រដ្ឋធានីហ្សាការតា៖ ទឹកជំនន់ភ្លាមៗបានផ្តាច់ជីវិតមនុស្សយ៉ាងហោចណាស់១៤នាក់ នៅស៊ូឡាវេស៊ី (Sulawesi) ភាគខាងជើងនៃប្រទេសឥណ្ឌូណេស៊ី ខណៈប្រតិបត្តិការស្វែងរកអ្នកបាត់ខ្លួននៅតែបន្ត។ នេះបើតាមមន្ត្រីរដ្ឋាភិបាល អះអាងនៅថ្ងៃអង្គារទី៦ ខែមករា ឆ្នាំ២០២៦...។

លោក នូរៀឌីន ហ្គូមេឡេង (Nuriadin Gumeleng) អ្នក​នាំពាក្យ​ទីភ្នាក់ងារ​ជួយ​សង្គ្រោះ​ក្នុង​តំបន់ ​បានអះអាងថា ភ្លៀង​ធ្លាក់​ខ្លាំង​កាលពី​ព្រឹក​ថ្ងៃ​ចន្ទ​ទី៥មករា បង្ក​ជា​គ្រោះទឹកជំនន់​ភ្លាមៗ​នៅលើ​កោះសៀវ(Siau) ​ស្ថិត​ក្នុង​តំបន់សៀវ តាគូឡានដាង បៀរ៉ូ (Siau Tagulandang Biaro) ដោយបានសម្លាប់មនុស្សយ៉ាងហោចណាស់ ១៤នាក់។ លោក នូរៀឌីន បន្ថែមថា ក្រុមអ្នកជួយសង្គ្រោះចំនួន១៦នាក់ ត្រូវបានដាក់ពង្រាយដើម្បីស្វែងរកមនុស្ស៤នាក់ដែលបានបាត់ខ្លួន នៅថ្ងៃអង្គារនេះ ទន្ទឹមនឹងមនុស្ស ១៨នាក់ផ្សេងទៀតរងរបួស។ គិតមកទល់ពេលនេះ មនុស្សជាង៤៤៤នាក់ត្រូវបានជម្លៀសទៅកាន់សាលារៀន និងព្រះវិហារក្នុងតំបន់។ លើសពីនេះ លោកកត់សម្គាល់ថា៖«​យើង​បន្ត​ប្រមូល​ទិន្នន័យ​ពី​អ្នក​ស្រុក​ក្នុង​ករណី​មាន​អ្នក​បាត់​ខ្លួន​បន្ថែម​ទៀត»។

ក្រៅពីស្លាប់ របួស និងបាត់ខ្លួន ទឹកជំនន់ក៏បានបំផ្លាញផ្ទះរាប់រយខ្នង និងអគាររដ្ឋាភិបាលផងដែរ។ គេនៅបានចាំថា កាលពីចុងឆ្នាំ២០២៥ គ្រោះទឹកជំនន់ដែលបណ្ដាលមកពីព្យុះកំបុតត្បូង និងការបាក់ដីបានសម្លាប់មនុស្សជាង១០០០នាក់នៅកោះសូម៉ាត្រា ហើយរាប់រយនាក់នៅតែបន្តបាត់ខ្លួន។ គួរបញ្ជាក់ថា ឥណ្ឌូណេស៊ីប្រឈមមុខនឹងវិបត្តិធម្មជាតិជាញឹកញាប់ ដោយសារប្រទេសនេះ ស្ថិតនៅលើខ្សែក្រវាត់ភ្នំភ្លើង ស្រទាប់ផែនដីស្តើង ងាយនឹងបង្កឱ្យមានគ្រោះរញ្ជួយដី បន្ទុះភ្នំភ្លើង គ្រោះទឹកជំនន់ និងការរអិលបាក់ដីធ្ងន់ធ្ងរ៕