សុខភាព៖ ការគិតច្រើននៅពេលយប់ ភាគច្រើនបណ្ដាលមកពីដំណើរការខួរក្បាលរំឭកដល់ហេតុការណ៍ដែលបានកើតឡើងនៅពេលថ្ងៃ ឬដល់ហេតុការណ៍ណាមួយកើតឡើងក្នុងជីវិតដែលមិនអាចបំភ្លេចបាន។ មួយវិញទៀត នៅពេលថ្ងៃរវល់នឹងការងារ ហេតុនេះហើយ ខួរក្បាលមិនសូវមានពេលទំនេរគិតដល់ហេតុការណ៍អស់នោះទេ។ ដើម្បីអាចឱ្យឆាប់គេងលក់លោកអ្នក អាចសាកវិធីដែលបានរៀបរាប់ដូចខាងក្រោម...។
១.ដកដង្ហើមវែងៗ៖ ការដកដង្ហើមវែងៗ ជាវិធីមួយដែលអាចបន្លប់អារម្មណ៍ដ៏មានប្រសិទ្ធភាព ពិសេសពេលដកដង្ហើមបណ្ដើររាប់លេខបណ្ដើរ។ ពេលចាប់ផ្ដើមដកដង្ហើមចូលរាប់ពី១ដល់៣ យឺតៗ រួចដកដង្ហើមចេញរាប់ពី១ដល់៥យឺតៗ ហើយព្យាយាមផ្ដោតអារម្មណ៍ទៅលើការដកដង្ហើមនោះ កុំឱ្យបែកអារម្មណ៍។ ២.ដុតប្រេងក្រអូប៖ ការដុតប្រេងក្រអូបនៅក្នុងបន្ទប់ ជួយសម្រួលអារម្មណ៍ និងបង្កើតបរិយាកាសស្ងប់ស្ងាត់ធូរស្រាល ពិសេសប្រេងក្រអូបក្លិនផ្កាទ្បាវែនដ័រ(Lavender) ប៉ុន្តែត្រូវប្រយ័ត្ននៅពេលប្រើប្រេងក្រអូប ព្រោះវាអាចបង្កឱ្យអាលែកហ្ស៊ីបាន។
៣.ឈប់ប្រើទូរសព្ទ ឬកុំព្យូទ័រ៖ ការប្រើទូរសព្ទ ឬកុំព្យូទ័រ មុនពេលចូលគេង អាចបង្កើនកម្រិតថប់បារម្ភ និងស្ត្រេស ពិសេសពេលបានមើលរឿង ឬព័ត៌មានរន្ធត់ធ្វើឱ្យអារម្មណ៍ខ្លាចលើសដើម។ លើសពីនេះ ពន្លឺរបស់គ្រឿងអេឡិចត្រូនិកទាំងនោះ ប៉ះពាល់ទៅដល់ផលិតកម្ម (មេទ្បាតូនីន) melatonin នៅក្នុងរាងកាយបណ្ដាលឱ្យពិបាកគេងលក់។ ៤.បន្លប់ខ្លួនឯង៖ បន្ទាប់ពីទុកគ្រឿងអេឡិចត្រូនិកអស់នោះចោលហើយ យើងអាចធ្វើសកម្មភាពអ្វីផ្សេងទៀត ដើម្បីបន្លប់ខ្លួនឯងឱ្យឆាប់ងងុយគេង។ អាចបែរទៅអានសៀវភៅប្រលោមលោក សៀវភៅត្លុក ឬអង្គុយសរសេរកំណត់ពីអ្វីដែលបានកើតឡើងពេលថ្ងៃក៏បាន។ ការធ្វើសកម្មភាពបែបនេះ អាចជួយបន្លប់ខួរក្បាលមិនគិតច្រើន និងជួយឱ្យគេងបានលក់ស្រួល៕ អត្ថបទដោយ៖ Hello គ្រូពេទ្យ
