អត្ថបទទទួលបានសិទ្ធិពី៖ Hello គ្រូពេទ្យ
សុខភាព៖ ដុំសាច់ខួរក្បាល អាចកើតលើមនុស្សគ្រប់គ្នា ដោយមានច្រើនទម្រង់ និងទំហំ ហើយរោគសញ្ញាដុំសាច់ខួរក្បាលដែលគេអាចដឹងបានគឺអាស្រ័យលើទីតាំងដែលវាកើតនៅផ្នែកណាមួយនៃខួរក្បាល។ ឧទាហរណ៍ថា ដុំសាច់មានទីតាំងនៅកន្លែងខួរក្បាលគ្រប់គ្រងចលនាដៃ ឬគំហើញ នោះរោគសញ្ញាអាចមានដូចជាខ្សោយនៅត្រង់ដៃ ឬខ្សោយគំហើញជាដើម។ លើសពីនេះក៏មានរោគសញ្ញាទូទៅមួយចំនួនទៀតពេលមានដុំសាច់ខួរក្បាល។
រោគសញ្ញាដែលអាចបញ្ជាក់ថាមាន ដុំសាច់ខួរក្បាល រួមមាន៖
១. បញ្ហាភ្នែក៖ ដុំសាច់ខួរក្បាល ក៏អាចធ្វើឱ្យមានបញ្ហាភ្នែក ដោយធ្វើឱ្យគំហើញធ្លាក់ចុះ ហើយការប្រើវ៉ែនតាមិនអាចជួយអ្វីបាននោះទេ។ ពេលខ្លះគំហើញអាចវិលមករកសភាពធម្មតា និងពេលខ្លះក៏ពិបាកមើលវិញដែរ។ មួយវិញទៀត ក៏អាចបង្កឱ្យបាត់បង់សមត្ថភាពមើលឃើញរបស់នៅខាងចុងនៃភ្នែក ដែលអាចធ្វើឱ្យដើរបុករបស់នៅខាងស្ដាំ ឬខាងឆ្វេងដៃ។ បញ្ហានេះ អាចលេចចេញមកដូចជា៖ ស្រវាំងភ្នែក មានស្នាមនៅអណ្ដែតក្នុងភ្នែក ពិបាកមើលរបស់នៅឆ្ងាយ។
២. ឈឺក្បាល៖ បើមានអាការឈឺក្បាលដូចជា ឈឺក្បាលជាមួយនឹងអារម្មណ៍មិនស្រួលខ្លួន ឈឺក្បាលបែបមិនធ្លាប់មានពីមុនមក, ឈឺក្បាលធ្វើឱ្យភ្ញាក់ពីគេងនៅពេលយប់, ឈឺក្បាលធ្វើឱ្យភ្នែកចាប់ផ្ដើមព្រិល, ឈឺក្បាលកាន់តែអាក្រក់ទៅក្នុងរយៈពេលរាប់អាទិត្យ ឬខែ គួរទៅជួបពេទ្យដើម្បីឱ្យដឹងច្បាស់ ព្រោះអាការឈឺក្បាលក៏អាចជារោគសញ្ញាទូទៅនៃជំងឺផ្សេងៗ ហើយអាការនេះតែមួយមុខ មិនអាចសន្និដ្ឋានបានថា មានដុំសាច់ខួរក្បាលឬក៏អត់ឡើយ។
ក្រៅពីរោគសញ្ញាទាំងពីរនេះ នៅមានរោគសញ្ញាមួយចំនួនទៀតដូចជា ប្រកាច់ ស្ពឹកលើផ្នែកណាមួយនៃរាងកាយ ការចងចាំប្រែប្រួល ឬភ្លេចភ្លាំង ពិបាកគិត ពិបាករក្សាលំនឹង និងចង្អោរ ជាដើម។ ការព្យាបាលបញ្ហាដុំសាច់ខួរក្បាល គឺអាស្រ័យលើប្រភេទដុំសាច់ ទីតាំងដុំសាច់ និងស្ថានភាពសុខភាពអ្នកជំងឺជាក់ស្ដែង។ ដូច្នេះ បើមានរោគសញ្ញាសង្ស័យណាមួយ គួរតែប្រញាប់ពិគ្រោះជាមួយគ្រូពេទ្យ៕
