រាជធានីបាងកក៖ កាលពីថ្ងៃទី២៦មករា ប្រព័ន្ធផ្សព្វផ្សាយថៃបានចុះផ្សាយថា អេស្កាវ៉ាទ័ររបស់យោធាថៃ ដែលកំពុងឈរជើងក្បែរតំបន់ប្រាសាទព្រះវិហារ ត្រូវបានផ្ទុះឆាបឆេះ និងរងការខូចខាតយ៉ាងដំណំ បណ្ដាលឱ្យទាហានថៃម្នាក់រងរបួសយ៉ាងធ្ងន់ធ្ងរ...។
នៅលើគេហទំព័រហ្វេសប៊ុករបស់កងទ័ពភូមិន្ទថៃ បានបញ្ជាក់ថា គ្រឿងចក្របានឆាបឆេះ ហើយបុគ្គលិកយោធាមួយចំនួនបានរងរបួស។ ឧប្បត្តិហេតុនេះ បានកើតឡើងនៅល្ងាចថ្ងៃទី២៦ ខែមករា ដោយសារគ្រឿងចក្រត្រូវបានប្រើប្រាស់ខ្លាំងហួសកម្រិត។ ភ្លើងបានរលត់ទៅវិញ ប៉ុន្តែនៅយប់ជ្រៅវាក៏បានឆាបឆេះម្ដងទៀត។ ជុំវិញបញ្ហានេះ យោធភូមិភាគទី២ថៃ បានពន្យល់នៅថ្ងៃទី២៧ ខែមករានេះថា មានករណីផ្ទុះឆេះគ្រឿងចក្រ ក្នុងអំឡុងពេលបំពេញបេសកកម្មនៅព្រំដែន បណ្ដាលឱ្យបុគ្គលិកយោធាម្នាក់រងរបួស ដោយសារតែរលាកភ្លើង។ យ៉ាងណា អ្នករបួសត្រូវបានគេបញ្ជូនទៅកាន់មន្ទីរពេទ្យដើម្បីព្យាបាលភ្លាមៗ។ ទោះបីជាយ៉ាងនេះក្ដី យោធភូមិភាគ២ មិនបានទម្លាយមូលហេតុពិតនៅពីក្រោយការផ្ទុះឆេះអេស្កាវ៉ាទ័រ ដែលកំពុងឈរជើងដើម្បីឈូសឆាយដីក្បែរតំបន់ប្រាសាទព្រះវិហាររបស់កម្ពុជា ខណៈដែលយោធាថៃទើបនឹងឈ្លានពានកាន់កាប់បានកាលពីកំលុងសម័យសង្គ្រាម២១ថ្ងៃកន្លងមកថ្មីៗនេះ៕
