថ្នាំទាំងនេះដែរ អាច​បណ្ដាល​កម្រិតជាតិស្ករធ្លាក់កាន់តែខ្លាំង។ លើសពីនេះ បើអ្នកមានបញ្ហាក្រពះ-ពោះវៀន ក៏មិនត្រូវញុំតែកូវជី។ មួយទៀត ញ៉ាំកុំឱ្យលើស២៨ក្រាម ឬ២ស្លាបព្រាបាយក្នុងមួយថ្ងៃ និងកុំពិសារពេលយប់ ព្រោះបណ្ដាលឱ្យគេងមិនលក់៕ ដកស្រង់ពី៖ Hello គ្រូពេទ្យ