រាជធានីភ្នំពេញ៖ លោក កេត គឹមសុង ជាជនល្មើសដឹកសត្វព្រៃធ្វើអាជីវកម្ម ដែលសមត្ថកិច្ចខេត្តក្រចេះចុះឃាត់ខ្លួន ត្រូវបានដោះលែងឱ្យត្រឡប់ទៅផ្ទះវិញ បន្ទាប់ពីបានបង់ពិន័យអន្តរការណ៍តាមច្បាប់ស្តីពីព្រៃឈើ។ នេះបើតាមការអះអាងរបស់លោក ឆន ស៊ីដន​ នាយសង្កាត់រដ្ឋបាលព្រៃឈើថ្មគ្រែ មកកាន់អង្គភាពសារព័ត៌មាន SBM News តាមទូរសព្ទនៅព្រឹកថ្ងៃទី៣១មករា ឆ្នាំ២០២៦។

នាយសង្កាត់រដ្ឋបាលព្រៃឈើ បញ្ជាក់ថា ការដោះលែងនេះ ធ្វើទៅតាមការណែនាំរបស់[លោក គី ប៉ុណ្ណារ៉ា] ព្រះរាជអាជ្ញាខេត្តក្រចេះ។ ដោយឡែក នៅថ្ងៃ៣០មករា ទំព័រហ្វេសប៊ុកទូរទស្សន៍ខេត្តក្រចេះ បានយកការបំភ្លឺរបស់រដ្ឋបាលព្រៃឈើ និងខណ្ឌរដ្ឋបាលព្រៃឈើខេត្តនេះ ទៅបង្ហោះផ្សព្វផ្សាយ។ សេចក្តីបំភ្លឺដែលទូរទស្សន៍ខេត្តក្រចេះ ផ្សព្វផ្សាយនេះ មានខ្លឹមសារដូចអ្វីដែលនាយសង្កាត់រដ្ឋបាលព្រៃឈើ ថ្លែងក្នុងកិច្ចសម្ភាសជាមួយ SBM News។

បើតាមការបំភ្លឺនេះដដែល ជនល្មើសរងពិន័យបង់ពិន័យ ដោយសារដឹកជញ្ជូនសត្វព្រៃគ្មានលិខិតអនុញ្ញាតពីរដ្ឋបាលព្រៃឈើ។ ជុំវិញរឿងនេះ លោក អឿន សំអុល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តក្រចេះ ពន្យល់ក្នុងកិច្ចសម្ភាសជាមួយ SBM News ថា ករណីរត់ពន្ធសត្វព្រៃ ឬដឹកជញ្ជូនសត្វព្រៃទៅធ្វើអាជីវកម្មនេះ មិនតម្រូវឱ្យឃុំខ្លួន ឬផ្តន្ទាទោសជនល្មើសដាក់ពន្ធនាគារទេ គឺត្រឹមតែពិន័យជាអន្តរការណ៍ តាមរយៈការបង់ប្រាក់ប៉ុណ្ណោះ។ 

បច្ចុប្បន្ន រថយន្ត ដែលផ្ទុកសត្វព្រៃ កំពុងរក្សាទុកនៅស្នងការដ្ឋាននគរបាលខេត្តក្រចេះ។ ចំពោះសត្វមួយចំនួន ត្រូវបានដោះលែងវិញ និងប្រគល់ជូននាយកដ្ឋានសត្វព្រៃ។ គួរជម្រាបថា ករណីរត់ពន្ធសត្វព្រៃខុសច្បាប់នេះ ត្រូវបានសមត្ថកិច្ចប្រដេញចាប់ត្រួតពិនិត្យនៅចំណុចរង្វង់មូលព្រាប-ស ក្រុងក្រចេះ នៅវេលាម៉ោងប្រមាណ១១យប់ថ្ងៃទី២៧មករា។ សមត្ថកិច្ច រកឃើញថា ជនល្មើសបំផ្លាញធនធានធម្មជាតិរូបនេះ បានរត់ពន្ធសត្វព្រៃជាច្រើនប្រភេទ រួមមាន សត្វពង្រូលរស់១ក្បាល, សត្វពស់ព្រៃរស់ និងសាច់សត្វឈ្លូស ទម្ងន់១០គីឡូក្រាម៕