ក្រុងព្រះវិហារ៖ មន្រ្តីជំនាញស៊ីម៉ាក់ខេត្តព្រះវិហារ បន្តបោសសម្អាតសំណល់យុទ្ធភណ្ឌមិនទាន់ផ្ទុះ​បន្សល់ទុកពីកំលុងយោធាថៃបើកការឈ្លានពានកម្ពុជា ចំនួន២គ្រាប់ ប្រភេទ MK-៨២ ទម្ងន់២៣០គីឡូក្រាម។ នេះបើតាមការបញ្ជាក់ពី លោក​​ ហេង រតនា ​អគ្គនាយកស៊ីម៉ាក់ នៅរសៀលថ្ងៃទី៣០មករា..។

លោកអគ្គនាយកស៊ីម៉ាក់ គូសបញ្ជាក់យ៉ាងដូច្នេះថា៖«កងកម្លាំងជំនាញអង្គភាព ស៊ីម៉ាក់ បានដោះបន្សាបគ្រាប់បែកទម្លាក់ពីយន្តហោះប្រភេទ MK-៨២ ទម្ងន់ជាង២៣០គីឡូក្រាមចំនួន២គ្រាប់​ ដែលគ្រាប់បែកទាំងនេះផលិតនៅខែមករា​ ឆ្នាំ២០១០​ និងខែឧសភា​ ឆ្នាំ២០១១​។ គ្រាប់បែកទាំងនេះ បានទម្លាក់នៅថ្ងៃទី១១​ ខែធ្នូ​ ឆ្នាំ២០២៥​ ក្នុងសង្គ្រាមសៀមឈ្លានពាន​ ក្នុងភូមិសាស្ត្រសមរភូមិព្រំដែនកម្ពុជា-សៀម»។ សូមជម្រាបថា មិនមែនមានតែខេត្តព្រះវិហារមួយទេ ដែលយោធាថៃឈ្លានពាន បានទម្លាក់គ្រាប់បែកប្រភេទ MK-៨២។ ជាក់ស្តែង កាលថ្ងៃទី២​សីហា ឆ្នាំ២០២៥ អង្គភាពស៊ីម៉ាក់​ ក៏បានត្រួតពិនិត្យនៅវត្តតាមាន់សែនជ័យ ស្ថិតនៅភូមិតាហាំ ឃុំគោកមន ស្រុកបន្ទាយអំពិល​ ខេត្តឧត្តរមានជ័យផងដែរ។

ជាមួយគ្នា មន្រ្តីជំនាញស៊ីម៉ាក់ រកឃើញភស្តុតាងដែលអាចបញ្ជាក់ច្បាស់ថា​ ទីតាំងអារាមនេះ ក៏ត្រូវបានពួកទ័ពថៃ​ទម្លាក់គ្រាប់បែក MK-៨២ ទម្ងន់២៥០គីឡូក្រាម​។ ការទម្លាក់នេះ យោធាថៃ បានប្រើប្រាស់យន្តហោះ F-១៦  ដឹកហើយបានបំពាក់បន្ថែមនូវឧបករណ៍នាំផ្លូវជំនាន់ថ្មី (The GBU-១២ Payway II) តាមរយៈភស្តុតាង​​ គ្រាប់បែកទម្លាក់មានចំនួន២គ្រាប់ លេខស៊េរី​ Serial No.២២០០២៧៨៨ និងSerial No.២២០០២៧៩៤ ផលិតនៅខែមករា​ ឆ្នាំ២០២៣៕