សុខភាព៖ ការ៉ុត ជាប្រភេទបន្លែដែលអាចទទួលទានបានទាំងឆៅ និងចម្អិនឱ្យឆ្អិនក្នុងសម្ល ឬក្រឡុកធ្វើជាភេសជ្ជៈក៏បានដែរ។ ការទទួលទានការ៉ុតឆៅ និងចម្អិន សុទ្ធសឹងផ្ដល់អត្ថប្រយោជន៍ដល់សុខភាពរហូតដល់ទៅ៨យ៉ាងឯណោះ។ ចំពោះគុណប្រយោជន៍ទាំងនោះ SBM News នឹងជម្រាបជូនលោកអ្នកបានជ្រាបដូចតទៅ…។

១.ជួយកាត់បន្ថយហានិភ័យជំងឺបេះដូង៖ ការសិក្សាមួយរបស់អ្នកវិទ្យាសាស្រ្តនៅប្រទេសហូឡង់ បានពិនិត្យមើលលើក្រុមបន្លែ និងផ្លែឈើ ជួយការពារដល់បេះដូង ដោយអ្នកស្រាវជ្រាវរកឃើញថា ការ៉ុត ពាក់ព័ន្ធជាមួយហានិភ័យទាបជាង ៣២ភាគរយ នៃការកើតជំងឺបេះដូង។ ២.ជួយដល់ប្រព័ន្ធការពារ៖ វីតាមីន C ក្នុងការ៉ុត គឺសំខាន់ណាស់ចំពោះប្រព័ន្ធការពារ និងការព្យាបាល។ ចំណែកវីតាមីន A ក្នុងការ៉ុត ក៏ជួយដល់ប្រព័ន្ធការពារក្នុងការកម្ចាស់បាក់តេរី ចេញពីរាងកាយដែរ។ ៣.ជួយរក្សាតុល្យភាពជាតិស្ករក្នុងឈាម៖ ជាតិសរសៃក្នុងការ៉ុត ជួយរក្សាកម្រិតជាតិស្ករក្នុងឈាម កម្រិតអាំងស៊ុយលីន និងសុខភាពផ្លូវដង្ហើម។

៤.ជួយភ្នែក៖ ការ៉ុត សម្បូរទៅដោយវីតាមីន A ជួយដល់ភ្នែក។ បើវីតាមីន A ក្នុងខ្លួនធ្លាក់ចុះ វាបង្កឱ្យមានភាពមិនប្រក្រតីដល់កែវភ្នែក ហើយធ្វើឱ្យមើលមិនឃើញអ្វីនៅពេលយប់។ ចំណែក សារធាតុអុកស៊ីតកម្ម Lutein និងZeaxanthin ក្នុងការ៉ុតក៏ជួយសុខភាពដល់ភ្នែកដែរ។ ៥.ជាអាហារបំប៉ន៖ ការ៉ុត ជាអាហារបំប៉ន មានវីតាមីន B និងវីតាមីន K ជួយការពារការរលាក សុខភាពខួរក្បាល និងថ្លើម និងបង្កើនថាមពល។ ៦.ជួយរក្សាទម្ងន់៖ ក្នុងការ៉ុត១មើម មានជាតិទឹករហូតដល់៨៨ភាគរយ ហើយការ៉ុតមានកាល់ឡូរីទាបមែនទែន ដោយទឹកការ៉ុត១កែវ មានត្រឹមតែ៥២កាល់ឡូរីប៉ុណ្ណោះ ដូច្នេះ ការទទួលទានការ៉ុតមិនបង្កឱ្យឡើងទម្ងន់ទេ។

៧.ជួយកាត់បន្ថយហានិភ័យមហារីក៖ សារធាតុអុកស៊ីតកម្មក្នុងការ៉ុត ពាក់ព័ន្ធនឹងការកាត់បន្ថយហានិភ័យនៃជំងឺមហារីកជាច្រើនប្រភេទ ដូចជា មហារីកសួត ក្រពេញប្រូស្ដាត និងឈាម។ ការសិក្សាមួយនៅក្នុងកាសែតអាហារបំប៉នរបស់អាម៉េរិក American Journal of Clinical Nutrition រកឃើញថា អ្នកបរិភោគសារធាតុអុកស៊ីដង់ Carotenoid មានហានិភ័យទាបជាង២១ភាគរយ ប្រឈមនឹងមហារីកសួត។ ៨.ជួយដល់សម្ពាធឈាម៖ ជាតិប៉ូតាស្យូម ក្នុងការ៉ុត មានមុខងារសំខាន់ជួយដល់សម្ពាធឈាម ដោយរក្សាតុល្យភាពកម្រិតជាតិសូដ្យូម និងសម្អាតជាតិសូដ្យូម ចេញពីរាងកាយដែលជួយដល់ដំណើរការរបស់បេះដូង៕ ដកស្រង់ពី៖ Hello គ្រូពេទ្យ