រដ្ឋធានីប៉េកាំង៖ រដ្ឋមន្ត្រីការបរទេសចិន បានរិះគន់ជាខ្លាំងចំពោះការលក់អាវុធរបស់សហរដ្ឋអាម៉េរិកទៅកាន់កោះតៃវ៉ាន់ ខណៈរដ្ឋធានីប៉េកាំងកំពុងធ្វើសមយុទ្ធយោធាឡោមព័ទ្ធកោះនេះដ៏ក្ដៅគគុក...។
ការលក់អាវុធរបស់សហរដ្ឋអាម៉េរិកទៅឱ្យកោះតៃវ៉ាន់ គឺជាការយកអំបិលជះលើដំបៅលើទ្រូងរដ្ឋធានីប៉េកាំង ធ្វើឱ្យអ្នកការទូតចចកចម្បាំងចិន លោក វ៉ាង យី ផ្ទុះកំហឹងជាខ្លាំង។ ជុំវិញបញ្ហានេះ លោក វ៉ាង បានសង្កត់ធ្ងន់ថា៖«ដើម្បីឆ្លើយតបទៅនឹងការបង្កហេតុជាបន្តបន្ទាប់ ដោយកងកម្លាំងគាំទ្រឯករាជ្យនៅតៃវ៉ាន់ និងការលក់អាវុធទ្រង់ទ្រាយធំរបស់សហរដ្ឋអាម៉េរិកទៅឱ្យតៃវ៉ាន់ យើងត្រូវប្រឆាំងពួកគេយ៉ាងម៉ឺងម៉ាត់»។ យ៉ាងណា រដ្ឋាភិបាលកោះតៃវ៉ាន់អះអាងថា កោះនេះមិនដែលស្ថិតក្រោមបក្សកុម្មុយនីស្ដចិនទេ ហើយការទាមទារអធិបតេយ្យភាពរបស់រដ្ឋធានីប៉េកាំង គឺមិនស្របច្បាប់។
គេនៅចាំបានថា អាម៉េរិកបានប្រកាសពីកញ្ចប់នៃការលក់អាវុធ មានតម្លៃជាង១១ពាន់លានដុល្លារទៅឱ្យកោះតៃវ៉ាន់ ដោយរួមបញ្ចូលទាំងមីស៊ីល យន្តហោះគ្មានមនុស្សបើក ប្រព័ន្ធកាំភ្លើងធំ និងកម្មវិធីយោធា។ ជាការឆ្លើយតប ចិនបានចាប់ផ្តើមធ្វើលំហាត់សឹកយោធារយៈពេល២ថ្ងៃ ជុំវិញកោះនេះ ដែលបង្ហាញឱ្យឃើញថា ចិនកំពុងប្រើយុទ្ធសាស្ត្រព្រួញ១បាញ់ចាប២ ព្រោះថា រដ្ឋធានីប៉េកាំងមិនត្រឹមតែគំរាមកោះតៃវ៉ាន់ទេ ប៉ុន្តែក៏កំពុងផ្ញើចុតហ្មាយទៅកាន់រាជធានីតូក្យូផងដែរ បន្ទាប់ពីនាយករដ្ឋមន្ត្រីជប៉ុន លោកស្រី សាណា តាកៃឈី (Sanae Takaichi) ព្រមានឆ្លើយតបផ្នែកយោធា ប្រសិនបើចិនហ៊ានត្របាក់លេបតៃវ៉ាន់៕
