រាជធានីភ្នំពេញ៖ មន្រ្តីក្រសួងបរិស្ថានបានឱ្យដឹងនៅថ្ងៃទី១៨មករានេះថា ខេត្តបន្ទាយមានជ័យ នៅតែមានខ្យល់ពុលកម្រិតមធ្យម ដូច្នេះ អ្នកមានសុខភាពខ្សោយកាត់បន្ថយការចេញខាងក្រៅ ឬប្រើប្រាស់ឧបករណ៍ការពារផ្លូវដង្ហើម ប្រសិនបើមិនចាំបាច់។ បើមានអាការដូចជា ក្អក ពិបាកដកដង្ហើម ឈឺទ្រូង ឈឺក្បាល ចង្វាក់បេះដូងលោតខុសប្រក្រតី ក្អួតចង្អោរ អស់កម្លាំង ត្រូវទៅពិគ្រោះជាមួយគ្រូពេទ្យ..។

មន្រ្តីបរិស្ថានបានឱ្យដឹងថា ចាប់ពីម៉ោង៧ព្រឹកថ្ងៃទី១៧ ដល់ម៉ោង៧ព្រឹកថ្ងៃទី១៨ ខែមករា ឆ្នាំ២០២៦ មានកំហាប់ភាគល្អិតនិចលគិតជាមធ្យម៣៨,៩៦មិល្លីក្រាមក្នុងមួយម៉ែត្រគូបខ្យល់ ធៀបនឹងស្ដង់ដារ៥០មិល្លីក្រាមក្នុងមួយម៉ែត្រគូបខ្យល់ និងគិតជាសន្ទស្សន៍គុណភាពខ្យល់ គឺល្អ ប៉ុន្តែបើមើលទៅលើតារាងទិន្នន័យបង្ហាញថា ខេត្តបន្ទាយមានជ័យ ស្ថិតនៅពណ៌ទឹកក្រូច មានន័យថា បង្គួរ «ការបំពុលកម្រិតមធ្យម»។ មន្រ្តីបរិស្ថានបន្ថែមថា ខេត្តកណ្តាល ខេត្តព្រះវិហារ ខេត្តពោធិ៍សាត់ និង ខេត្តសៀមរាប ស្ថិតក្នុងពណ៌លឿង ពោលគឺបញ្ជាក់ថា គុណភាពខ្យល់«បំពុលកម្រិតស្រាល»។ ចំពោះមនុស្សទូទៅអាចធ្វើសកម្មភាពចេញក្រៅផ្ទះបានជាធម្មតា ប៉ុន្តែអ្នកមានសុខភាពទន់ខ្សោយ កំពុងមានអាការដូចជា ក្អក ពិបាកដកដង្ហើម រលាកភ្នែក ត្រូវកាត់បន្ថយការចេញខាងក្រៅ និងកុំចំណាយពេលយូរពេក។

ជាមួយគ្នានេះ ខេត្តកំពង់ឆ្នាំង កំពត​ ព្រៃវែង ក្រចេះ ព្រះសីហនុ មណ្ឌលគិរី ខេត្តស្វាយរៀង និងខេត្តត្បូងឃ្មុំ នៅស្ថិតក្នុងពណ៌ខៀវ បានន័យថា «គុណភាពខ្យល់ ល្អណាស់»។ រីឯរាជធានីភ្នំពេញ ខេត្តបាត់ដំបង កំពង់ចាម កំពង់ស្ពឺ កោះកុង កំពង់ធំ  ខេត្តស្ទឹងត្រែង ខេត្តរតនគិរី ខេត្តកែប ខេត្តប៉ៃលិន និងខេត្តឧត្តរមានជ័យ ស្ថិតក្នុងពណ៌បៃតង មានន័យថា «គុណភាពខ្យល់ល្អ»។ ចំពោះ ខេត្តតាកែវ ក្រសួងបញ្ជាក់ការវាស់កម្រិតខ្យល់ មិនដំណើរការទេ៕