រដ្ឋធានីវ៉ាស៊ីនតោន៖ កាលពីថ្ងៃព្រហស្បតិ៍ទី២៩មករា ប្រធានាធិបតីអាម៉េរិក លោក ដូណាល់ ត្រាំ បានគំរាមកំហែងពន្ធថ្មីលើប្រទេសទាំងហ្លាយណា ដែលហ៊ានផ្គត់ផ្គង់ប្រេងដល់ប្រទេសគុយបា ខណៈរដ្ឋធានីវ៉ាស៊ីនតោន កំពុងបង្កើនសម្ពាធប្រឆាំងកោះ ដែលគ្រប់គ្រងដោយរបបកុម្មុយនីស្ដមួយនេះ។ នេះបើតាមការចុះផ្សាយដោយកាសែតអ៊ីស្រាអែល The Jerusalem Post នៅថ្ងៃសុក្រទី៣០ ខែមករា។

យ៉ាងណា ជុំវិញសេចក្តីប្រកាសរបស់ ត្រាំ គេមិនទាន់ដឹងថា មានអត្រាពន្ធប៉ុន្មានទេ..? ហើយថា តើប្រទេសណាខ្លះនឹងត្រូវគំនាបពន្ធរបស់អាម៉េរិកនោះ? ក៏មិនទាន់បានបញ្ជាក់ដែរ។ បន្ទាប់ពីសេចក្តីប្រកាសរបស់លោក ត្រាំ ស្រាប់តែប្រព័ន្ធផ្សព្វផ្សាយរដ្ឋរបស់ប្រទេសគុយបា ឆ្លើយ​តបភ្លាមៗ​ និងព្រមានថា ការដាក់គំនាបនេះ បានគម្រាមកំហែងដល់ការផលិតអគ្គិសនី ផលិតកម្មកសិកម្ម ការផ្គត់ផ្គង់ទឹក និងសេវាសុខភាពនៅលើកោះមួយនេះ ដែលកំពុងទទួលរងនូវវិបត្តិសេដ្ឋកិច្ចដ៏យ៉ាប់យ៉ឺនរួចទៅហើយ។ «ជីវិត​នៅគ្រប់មជ្ឈដ្ឋាននឹង​ត្រូវ​ថប់​ដង្ហើម​ ដោយសារ​រដ្ឋាភិបាល​អាម៉េរិក» នេះគឺជាការបញ្ជាក់ចំៗ ដោយរដ្ឋាភិបាល​គុយបា​នៅ​ក្នុង​សេចក្តី​ថ្លែងការណ៍​មួយ។

សូមជម្រាបថា បន្ទាប់ពីប្រើប្រាស់កម្លាំងយោធាដ៏ស្រួចស្រាវវាយប្រហារលើរដ្ឋធានីការ៉ាកាស និងចាប់ខ្លួនប្រធានាធិបតីវេណេហ្ស៊ុយអេឡា លោក នីកូឡាស់ ម៉ាឌូរ៉ូ នៅហ្នឹងកន្លែង លោក ត្រាំ បានអះអាងម្ដងហើយម្ដងទៀត អំពីសកម្មភាពប្រឆាំងនឹងគុយបា និងដាក់សម្ពាធលើរបបផ្តាច់ការរបស់ប្រទេសកោះនេះ។ ជាក់ស្តែង លោក ត្រាំ បានបន្លឺសំឡេងនៅក្នុងសប្តាហ៍នេះថា៖«គុយបា នឹងបរាជ័យក្នុងពេលឆាប់ៗនេះ ព្រោះថា វ៉េណេហ្ស៊ុយអេឡា ដែលជាអ្នកផ្គត់ផ្គង់ប្រេងកំពូលរបស់កោះមួយនេះ ថ្មីៗ..មិនបានបញ្ជូនប្រេង ឬលុយទៅប្រទេសគុយបាទេ»។ ជាចុងក្រោយ ប្រធានាធិបតីគុយបា លោក មីហ្គែល ដាយអាស ខាណែល (Mr.Miguel Diaz-Canel) បានប្រតិកម្មថា រដ្ឋធានីវ៉ាស៊ីនតោន គ្មានសិទ្ធិអំណាចអ្វីដើម្បីបង្ខំកិច្ចព្រមព្រៀងលើគុយបានោះឡើយ...៕