រដ្ឋធានីញូវដេលី-ឌូបៃ៖ ក្នុងរបត់ភូមិសាស្ត្រនយោបាយកាន់តែស្មុគស្មាញ ឥណ្ឌាបានចុះហត្ថលេខាលើកិច្ចព្រមព្រៀងតម្លៃ៣ពាន់លានដុល្លារ កាលពីថ្ងៃចន្ទទី១៩មករា ដើម្បីទិញឧស្ម័នធម្មជាតិរាវ (LNG) ពីប្រទេសអារ៉ាប់រួម ខណៈកិច្ចព្រមព្រៀងនេះ ធ្វើឱ្យរដ្ឋធានីញូវដេលី ក្លាយជាអតិថិជនលំដាប់កំពូលរបស់អារ៉ាប់រួម។ ជាមួយគ្នា មេដឹកនាំប្រទេសទាំង២ ក៏បានពិភាក្សាគ្នាពង្រឹងទំនាក់ទំនងពាណិជ្ជកម្ម និងការពារជាតិផងដែរ...។

មែនទែនទៅ កិច្ចព្រមព្រៀងនេះ ត្រូវបានចុះហត្ថលេខាក្នុងអំឡុងពេលដំណើរទស្សនកិច្ចរយៈពេល២ម៉ោងដ៏ខ្លី ទៅកាន់ប្រទេសឥណ្ឌា ដោយប្រធានាធិបតីអារ៉ាប់រួម លោក ស៊ិកហ៍ មូហាម៉េដ ប៊ីនហ្សេយ៉េដ អាល់ណាហ៍យ៉ាន (Sheikh Mohammed bin Zayed Al Nahyan) ដើម្បីពិភាក្សាជាមួយនាយករដ្ឋមន្ត្រីឥណ្ឌា លោក ណារិន្ត្រា ម៉ូឌី (Narendra Modi)។ មេដឹកនាំទាំង២ បានសន្យាថា នឹងពង្រីកពាណិជ្ជកម្មទ្វេភាគីដល់ទៅ២០០ពាន់លានដុល្លារក្នុងរយៈពេល៦ឆ្នាំ និងបង្កើតភាពជាដៃគូការពារជាតិជាយុទ្ធសាស្ត្ររួមគ្នា។

ក្រុមហ៊ុនរដ្ឋ Abu Dhabi ADNOC Gas អះអាងថា នឹងផ្គត់ផ្គង់កន្លះលានតោននៃ LNG ក្នុងពេលមួយឆ្នាំដល់ក្រុមហ៊ុន Hindustan Petroleum Corp របស់ប្រទេសឥណ្ឌា សម្រាប់រយៈពេល១០ឆ្នាំ។ ជាងនេះទៅទៀត ភាគីទាំង២ ក៏បានចុះហត្ថលេខាលើលិខិតនៃចេតនាធ្វើការឆ្ពោះទៅរកការបង្កើតភាពជាដៃគូការពារជាតិជាយុទ្ធសាស្ត្រផងដែរ។ ក្រុមហ៊ុន ADNOC Gas បានអះអាងថា កិច្ចព្រមព្រៀងនឹងនាំមកនូវតម្លៃសរុបជាង២០ពាន់លានដុល្លារ។ ក្រុមហ៊ុននេះបន្ថែមថា៖«ឥឡូវនេះ ឥណ្ឌាគឺជាអតិថិជនដ៏ធំបំផុតរបស់ UAE និងជាផ្នែកមួយដ៏សំខាន់នៃយុទ្ធសាស្ត្រឧស្ម័ន LNG របស់ក្រុមហ៊ុន ADNOC»។ គួរបញ្ជាក់ថា UAE គឺជាដៃគូពាណិជ្ជកម្មធំជាងគេទី៣ របស់ឥណ្ឌា បន្ទាប់ពីសហរដ្ឋអាម៉េរិក និងចិន៕