សុខភាព៖ អ្នកជំងឺតម្រងនោមភាគច្រើន មិនបង្ហាញរោគសញ្ញាឡើយ រហូតដល់ដំណាក់កាលធ្ងន់ធ្ងរ។ ដូច្នេះ ការស្វែងយល់បន្ថែមពីរោគសញ្ញាមួយចំនួនដែលបញ្ជាក់ថា តម្រងនោមមានបញ្ហា ឬអត់ លោកអ្នកគួរតែកត់សម្គាល់មើលរាងកាយដែលមានអាការទាំង៨នេះ...។
១.បាត់បង់ចំណង់អាហារ៖ ការធ្លាក់ចុះនៃចំណង់អាហារ ក៏ជាសញ្ញាព្រមាននៃជំងឺតម្រងនោម។ មូលហេតុដែលនាំឱ្យអ្នកជំងឺមានអាការនេះ គឺដោយសារតែការប្រមូលផ្តុំនៃជាតិពុល នៅពេលដែលមុខងារតម្រងនោមចុះខ្សោយ។ ២.អស់កម្លាំង៖ បញ្ហាខ្សោយតម្រងនោមធ្ងន់ធ្ងរ អាចនាំឱ្យជាតិពុល ឬសារធាតុកខ្វក់ផ្សេងទៀតកកកុញក្នុងឈាម ជាលទ្ធផល អ្នកជំងឺតម្រងនោមអាចនឹងមានអាការអស់កម្លាំង ខ្សោយ និងពិបាកផ្ដោតអារម្មណ៍។ ៣.ហើមជើង និងក-ជើង៖ នៅពេលខ្សោយមុខងារតម្រងនោមនឹងបង្កឱ្យចាល់ជាតិប្រៃ ធ្វើឱ្យជើង និង-កជើង អាចនឹងហើមបាន។ ៤.ទឹកនោមមានពពុះ៖ ប្រសិនបើទឹកនោមមានពពុះ ក៏អាចបញ្ជាក់ពីសញ្ញានៃការខូចតម្រងនោម ឬលោកអ្នកចាប់ផ្តើមមានជំងឺតម្រងនោមបានដែរ។ ៥.នោមញឹកញាប់៖ រោគសញ្ញាទូទៅបំផុតមួយនៃជំងឺតម្រងនោម គឺការនោមមានការប្រែប្រួល។ នៅពេលដែលមានអាការនោមញឹកញាប់ជាពិសេសនៅពេលយប់ គួរតែទៅពិនិត្យរកមើលជំងឺតម្រងនោមទើបជាការប្រសើរ។
៦.នោមឈាម៖ ជាធម្មតា កោសិកាឈាមត្រូវបានរក្សាទុកនៅក្នុងរាងកាយ នៅពេលតម្រងនោមមានសុខភាពល្អ និងចម្រោះកាកសំណល់ចេញពីឈាមទៅតាមទឹកនោម។ ប៉ុន្តែ នៅពេលដែលតម្រងនោមត្រូវបានបំផ្លាញ កោសិកាឈាមអាចនឹងលេចធ្លាយទៅក្នុងទឹកនោម។ ៧.ពិបាកគេង៖ នៅពេលដែលតម្រងនោមមិនអាចចម្រោះឈាមបានល្អ នោះជាតិពុលនៅក្នុងរាងកាយ ក៏មិនអាចបញ្ចេញតាមរយៈទឹកនោម ដែលធ្វើឱ្យពិបាកគេងជាប់ជាប្រចាំ។ ៨.ស្បែកស្ងួត និងរមាស់៖ នៅពេលតម្រងនោមមិនអាចរក្សាតុល្យភាពនៃសារធាតុរ៉ែ និងសារធាតុចិញ្ចឹមនៅក្នុងឈាមទេនោះ ជំងឺតម្រងនោមធ្ងន់ធ្ងរនឹងអមជាមួយនូវជំងឺឆ្អឹង ដែលបង្ហាញជាបញ្ហាស្បែកស្ងួត និងរមាស់ផងដែរ៕ ដកស្រង់ពី៖ Hello គ្រូពេទ្យ
