រាជធានីភ្នំពេញ៖ ដើមឆ្នាំថ្មីនេះ ក្រសួងសាធារណការ និងដឹកជញ្ជូន បានដាក់ចេញនូវវិធានការបន្ទាន់ ដើម្បីបញ្ចៀសការបុកប៉ះ ឬគ្រោះថ្នាក់ផ្សេងៗ ជាពិសេសសំដៅការពារសុវត្ថិភាពចរាចរណ៍តាមផ្លូវដែក...។

វិធានការឆ្លើយតបបន្ទាន់ដែលក្រសួង និងក្រុមហ៊ុនឯកជន រ៉ូយ៉ាល់ រេលវេ អនុវត្តមានដូចជា ការដាក់របារ និងការបំពាក់ហេដ្ឋារចនាសម្ព័ន្ធការពារសុវត្ថិភាព, ការបំពាក់ស្លាកសញ្ញាចរាចរណ៍ និងការអប់រំផ្សព្វផ្សាយ។ នេះបើតាមការបញ្ជាក់របស់ លោក ផន រឹម អ្នកនាំពាក្យក្រសួងសាធារណការ នៅរសៀលថ្ងៃទី២១ ខែមករា ឆ្នាំ២០២៦។ លោក ផន រឹម បង្ហាញរបាយការណ៍ក្នុងឆ្នាំ២០២៥ ថា កម្ពុជាមានករណីគ្រោះថ្នាក់ចរាចរណ៍លើផ្លូវដែកចំនួន២១លើក ហើយភាគច្រើននៃគ្រោះថ្នាក់ទាំងនោះ កើតឡើងដោយសារ មនុស្សស្រវឹង ឬវិកលចរិត ដេកលើផ្លូវដែកហើយត្រូវរថភ្លើងឆ្លងកាត់កិន។ ក្នុងទិសដៅឆ្លើយតប និងបង្ការបញ្ហាគ្រោះថ្នាក់ទាំងនោះ ក្រុមហ៊ុន រ៉ូយ៉ាល់ រេលវេ និងសហការជិតស្និទ្ធជាមួយនាយកដ្ឋានផ្លូវដែក និងអាជ្ញាធរមូលដ្ឋាន ដើម្បីបន្តធ្វើយុទ្ធនាការផ្សព្វផ្សាយ អប់រំដល់ប្រជាជនទូទៅឱ្យគោលរពតាមស្លាកសញ្ញាព្រមាន ហើយបង្កើនការប្រុងប្រយ័ត្នតាមផ្លូវដែលមានរថភ្លើងឆ្លងកាត់។

ក្នុងគោលដៅផ្សព្វផ្សាយដដែល ក្រសួងក៏បានផ្ញើលិខិតណែនាំទៅគ្រប់ក្រុមហ៊ុនដឹកជញ្ជូន និងភ្នាក់ងារទេសចរណ៍ ដើម្បីអប់រំអ្នកបើកបររថយន្តឱ្យមានការប្រុងប្រយ័ត្នខ្ពស់ និងគោរពស្លាកសញ្ញាចរាចរណ៍ឱ្យបានខ្ជាប់ខ្ជួន។ លើសពីនេះ ក្រុមហ៊ុនរ៉ូយ៉ាល់ រេលវេ នឹងបង្កើនចំនួនមនុស្សចាំយាមនៅទីតាំងប្រសព្វ (ឆ្មាំរបារ) ដើម្បីផ្ដល់សញ្ញា បិទផ្លូវ និងសម្របសម្រួលចរាចរណ៍ នៅពេលមានរថភ្លើងធ្វើដំណើរឆ្លងកាត់។ ការជ្រើសរើសក្រុមឆ្មាំរបារទាំងនោះ ផ្តល់អាទិភាពដល់ប្រជាជនមូលដ្ឋាន ជាពិសេស ប្រជាការពារ ដោយក្រុមហ៊ុនជាអ្នកទទួលបន្ទុកផ្ដល់ថវិកាឧបត្ថម្ភលើកទឹកចិត្ត។ ម៉្យាងវិញទៀតក្រុមហ៊ុន និងនាយកដ្ឋានផ្លូវដែក និងរួមគ្នា ចុះត្រួតពិនិត្យវាយតម្លៃឡើងវិញ ដើម្បីប្រមូលទិន្នន័យទីតាំងផ្លូវប្រសព្វសំខាន់ៗ ហើយពិចារណាថា គួរបំពាក់របារបន្ថែមរបារស្វ័យប្រវត្តិ ឬផ្លាល់ប្តូរប្រភេទបារបិទផ្លូវ។

ដោយឡែក ចំពោះទីតាំងដែលមិនសូវមានចរាចរណ៍ឆ្លងកាត់ច្រើន នឹងមិនបំពាក់របារទេ តែដាក់ស្លាកសញ្ញា និងអ្នកផ្តល់សញ្ជា ស្របទៅតាមការអនុវត្តជាអន្តរជាតិ នៅតាមបណ្តាប្រទេសដទៃ។ តាមលោកផនរឹមដដែល កិច្ចការរបស់ក្រុមហ៊ុន នឹងស្ថិតនៅក្រោមការតាមដានត្រួតពិនិត្យយ៉ាងដិតដល់បំផុតពីក្រសួងសាធារណការ។ មួយវិញទៀត ក្រុមហ៊ុន រ៉ូយ៉ាល់ រេលវេ ក៏មានតួនាទីពិនិត្យឡើងវិញលើចម្ងាយដែលត្រូវបំពាក់ស្លាកសញ្ញាតាមបណ្តោយផ្លូវដែក ដើម្បីឱ្យអ្នកបើកបររថភ្លើងអាចមានពេលវេលាស៊ីផ្លេផ្តល់សញ្ញាបានយូរជាងមុន មុននឹងធ្វើដំណើរទៅដល់ទីតាំងចំណុចប្រសព្វ ហើយអ្នកប្រើប្រាស់ផ្លូវថ្នល់ឆាប់បានដឹង។ ចំណុចនេះ ក្រសួងសាធារណការ ចាត់វិធានលើកស្លាកភ្លាមៗ លើផ្លូវថ្នល់បន្ថែមឱ្យបានច្រើនជាងមុន អំពីផ្លូវរថភ្លើងឆ្លងកាត់នៅតាមទីតាំងចំណុចប្រសព្វសំខាន់ៗ ដើម្បីផ្ដល់សញ្ញា និងជូនដំណឹងដល់អ្នកធ្វើដំណើរតាមដងផ្លូវថ្នល់ ឱ្យមានការប្រុងប្រយ័ត្នខ្ពស់។

យ៉ាងណា ក្រសួងអះអាងថា ចំពោះទីតាំងផ្លូវមួយចំនួនដែលស្ថិតនៅក្រោមសមត្ថកិច្ចគ្រប់គ្រងរបស់ក្រសួងអភិវឌ្ឍន៍ជនបទ និងរដ្ឋបាលខេត្ត ជាកម្មវត្ថុនៃការពិភាក្សា និងសហការបន្ថែមទៀតរវាងក្រសួងសាធារណការ ជាមួយក្រសួងអភិវឌ្ឍន៍ជនបទ និងរដ្ឋបាលខេត្តផ្ទាល់៕