រាជធានីភ្នំពេញ៖ ក្នុងចំណោមប្រទេសប្រមាណជិត៦០ ក៏មានកម្ពុជាដែរ ដែលទទួលបានលិខិតពីលោក ដូណាល់ ត្រាំ ប្រធានាធិបតីអាម៉េរិក អញ្ជើញសុំឱ្យចូលរួមជាសមាជិកស្ថាបនិកនៃក្រុមប្រឹក្សាសន្តិភាព ដែលផ្តួចផ្តើមគំនិតបង្កើតឡើងលោក ត្រាំ និងធ្វើជាប្រធានក្រុមប្រឹក្សានេះខ្លួនឯងផ្ទាល់។ យោងតាមសេចក្តីព្រាងធម្មនុញ្ញនៃក្រុមប្រឹក្សាសន្តិភាព និងការពន្យល់របស់សារព័ត៌មាន Hespress (ហេសប្រេស) គ្រប់ប្រទេសដែលចូលជាសមាជិក នឹងមិនបង់ប្រាក់ឡើយ សម្រាប់៣ឆ្នាំដំបូង ដោយមានឈ្មោះថាជាសមាជិកធម្មតា តែបើចង់ក្លាយជាសមាជិកអចិន្ត្រៃយ៍ និងអាចបន្តមានវត្តមានក្នុងក្រុមប្រឹក្សាសន្តិភាព ត្រូវបង់ប្រាក់វិភាគទាន១ពាន់លានដុល្លារ។ 

ប្រាក់១ពាន់លានដុល្លារនេះ គឺត្រូវបង់នៅឆ្នាំដំបូង មានន័យថា បើចូលរួមនៅឆ្នាំ២០២៦ គឺត្រូវបង់ប្រាក់នៅឆ្នាំ២០២៦នេះទៅតែម្តង ដើម្បីបានកៅអីសមាជិកអចិន្ត្រៃយ៍។ ចំពោះប្រទេសជាសមាជិកធម្មតាដែលពុំបានបង់ប្រាក់១ពាន់លានដុល្លារ នៅពេល៣ឆ្នាំក្រោយ នឹងត្រូវបាត់បង់សមាជិកភាពរបស់ខ្លួន។ ប្រធានាធិបតីអាម៉េរិក ដែលជាប្រធានក្រុមប្រឹក្សាសន្តិភាពនេះ ជាអ្នកសម្រេចថា ឱ្យប្រទេសនោះបន្តធ្វើជាសមាជិកទៀត ឬត្រូវបញ្ចប់។ ប៉ុន្តែ ជាទូទៅ អាចនឹងត្រូវបញ្ចប់សមាជិកភាព ព្រោះយោងតាមហេតុផល គឺថា ប្រទេសនោះ មិនបង់ប្រាក់ មានន័យស្មើនឹងមិនចង់បន្តធ្វើជាសមាជិក។  

តើកម្ពុជា គួរចូលជាសមាជិក ឬក៏អត់? បើចូល ចូលជាសមាជិកធម្មតា ឬសុខចិត្តលះបង់១ពាន់លានដុល្លារដើម្បីបានក្លាយជាសមាជិកអចិន្រ្តៃយ៍ឬទេ? បើចូល តើកម្ពុជាចំណេញច្រើនជាង ឬខាតច្រើនជាង? ជាពិសេសនោះ ក្រៅពីចូលរួមរកដំណោះស្រាយសម្រាប់ប្រទេសដទៃ តើកម្ពុជាក្នុងឋានៈជាសមាជិកធម្មតា​ ឬជាសមាជិកអចិន្រ្តៃយ៍ អាចពឹងក្រុមប្រឹក្សាសន្តិភាពរបស់អាម៉េរិក ឱ្យជួយទប់ស្កាត់ថៃបញ្ឈប់ការឈ្លានពានកម្ពុជាដែរឬទេ? ក្នុងចំណោមប្រទេសទាំង១១នៅតំបន់អាស៊ាន មាន៥ប្រទេសហើយ ដែលទទួលបានលិខិតអញ្ជើញពីលោកត្រាំ គឺ វៀតណាម សិង្ហបុរី ថៃ ឥណ្ឌូណេស៊ី និងកម្ពុជា។ វៀតណាម និងឥណ្ឌូណេស៊ី សម្រេចចិត្តភឹងៗចូលជាសមាជិកក្រុមប្រឹក្សាសន្តិភាពរបស់លោក ត្រាំ ខណៈសិង្ហបុរី ថៃ និងកម្ពុជា កំពុងស្ថិតក្នុងការពិចារណា។  

សម្តេចនាយករដ្ឋមន្រ្តី ហ៊ុន ម៉ាណែត បានបង្ហោះលិខិតអញ្ជើញរបស់លោក ត្រាំ លើទំព័រហ្វេសប៊ុក នៅយប់ថ្ងៃទី២១ ខែមករា ឆ្នាំ២០២៦ ប៉ុន្តែលិខិតនេះ ចុះកាលបរិច្ឆេទតាំងពីថ្ងៃទី១៦ ខែមករា។ ក្នុងលិខិត លោក ត្រាំ ស្នើសុំឱ្យមេដឹកនាំកម្ពុជាចូលជាសមាជិកក្រុមប្រឹក្សាសន្តិភាព ដើម្បីចូលរួមធ្វើកិច្ចការជាមួយគ្នា ដែលប្រធានាធិបតីនៃប្រទេសមហាអំណាចលេខមួយរូបនេះ ហៅថា ជាកិច្ចការប្រវត្តិសាស្រ្តដ៏អស្ចារ្យក្នុងការពង្រឹងសន្តិភាពនៅតំបន់មជ្ឈិមបូព៌ាផង និងការដោះស្រាយជម្លោះលើពិភពលោកផង។ លោក ត្រាំ ជម្រាបប្រមុខរាជរដ្ឋាភិបាលកម្ពុជាដូច្នេះថា៖«ខ្ញុំរង់ចាំធ្វើការងារជាមួយសម្តេចនាពេលខាងមុខ ដើម្បីរួមគ្នាឆ្ពោះទៅសម្រេចគោលដៅនៃការកសាងសន្តិភាពយូរអង្វែងសម្រាប់ពិភពលោក រួមទាំងសម្រេចគោលដៅនៃភាពរុងរឿង និងភាពអស្ចារ្យសម្រាប់ទាំងអស់គ្នា»។

គួរដឹងថា បំណងដំបូងដែលលោក ត្រាំ ប្រកាសប្រាប់គេឯងក្នុងការបង្កើតក្រុមប្រឹក្សាសន្តិភាព គឺសំដៅបាញ់ឆ្ពោះទៅរកការបញ្ចប់សង្គ្រាមរវាងតំបន់ហ្កាហ្សា នៃរដ្ឋប៉ាឡេស្ទីន ជាមួយអ៊ីស្រាអែល ដែលស្ថិតក្នុងតំបន់មជ្ឈិមប៉ូព៌ាប៉ុណ្ណោះ ហើយកសាងសន្តិភាពឡើងវិញ ពិសេស គឺតំបន់ហ្កាហ្សាតែម្តង ដែលក្លាយជាផេះផង់ទៅហើយ ដោយសារត្រូវគ្រាប់រាប់មិនអស់ដូចទឹកភ្លៀងរបស់អ៊ីស្រាអែលរាប់ឆ្នាំមកនេះ។ តែទីបំផុត លោក ត្រាំ ព្យាយាមពន្លាតឥទ្ធិពលក្រុមប្រឹក្សានេះ ចេញហួសពីតំបន់ហ្កាហ្សាឆ្ងាយណាស់ ពោលគឺ ចង់ឱ្យមានវិសាលភាពយ៉ាងធំធេង រហូតដល់ដើរតួនាទីដោះស្រាយជម្លោះលើពិភពលោកតែម្តង ដូចដែលលោក ត្រាំ ជម្រាបមេដឹកនាំកម្ពុជាក្នុងលិខិត។ បើតាមសារព័ត៌មាន Reuters មកដល់ពេលនេះ មានប្រទេសជាង៣០ហើយ ក្នុងចំណោមប្រមាណជិត៦០ប្រទេស ដែលព្រមចូលជាសមាជិកក្រុមប្រឹក្សាសន្តិភាព។ លោក ត្រាំ អាចនឹងបន្តដាក់លិខិតអញ្ជើញមេដឹកនាំតាមបណ្តាប្រទសនានាជាច្រើនថែមទៀត៕