សុខភាព៖ នៅពេលកូនប្រុសស្រីនៅវ័យតូច ទាមទារឱ្យប៉ា-ម៉ាក់យកចិត្តទុកដាក់ខ្ពស់បំផុតលើការ[ការពារ]ពួកគេពីជំងឺដម្កាត់ផ្សេងៗ ដ្បិតប្រព័ន្ធការពារកុមារតូចៗទាំងនោះ នៅមិនទាន់រឹងមាំ។ ក្មេងៗត្រូវការអាហារូបត្ថម្ភប្រភេទសម្បូរជីវជាតិ ដូច្នេះ សូមកុំឱ្យក្មេងៗទាំងនោះ ទទួលទានគ្រឿងកំប៉ុង ឬពពួកអាហារ Fast food ដូចខាងក្រោម…។
១.ភេសជ្ជៈគ្រប់ប្រភេទដែលមានជាតិកាហ្វេអ៊ីន និងជាតិស្ករខ្ពស់៖ ទឹកក្រូចកំប៉ុង ភេសជ្ជៈប៉ូវកម្លាំង តែ កាហ្វេ មិនមែនជាភេសជ្ជៈចាំបាច់សម្រាប់កុមារទេ ផ្ទុយទៅវិញកុមារតូចៗ គួរទទួលទានទឹកផ្លែឈើ ឬផ្លែឈើស្រស់ គឺគ្រប់គ្រាន់ហើយ។ បានជាកុមារមិនត្រូវការភេសជ្ជៈកំប៉ុង ព្រោះពួកគេមិនទាន់បានបញ្ចេញកម្លាំងពលកម្មខ្លាំង ហើយបើបណ្ដោយឱ្យទទួលទានគ្រឿងកំប៉ុងទាំងនោះ អាចបណ្ដាលឱ្យកើតជំងឺទឹកនោមផ្អែម និងប៉ះពាល់ដល់បញ្ហាប្រព័ន្ធរំលាយអាហារ។ ២.មីកំប៉ុង ឬមីកញ្ចប់៖ មី មិនមែនជាអាហារល្អចំពោះសុខភាពកុមារតូចៗឡើយ។ មី ត្រូវបានផលិតឡើងដោយដាក់សារធាតុគីមីមួយចំនួន ទើបអាចរក្សាទុកបានយូរ។ វាមិនងាយរំលាយឡើយ ហើយប្រព័ន្ធរំលាយអាហារកុមារ មិនទាន់រឹងមាំល្អដូចមនុស្សពេញវ័យ ដូចនេះកុំទាន់ប្រញាប់ឱ្យពួកគេបរិភោគអាហារសម្ងួតក្រៀមទាំងនោះ។
៣.អាហារផ្អាប់៖ ចំណីអាហារផ្អាប់ មិនល្អចំពោះសុខភាពកុមារតូចៗឡើយ ព្រោះវាអាចធ្វើឱ្យក្រពះ-ពោះវៀន មានបញ្ហា ដោយសារដំណើរការផ្អាប់ វាអាចឡើងមេ។អាហារដែលកុមារតូចៗ មិនគួរទទួលទាន មានដូចជា ជ្រក់ត្រសក់ ម៉ាំ ក្ដាមត្រាំ និងស្វាយត្រាំ។ ៤.អាហារប្រភេទ Fast food៖ អាហារ Fast food មានដូចជាដំឡូងបំពង់ ភ្លៅមាន់ ឬស្លាបមាន់ចៀន បឺរហ្គ័រ ។ល។ សុទ្ធតែចម្អិនដោយប្រើខ្លាញ់ ហើយភាគច្រើនមិនមែនប្រើតែម្ដងទេ គឺអ្នកលក់អាចនឹងវាប្រើច្រើនដង។ ពពួកអាហារបែបនេះ មិនល្អចំពោះខួរក្បាលកុមារ និងអាចប៉ះពាល់ដល់ក្រពះ-ពោះវៀនផងដែរ។៥.ទឹកកក៖ កុមារទទួលទានទឹកកកច្រើន អាចឆ្លងជំងឺផ្ដាសាយ ក្អក ក្ដៅខ្លួន ឬហៀរសំបោរ ដោយសារប្រព័ន្ធការពារពួកគេ មិនទាន់រឹងមាំ៕ ដកស្រង់ពី៖ ហេទ្បូ គ្រូពេទ្យ
