រាជធានីភ្នំពេញ៖ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា លើកទ្បើងថា កម្ពុជា-ឥណ្ឌា នៅមានវិស័យសក្ដានុពលជាច្រើនដែលជាឱកាសនៃការពង្រីកកិច្ចសហប្រតិបត្តិការ ដើម្បីជាផលប្រយោជន៍ដល់ប្រទេសទាំងពីរ។ វិស័យទាំងនោះរួមមាន៖ ព័ត៌មានវិទ្យា, បច្ចេកវិទ្យាឌីជីថល, អេឡិចត្រូនិក និងការកែច្នៃចំណីអាហារ...។
ថ្លែងក្នុងឱកាសជំនួបពិភាក្សាការងារជាមួយលោក វ៉ាន់ឡាល្វាន់ណា បាវីតលុង (श्री वनलालवन्ना बावितलुंग) ឯកអគ្គរដ្ឋទូតឥណ្ឌាប្រចាំកម្ពុជា និងសហការី កាលពីថ្ងៃទី២៦មីនា លោក ស៊ុន ចាន់ថុល បានសម្ដែងនូវការស្វាគមន៍ និងសាទរចំពោះការអញ្ជើញមកបំពេញបេសកកម្មការទូតនៅកម្ពុជា។ ជាមួយគ្នា លោកឧបនាយករដ្ឋមន្ត្រី ក៏បានបង្ហាញនូវជំនឿថា បេសកកម្មការទូតរបស់លោកឯកអគ្គរដ្ឋទូត នឹងរួមចំណែកថែមមួយកម្រិតទៀតក្នុងការពង្រឹង ពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។ បន្ថែមពីនេះ លោកឧបនាយករដ្ឋមន្ត្រី បានលើកឡើងអំពីការពិនិត្យលទ្ធភាព និងឱកាសក្នុងការរៀបចំបេសកកម្មទាក់ទាញ និងជំរុញវិនិយោគទៅកាន់ប្រទេសឥណ្ឌានាពេលអនាគត ដើម្បីជាការបន្ថែមគោលដៅគោះទ្វារទាក់ទាញវិនិយោគដោយផ្ទាល់មួយទៀតពីបរទេស។
លោកឯកអគ្គរដ្ឋទូត បានសម្ដែងនូវក្ដីសោមនស្សរីករាយដែលបានជួបពិភាក្សាការងារ ជាមួយលោកឧបនាយករដ្ឋមន្ត្រី។ លោកឯកអគ្គរដ្ឋទូត គូសបញ្ជាក់ថា តាមរយៈទំនាក់ទំនងការទូតជាច្រើនទសវត្សរ៍ និងភាពរីកចម្រើននៃកិច្ចសហប្រតិបត្តិការក្នុងវិស័យនានា ឥណ្ឌា-កម្ពុជា គួរលើកកម្រិតទំនាក់ទំនងឱ្យកាន់តែមានកម្រិតខ្ពស់បន្ថែមទៀត។ ក្នុងឱកាសជំនួបនោះ លោកឯកអគ្គរដ្ឋទូត ក៏បានវាយតម្លៃខ្ពស់ចំពោះទំនាក់ទំនងដ៏យូរអង្វែងរវាងឥណ្ឌា និងកម្ពុជា ព្រមទាំងបានកត់សម្គាល់អំពីវឌ្ឍនភាពថ្មីៗនៃការរីកចម្រើនទាំងសេដ្ឋកិច្ច និងសង្គមរបស់កម្ពុជា ក្នុងរយៈពេលប៉ុន្មានឆ្នាំចុងក្រោយនេះ៕
