រាជធានីភ្នំពេញ៖ រដ្ឋាភិបាលឥណ្ឌា នៅថ្ងៃទី២ ខែកុម្ភៈ ឆ្នាំ២០២៦នេះ បានផ្ដល់ជំនួយឥតសំណងចំនួន៩៩២៥៥​ដុល្លារអាម៉េរិក​ដល់ប្រទេសកម្ពុជា…។

ជំនួយឥតសំណងរបស់ឥណ្ឌាផ្ដល់ជូនកម្ពុជា នឹងត្រូវយកទៅប្រើប្រាស់លើការងារ​ពង្រឹងសមត្ថភាព​តាមដានអាកាសធាតុ​​ នៅ​ក្នុងខេត្តសៀមរាប ដើម្បី​ជួយដល់សុខុមាលភាពសាធារណៈ និងសេដ្ឋកិច្ចក្នុងតំបន់។ កិច្ចព្រមព្រៀងប្រគល់ និងទទួលជំនួយខាងលើ ត្រូវបានចុះហត្ថលេខាដោយលោក ប៊ុន ហ៊ាន​ រដ្ឋលេខាធិការ​ក្រសួងធនធានទឹក និង​ឧតុនិយម និងលោក វ៉ាន់ឡាល់វ៉ាវណា បាវីតលុង (Vanlalvawna Bawitlung) ឯកអគ្គរដ្ឋទូតឥណ្ឌាប្រចាំកម្ពុជា​ ក្រោមអធិបតីភាព លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម។ តាមរយៈឯកអគ្គរដ្ឋទូតឥណ្ឌា លោក ថោ ជេដ្ឋា បានស្វាគមន៍ និងថ្លែងអំណរគុណដល់រដ្ឋាភិបាលនៃសាធារណរដ្ឋឥណ្ឌា ដែលជានិច្ចកាលតែងផ្តល់ជំនួយគាំទ្រទាំងសម្ភារ និងថវិកាជួយដល់កម្ពុជា ជាពិសេស កិច្ចសហប្រតិបត្តិការយ៉ាងល្អលើវិស័យធនធានទឹក និងឧតុនិយម។

រដ្ឋមន្រ្តីធនធានទឹក ក៏បានបញ្ជាក់ជំហរក្នុងការបន្តពង្រឹង និងពង្រីកកិច្ចសហប្រតិបត្តិការនានា ​​រវាងកម្ពុជា-ឥណ្ឌា ដើម្បី​​អភិវឌ្ឍន៍​វិស័យធនធានទឹក និង​ឧតុនិយម​នៅកម្ពុជា។ ជាការឆ្លើយតប ឯកអគ្គរដ្ឋទូតឥណ្ឌាប្រចាំកម្ពុជា បានវាយតម្លៃខ្ពស់ចំពោះកិច្ចសហប្រតិបត្តិការជាមួយកម្ពុជា នាពេលកន្លងមក និងបានកោតសរសើរដល់ប្រមុខរាជរដ្ឋាភិបាលកម្ពុជា ដែលបានរួមសហការគ្នាយ៉ាងល្អ ប្រកបដោយប្រសិទ្ធភាពខ្ពស់។ ឥណ្ឌា ប្តេជ្ញាចិត្តបន្តពង្រឹងទំនាក់ទំនងដ៏ល្អប្រសើរជួយដល់ការអភិវឌ្ឍសេដ្ឋកិច្ច-សង្គមនៅកម្ពុជា​ និងបន្តកិច្ចសហប្រតិបត្តិការលើវិស័យធនធានទឹកឱ្យកាន់តែរីកចម្រើន​ជាបន្តបន្ទាប់ទៀត៕