រាជធាមីបាងកក៖ ព្រំដែនថៃ-ភូមា ចាប់ផ្តើមក្ដៅដូចខែចែត្រហើយ! ប៉ូលិសថៃ១០០នាក់ បានបើកការប្រមាញ់ទ្រង់ទ្រាយធំមួយ នៅថ្ងៃទី២១មករា ឆ្នាំ២០២៦នេះ បន្ទាប់ពីជនជាតិភូមាម្នាក់ ត្រូវបានចោទប្រកាន់ថា បានបាញ់មន្ត្រីប៉ូលិសថៃម្នាក់ឱ្យរងរបួសធ្ងន់ធ្ងរ អំឡុងពេលប្រតិបត្តិការលាក់កំបាំង ដើម្បីទិញអាវុធខុសច្បាប់នៅក្នុងស្រុកម៉ែសូត្រ ខេត្តតាក ប្រទេសថៃ ជាប់ព្រំដែនជាមួយប្រទេសភូមា...។
ហេតុការណ៍បាញ់ប្រហារនេះ កើតឡើងនៅព្រឹកថ្ងៃទី២១មករា លើផ្លូវក្បែរហាងទំនិញមួយកន្លែង ក្នុងភូមិផាឡាដ(พลัด) ឃុំម៉ែគូ (แม่กู่) ស្រុកម៉ែសូត្រ ខេត្តតាក ពាក់ព័ន្ធករណីជួញដូរអាវុធឆ្លងដែន។ នៅពេលសមត្ថកិច្ចចុះទៅឃាត់ខ្លួន ស្រាប់តែជនសង្ស័យម្នាក់បានប្រើកាំភ្លើងភ្ជង់ រួចកេះកៃបាញ់ទៅលើប៉ូលិសថៃវ័យ៥១ឆ្នាំម្នាក់ បណ្ដាលឱ្យគ្រាប់កាំភ្លើងហោះទៅទម្លុះពោះមន្ត្រីប៉ូលិសរូបនោះ រងរបួសយ៉ាងធ្ងន់ធ្ងរ ក្រោយមកត្រូវបានបញ្ជូនទៅមន្ទីរពេទ្យស្រុកម៉ែសូត្រភ្លាមៗ ដើម្បីធ្វើការវះកាត់សង្គ្រោះអាយុជីវិតបន្ទាន់។
ជនសង្ស័យ គឺជាជនជាតិភូមា២នាក់។ ជនសង្ស័យទី១ អាយុ២០ឆ្នាំ ត្រូវបានចាប់ខ្លួននៅកន្លែងកើតហេតុ ហើយកំពុងត្រូវបានសាកសួរព័ត៌មាន។ ចំណែកជនសង្ស័យម្នាក់ទៀត មានអាយុ២០ឆ្នាំដូចគ្នា បានរត់គេចខ្លួនបាត់ស្រមោលឈឹង បន្សល់ទុកត្រឹមម៉ូតូ និងកាំភ្លើងខ្លីមួយដើម នៅកន្លែងកើតហេតុ។ យ៉ាងណា ប៉ូលិសកំពុងបើកការស៊ើបអង្កេត។ សន្តិសុខត្រូវបានរឹតបន្តឹងភ្លាមៗនៅតាមដងផ្លូវធំៗជិតព្រំដែន ខណៈប៉ុស្តិ៍ត្រួតពិនិត្យត្រូវបានបង្កើតឡើង និងក្រុមប្រដាប់អាវុធត្រូវបានដាក់ពង្រាយនៅក្នុងតំបន់គោលដៅ។ គួរបញ្ជាក់ថា ហេតុការណ៍បាញ់ប្រហារនេះ នាំឱ្យភាពចលាចលនៅតាមបណ្តោយព្រំដែនថៃ-ភូមា កាន់តែឡើងកម្តៅខ្លាំងថែមមួយកម្រិតទៀត ស្របពេលវិបត្តិព្រំដែនរវាងប្រទេសទាំង២ កំពុងតែផុយស្រួយរួចទៅហើយ បន្ទាប់ពីក្រុមប្រដាប់អាវុធជនជាតិភាគតិចការ៉ែន ហ៊ានប្រកាសឯករាជ្យ ដែលមានថៃជាខ្នងបង្អែក៕
