សុខភាព៖ ទម្លាប់ការរស់នៅប្រចាំថ្ងៃដែលមិនសូវធ្វើចលនារាងកាយ
តួយ៉ាងដូចជាការអង្គុយយូរៗម៉ោងពេក ដែលអាចបង្កឱ្យមានហានិភ័យដល់សុខភាព៦យ៉ាង។ ថ្ងៃនេះ
SBM
News នឹងរៀបរាប់ពីបញ្ហាដែលបង្កមកពីការអង្គុយយូរៗ ឱ្យលោកអ្នកបានដឹង…។
១.ជំងឺបេះដូង៖ ការអង្គុយយូរក៏មានទំនាក់ទំនងទៅនឹងជំងឺបេះដូង។ ការសិក្សាមួយបានរកឃើញថា បុរសដែលអង្គុយធ្វើការ ឬមើលទូរទស្សន៍យូរជាង២៣ម៉ោងក្នុងមួយសប្ដាហ៍ មានឱកាសស្លាប់ដោយសារជំងឺបេះដូង៦៤ភាគរយ ខ្ពស់ជាងបុរសដែលអង្គុយត្រឹម១១ម៉ោងក្នុងមួយសប្ដាហ៍។ អ្នកជំនាញមួយចំនួននិយាយថា មនុស្សដែលមិនសូវបញ្ចេញសកម្មភាពរាងកាយ និងអង្គុយច្រើនម៉ោងក្នុងមួយថ្ងៃៗ មានអត្រាប្រឈមនឹងកើតជំងឺគាំងបេះដូង និងគ្រោះថ្នាក់សរសៃឈាមបេះដូងដល់ទៅ១៤៧ភាគរយ។ ២.ជំងឺមហារីក៖ ការសិក្សារកឃើញថា គ្រោះថ្នាក់បង្កមកពីការអង្គុយយូរម៉ោងក្នុងមួយថ្ងៃៗ អាចនាំឱ្យប្រឈមខ្ពស់កើតជំងឺមហារីកសួត មហារីកស្បូន និងមហារីកពោះវៀនធំ។ ហេតុផលនៅពីក្រោយរឿងនេះ ក្រុមអ្នកស្រាវជ្រាវនៅមិនទាន់អាចបញ្ជាក់បាននៅឡើយ។
៣.ជំងឺទឹកនោមផ្អែម៖ ការសិក្សាបង្ហាញថា អ្នកចំណាយពេលច្រើនម៉ោងអង្គុយក្នុងមួយថ្ងៃៗ អាចប្រឈមកើតជំងឺទឹកនោមផ្អែមដល់ទៅ១១២ភាគរយ។ ការសិក្សាបន្ថែមថា គ្រាន់តែដេកស្ងៀមនៅលើគ្រែត្រឹមចំនួនប្រាំថ្ងៃជាប់គ្នា ក៏អាចនាំឱ្យរាងកាយប្រឈមបញ្ហាធន់នឹងអាំងស៊ុយលីន ដែលធ្វើឱ្យកម្រិតជាតិស្ករក្នុងឈាមឡើងលើសកម្រិតធម្មតា។ ៤.ជើង និងសាច់ដុំ៖ ចំណាយពេលអង្គុយយូរម៉ោងអាចឱ្យខ្សោយជើង និងសាច់ដុំនៅត្រង់ជើងមិនរឹងមាំ។ សាច់ដុំធំនៅជើង មានសារសំខាន់ក្នុងការជួយរក្សាលំនឹង និងដើរ។ បើសិនជាសាច់ដុំជើងខ្សោយ អាចធ្វើឱ្យងាយនឹងដួល និងអាចពិបាកហាត់ប្រាណ។ ៥.ត្រគាក និងខ្នង៖ ចំណាយពេលច្រើនក្នុងការអង្គុយយូរពេកនឹងធ្វើឱ្យត្រគាក និងខ្នង លែងសូវមានប្រសិទ្ធភាពក្នុងការទ្រដងខ្លួន។ លើសពីនេះ ការមានទម្លាប់អង្គុយយូរៗរាល់ថ្ងៃ ធ្វើឱ្យសាច់ដុំសន្លាក់នៅត្រគាករួញខ្លី ដែលអាចនាំឱ្យមានបញ្ហាដល់សន្លាកត្រង់ត្រគាក។ ដូចគ្នាដែរ ការអង្គុយយូរ បូករួមឥរិយាបថអង្គុយមិនល្អ អាចធ្វើឱ្យប៉ះពាល់ដល់សុខភាពឆ្អឹងខ្នង ដូចជាមានសម្ពាធលើឆ្អឹងខ្នង និងបង្កឱ្យមានការឈឺចាប់។
៦.ទម្ងន់៖ ការធ្វើចលនាបានច្រើនជួយឱ្យរាងកាយបំបែកខ្លាញ់ និងជាតិស្ករ។ បើសិនជាលោកអ្នកចំណាយពេលអង្គុយច្រើនម៉ោង ការរំលាយអាហារមិនមានប្រសិទ្ធភាព ដែលនាំឱ្យស្ករ និងខ្លាញ់ទាំងនោះ ស្តុកនៅក្នុងរាងកាយបង្កឱ្យឡើងទម្ងន់។ ទោះបីជាចូលចិត្តហាត់ប្រាណក៏ដោយ តែការចំណាយពេលវេលាច្រើនក្នុងការអង្គុយ ក៏នៅតែអាចបង្កជាបញ្ហាសុខភាពដូចជា បញ្ហាធាត់ជ្រុល សម្ពាធឈាមខ្ពស់ ខ្លាញ់ក្នុងឈាមខ្ពស់ កម្រិតកូលេស្តេរ៉ូលល្អចុះទាប និងមានភាពធន់អាំងស៊ុយលីន។ ក្នុងនោះ បើលោកអ្នកចូលចិត្តអង្គុយច្រើនម៉ោងក្នុងមួយថ្ងៃៗការសិក្សា បានណែនាំឱ្យហាត់ប្រាណកម្រិតមធ្យមដូចជា ដើរ រត់ ជិះកង់ ឬហែលទឹកឱ្យបានចន្លោះពី៦០ទៅ៧៥នាទី ក្នុងមួយថ្ងៃ។ ក្នុងករណីបើអង្គុយធ្វើការក្នុងការិយាល័យច្រើនម៉ោងក្នុងមួយថ្ងៃៗ លោកអ្នកគួរធ្វើរឿងមួយចំនួនដូចជា៖ ឡើងចុះជណ្ដើរជើងជាជាងប្រើជណ្ដើរយន្ត, ដើរទៅជជែកជាមួយអ្នករួមការងារជាជាងផ្ញើសារ,ដើរទៅចាក់ទឹកពិសារឱ្យបានញឹកញាប់ និងពេលទទួលទានអាហារគួរទៅខាងក្រៅកុំបរិភោគក្នុងបន្ទប់៕ អត្ថបទដកស្រង់ពី៖ Hello គ្រូពេទ្យ
