សុខភាព៖ ត្រអក ជាជំងឺសើស្បែកមួយប្រភេទដែលធ្វើឱ្យស្បែករលាក រមាស់ ឡើងក្រហម ស្ងួត ប្រេះ មានពងទឹក និងរបក។ ភាគច្រើនអ្នកកើតត្រអក អាចមកពីមានបញ្ហា៤យ៉ាង និងនៅពេលដែលកើតហើយគួរតបអាហារមួយចំនួន ព្រោះអាហារ​ទាំងនោះ ធ្វើឱ្យជំងឺ​ត្រអក​​កាន់តែធ្ងន់ធ្ងរជាងមុន...។

មូលហេតុដែលនាំឱ្យកើតត្រអក មានដូចជា៖ ១.កត្តាហ្សែន៖ អាចងាយនឹងកើតត្រអកបើមានប្រវត្តិគ្រួសារកើតជំងឺត្រអក ហឺត ប្រតិកម្មនឹងចំណីអាហារ  ជាតិអាល់កុល ឬសារធាតុបង្កប្រតិកម្មដូចជា លម្អងផ្កា ធូលីដី រោមសត្វជាដើម។ ២.កត្តាបរិស្ថាន៖ ផ្សែងបារី ខ្យល់កខ្វក់ ខ្យល់ស្ងួត (ខ្វះសំណើមក្នុងបរិយាកាស)។ លើសពីនេះ សាប៊ូដែលមានជាតិកាត់ខ្លាំង ផលិតផល​ថែរក្សាស្បែកមួយចំនួន ឬប្រភេទក្រណាត់ដូចជា រោមចៀមជាដើម សុទ្ធតែអាចធ្វើឱ្យស្បែកស្ងួត រមាស់ និងរលាក។ ៣.ប្រព័ន្ធភាពសុំាសកម្មខ្លាំង៖ បើកើតត្រអក ប្រព័ន្ធភាពសុំាមានប្រតិកម្មខ្លាំងជាមួយ​​​សារធាតុបង្កប្រតិកម្ម។ នៅពេលប្រព័ន្ធភាពសុំាសកម្មខ្លាំង ឬធ្វើការខ្លាំងនឹង​បង្កឱ្យស្បែក ក៏ដូចជារាងកាយ​មាន​ការ​រលាក។

៤.ស្ត្រេស ឬភាពតានតឹង៖ ស្ត្រេស ដែលបង្កឡើងដោយភាពនឿយហត់ ក្ដីបារម្ភ ការថប់បារម្ភ មួរម៉ៅ គេងមិនគ្រប់គ្រាន់ ឬសម្ពាធ​ការងារ ក៏អាចបង្កឱ្យកើតត្រអក​ដែរ។ រីឯអាហារដែលអ្នកកើតត្រអកគួរចៀសវាង រួមមាន៖ ផលិតផលទឹកដោះ ស៊ុត សណ្តែកដី និងគ្រាប់ផ្លែឈើ សណ្តែកសៀង  ស្រូវសាលី (ព្រោះមានសារធាតុ Gluten) ផ្លែឈើអម្បូរក្រូច ផ្លែប៉េងប៉ោះ ​ផ្លែស្ត្រប់បឺរី សូកូឡា គ្រឿងសមុទ្ទ និងគ្រឿងស្រវឹង។ គួរដឹងថា ត្រអកមិនឆ្លងទេតែក៏ព្យាបាលមិនជាដែរ ត្រូវចៀសវាងអាហារដូចរៀបរាប់ខាងលើ និង​មូលហេតុ​បង្កឱ្យកើត​ត្រអក ទើបអាចគ្រប់គ្រងជំងឺត្រអកមិនឱ្យរើឡើងវិញ ឬវិវឌ្ឍន៍ទៅជាធ្ងន់ធ្ងរ៕ ដកស្រង់ពី៖ Hello គ្រូពេទ្យ