សុខភាព៖ ការទទួលទានផ្លែល្ហុង អាចជួយឱ្យពោះវៀនរឹងមាំ និងធ្វើឱ្យការរំលាយអាហារដំណើរការបានល្អ។ លើសពីនេះ ផ្លែល្ហុង ក៏ជាផ្លែឈើមួយប្រភេទ មានគុណប្រយោជន៍ដល់ការសម្រកទម្ងន់។ ខាងក្រោមនេះ ជាគុណប្រយោជន៍ទាំង៧នៃផ្លែល្ហុងដែលល្អបំផុតសម្រាប់ការសម្រកទម្ងន់...។
១.មានកាឡូរីទាប៖ ផ្លែល្ហុងចំនួន១០០ក្រាម មានកាឡូរីតែ៤៣កាឡូរីប៉ុណ្ណោះ។ លើសពីនេះ ល្ហុង ក៏សម្បូរទៅដោយវីតាមីន C កាល់ស្យូម វីតាមីនA ម៉ាញេស្យូម ហ្វូឡេត និងប៉ូតាស្យូម។ ដោយសារមានជាតិសរសៃខ្ពស់ទើបផ្លែល្ហុង គឺជាប្រភពនៃសារជាតិទឹក ជួយឱ្យឆ្អែតបានយូរ និងបញ្ចេញម៉ូលេគុលខ្លាញ់។ ២.សម្បូរទៅដោយជាតិសរសៃ៖ ផ្លែល្ហុង សម្បូរទៅដោយជាតិសរសៃ។ ចំពោះអាហារដែលសម្បូរទៅដោយជាតិសរសៃខ្ពស់ មានប្រសិទ្ធភាពក្នុងការជួយឱ្យប្រព័ន្ធរំលាយអាហារដំណើរការយ៉ាងរលូន និងជួយឱ្យមានអារម្មណ៍ឆ្អែតបានយូរ។ កត្តាទាំងនេះហើយដែលអាចជួយឱ្យសម្រកទម្ងន់បានយ៉ាងឆាប់រហ័ស។
៣.ជួយបំបែកជាតិខ្លាញ់៖ ផ្លែល្ហុង ក៏ជាភ្នាក់ងារដុតបំផ្លាញជាតិខ្លាញ់ដ៏ល្អបំផុត។ ផ្លែឈើមួយនេះ មិនត្រឹមតែជួយបំបែក និងកម្ចាត់ជាតិខ្លាញ់ trans fat និង lipids ដ៏គ្រោះថ្នាក់ប៉ុណ្ណោះទេ ថែមទាំងជួយចិញ្ចឹមបំប៉នរាងកាយថែមទៀតផង។ ៤.ជួយដល់ការរំលាយអាហារ៖ ផ្លែល្ហុងមានផ្ទុកសារធាតុ Papain និង Chymopapain ដែលអាចជួយសម្រួលដល់ការរំលាយអាហារ និងប្រឆាំងនឹងការទល់លាមក។ បន្ថែមពីនេះ ផ្លែល្ហុង ក៏អាចជួយបង្ការ និងព្យាបាល ការរលាកក្រពះបានយ៉ាងអស្ចារ្យ។
៥.ប្រឆាំងនឹងការរលាក៖ យោងតាមការស្រាវជ្រាវបានបង្ហាញថា ការរលាកអាចរាំងស្ទះក្នុងការសម្រកទម្ងន់។ ក្នុងនោះ ផ្លែល្ហុង ជាប្រភពនៃសារធាតុ Papain ជាសារធាតុប្រឆាំងនឹងអុកស៊ីតកម្ម ដែលអាចកាត់បន្ថយការរលាកនៅក្នុងរាងកាយ។ ៦.ប្រឆាំងនឹងការឆ្លងមេរោគ៖ ជាក់ស្តែង មនុស្សមួយចំនួនអាចប្រឈមនឹង បញ្ហាប្រព័ន្ធភាពស៊ាំប្រឆាំងនឹងខ្លួនឯង រារាំងដល់ដំណើរការប្រក្រតីនៃរាងកាយ និងបណ្ដាលឱ្យមានការឡើងទម្ងន់។ ផ្លែល្ហុង ជាប្រភពនៃសារធាតុប្រឆាំងនឹងមេរោគ ព្រមទាំងប៉ារ៉ាស៊ីត ដែលជួយប្រឆាំងនឹងជំងឺ ក៏ដូចជាការឆ្លងមេរោគផ្សេងៗ។ ៧.ជួយបន្សាបជាតិពុល៖ ផ្លែល្ហុងសម្បូរទៅដោយជាតិសរសៃ អាចជួយបន្សាបជាតិពុលនៅក្នុងប្រព័ន្ធរាងកាយ និងសម្អាតពោះវៀន៕ អត្ថបទដកស្រង់ពី៖ Hello គ្រូពេទ្យ
